你是一名在戰場上的無名士兵: 第5章EX1：溫柔的味道 - 4 (EX完)

在冷靜下來後，你從沐浴室走出來，看見雪倫在陽台用雙手椅着灰色的木造欄杆。

你走出陽台，微風吹過雪倫的紅髮，她的臉上張開的微笑，沒有蘊含悲傷，是真正從心而發的微笑。

「從我離開屋企開始，我就知道我終一日會搵到一個適合我嘅地方。」雪倫眺望夜空的星光。

「咁你搵到未？」你也仰望夜光。

「唔知呢，畢竟一生人流流長，我永遠都唔肯定一個地方係咪就係我可以休息嘅地方。」雪倫望向你。





「我都諗緊，如果冇呢場戰爭，我到底會喺度做緊咩，做小丑，好似妳咁做一個旅人，又或者一樣依家嘅我永遠都掂唔到嘅嘢。」你向夜空伸手。

「旅行嘅其中一個有趣，或者傷感嘅特點係，當你喺一段時間之後再返返去同一個地方，所有嘢可能就會變唔同，連你想搵嘅人都會唔喺度。」雪倫說。

「其實唔止旅行，當一段時間之後，你完全諗唔明點解自己會做出一個決定。」
「我細個聽過一個故事，當一個馬車隨著時間改變，佢嘅轆，車身，帳篷全部換晒，咁佢仲係唔係原本嘅馬車？」你問。

「可以話係又可以話唔係。佢係原本嘅馬車一步一步咁整做嚟，但佢最後已經唔係原本嘅馬車。」
「就好似一個人經歷過唔同嘅嘢之後，佢嘅心靈就會改變，喺經過幾年之後，佢已經唔係原本嘅自己。」
「又或者講，變咗之後嘅人係原本嘅人嘅「繼承者」，佢唔係原本嗰個人，但有原本嗰個人嘅記憶，經歷，感受。」




「比如話，我知道自己展開旅程係為咗喺搵到一個容身之所之前，見識呢個世界嘅所有事物。但係，我做嘅每一個選擇已經同原本嘅自己唔同，我以前可能會逃避，但我依家會面對。」雪倫朝你展現笑容。

「可能係咁，又有可能唔係咁，人嘅心係一個好複雜嘅嘢，自己都唔能夠完全理解自己嘅心。」
「喺人同人嘅交流入面，不少一定會畀其他人嘅思想影響，或者自己本身已經成為其他人同自己嘅混合。」你說。

「我喺旅程入面畀人呃咗好多次，每一次我都同自己講「忍咗佢」，但自己之後一定會好唔開心。」雪倫說。

「唔好忍，你忍只會畀嗰啲人得逞，你要同佢哋講「我忍夠喇」，再畀個下馬威佢哋，先唔會再畀人呃。」
「喺呢個被污染嘅世界，善人係被欺壓嘅對象，善良係必須要有嘅嘢，但對住有惡意嘅人，要令到佢哋唔敢再搞妳。」你用輕鬆的眼神望着雪倫。





「我會試下，多謝你。」雪倫摸了摸她的頭髮。

「我以前一直都係一個人，當我以為有人靠得住嘅時候，佢哋總會令我失望。」
「於是我同我自己講，呢個係屬於我一個人嘅旅程，直到完結嗰日都係一個人。」雪倫提高聲線說。

「的確係，好多人會擺出虛假的外表等人哋信佢，我覺得呢種生存方式同世界隨波逐流啫。」
「有人話成日發埋啲改變世界嘅白日夢，不如實實在在跟人搵食，就係呢種態度世界先改變唔到。」你低下頭來。

「不過你成日諗住其他人嘅嘢，但無視咗自己嘅需要，你咪正正你講嘅嗰種人囉。」雪倫說。

「咦？」你無話可說。

的確，你只懂得為了他人而戰，為了他人而幫助，你在不知道甚麼時候便忘記了自己，就像自己毫不重要。

你的強大令你有成就，但正是你總是為了他人而不能獲得更大的成就。





在何時開始，你變成了一個空虛的人，只因他人的反應而行動，自己一個卻甚麼也不會做。你固然有自己的擔憂，但那擔憂也是為了他人而產生。

為了他人而戰的意念給了你力量，但當其他人都拋棄你的時候，你便會成一隻永不脫殼的蛹。

為了他人而改變，為了他人而行動，為了他人而思考，但你從來沒有為自己設想過。想獲得更多利益也是想為其他人付出更多。

你跌進了一個黑洞，深淵裏甚麼都沒有，你永遠在下跌，沒有色彩，沒有出路。

彷彿所有事都變成了黑線和白紙的混合，你閉上眼睛，準備隨着深淵逝去。

你感覺到一股溫暖，一種讓你淚如泉湧的溫暖，你隨着溫暖上升，周圍的事物都染上了色彩。

你從暖流中浮起，光明在上方迎接你，你伸出手投入光明的溫暖。





「巴奇？」你看見雪倫躺在你身上，而你不知道在甚麼時候倒下來了。

「嗚嗚嗚...」你流起眼淚，視線變得模糊。

「做咩事？」雪倫不知所措。

你很想就此一睡不起，這樣就不用顧記那麼多事，在戰場上奮鬥。

雪倫跪起來，你發現，人生總有些時候需要為他人而行動。

但為了自己也是很重要的，你懂得向別人說出一大堆道理，但你自己連比這些道理更基本的事也做不到。

「我想瞓覺。」你說。

「好啊。」雪倫拉起你。





你兩個對望，你們的臉龐不斷朝對方靠近，你們的嘴唇接觸，你抱着雪倫，那是一股給你動力的溫暖。

而她的嘴唇，則是溫柔的味道。