「咦?」你張開眼,發現自己在一間木屋,只有從左上方的窗戶上透了一點光。「你醒咗喇?」「派齊莉?」你發現她仍然坐在木桌對面的椅子上。「你應該有好多嘢想問。」她看着你坐在椅子上。
「的確係。」「你已經見過出面嘅我。你覺得點?」

「完全係第二個人嚟。」「真係第二個人?定係你見到嘅只係表面、或者背面,而冇睇到另一面?」「咩意思?」「嘈係一樣嘢,同埋一個人,可以有好多面。你所睇到嘅嘢唔一定係真相。」

「咁我想問,我死咗未?」「應該未,睇情況啦,不過你嘅樣都幾慘下。」「咁我啲同伴呢?」「好遺憾,你「異想天開」嘅戰略係有用,但都仲係打唔贏嗰嚿嘢。」「之後呢?」「我唔可以再講,你醒返之後問啦。」

「點解加斯林帝國嘅怪物會喺佢哋手上?」「「啫係加斯林帝國同佢哋係同盟?」你諗清楚啲先,你都知嗰座城係畀人圍住咗,冇人入到去。」「但有啲人冇理到警告,入咗座城,然後見到石碑,而嗰嚿嘢可以變大變細......」「佢一直都喺度,只係變細咗啫。」「所以怪物有兩個。咁就解釋到點解第一隻唔可以出城,第二隻可以。」

「咁你應該知道爆炸係假,真正摧毀咗城鎮嘅係怪物。」「係上面為咗掩飾真相而作嘅故仔?」「冇錯,雖然佢哋唔知係咩原因,而你應該知道,但佢哋為咗唔好令人擔心,就話係人為意外之類。」




「妳話我知道係咩意思?唔通?」

「我可以感受到你感覺到嘅嘢。」「咁現實嘅妳知唔知?」「我就直接啲講,知,但佢察覺唔到。」「咩意思?」「我同佢實際上係同一個人,但佢唔會知喺呢個地方發生嘅事,係我同你嘅祕密。」

「咁妳係點入到我身體入面?」「你應該知嘅時候就會知。」「妳唔會就係呢一切嘅幕後黑手派過嚟嘅人啩?」你伸雙手捉住她的衣領。「如果我話係......」「妳會喺依度死,連埋現實嘅妳。」你憤怒的雙眼盯着她,她的臉上滿佈恐懼。

「就算係咁......你都唔會知我係唔係呢度嘅人......甚至做咗啲唔應該做嘅嘢......你要知道......即使你係原本就存在嘅人......受到其他人嘅干擾而做咗原本冇做嘅嘢......都會有影響......」她吞吞吐吐地說。

「咁妳嘅意思係「係」?」你站起來把桌子踢開,桌子倒在地上。
「係。」聽到後,你把她推到牆上,「妳,知,唔,知,有,幾,多,人,因,為,你,哋,而,死?」每說一個字,你便把她的頭撞在牆上一次。「不如你仔細咁再聽一次?」她的頭面向地板,血不斷散開,把字吐出來。





你怒氣沖沖地看着她,「吓?」你眨了一下眼,發現自己還坐在椅子上。「你醒返之後再問......你做乜呆咗?」派齊莉完好無缺,笑容滿面地看着你。「妳啱啱明明,唔係,我......」「呢度只係你嘅,精神世界。有冇人可以知道你諗緊咩?」這又回到最初的問題,如果這是你的意識,你又怎會以一個從未見過的人作為對話對象?

「你啱啱進入咗一個非常危險嘅狀態,所以先會亂諗嘢。」「咁我又點知你唔係淨係將呢度還原?」「人喺出現妄想嘅時候好容易將佢放大,甚至相信佢係真實。當人唔想記得一啲嘢嘅時候都會咁做。」「我到底傷成點?」「等你自己感受下好啲。依家我哋不如整理下情報先。」

「咁妳係咩人?」「我係你嘅潛意識。」「淺...淺意識?」「你唔知我係咩都好正常,因為呢個就係我嘅存在意義。就好似你唔識我叫咩一樣。」「簡單啲嚟講,我係你平時思考唔會接觸到嘅區域,但我入面嘅嘢其實你都知。」「但係我從來都未聽過咩叫潛意識,妳又點會存在?」

「講起就得意,因為我都唔知。而且你係最近先見到我。」「咁我未見到妳之前,妳存唔存在?」「你估下?你見唔到我所以認為我唔存在。但你見唔到我唔代表我唔存在。但可能係因為我唔存在所以你先見我唔到。」「總之妳依家喺到,我又見到妳。」「的確我哋唔需要咁介懷點解一樣事物會存在,識利用就得。」

「我比上次暈得好耐,我到底.....」「咪話咗叫你自己睇。」「啫係唔係啲好嘢?」「做好最壞嘅打算就差唔多。」「咁我哋依家可以做咩?」「唔該收埋你嗰個可恥同埋噁心嘅意圖。我只係一個形象。」「所以我知我自己諗緊乜嘢。」「答案就喺你啱啱講嘅嘢入面。」





「上次我哋話要出去行下都冇行到,不如趁依家?」「好啊。」「點解妳上次咁活潑,今次咁冷淡?」「你問返自己見到咩人會失去理性咪知。」你們走出木屋,外面仍是一片陽光。「又話呢度係我嘅精神世界,點解我就嚟死都咁大個太陽嘅?」「喔,呢個係背景嚟啫。我想變做乜,」她拍了一下手指,周圍突然變得大雪紛飛,你們也從街道轉移到雪原。「就可以變做乜。」她又拍了一下,周圍變成了正在下雨的樹林。

「不過好似唔會整埋溫度或者畀天氣影響之類。」「當然啦,」她把街道回復原貌,「全部都只係背景,想唔想睇下冇背景?」「好啊。」你聽到一下拍手指的聲音,然後周圍漆黑一片。「喂,做咩?我就嚟跌親,」你向前仆,「我係咁下降,救命啊,有冇人......」你在下方感受到一股強烈的風拍打着你,然後你又聽到「啪」的一聲,回到熟悉的街道。你站在她旁邊。

「冇背景就係咁。」「唔該妳嘅示範。」你拍了拍雙袖。「背景唔代接你真係去過嗰個地方,可能只係你幻想出嚟,大概嘅樣。」「哦......」你走到一張長椅並雙手靠着椅背坐下,「如果日日都可以遠離紛爭,瞓喺度就好。」「哈哈哈哈哈哈哈哈哈!!!」她馬上大笑,笑得像聽了最好笑的笑話一樣。「我....我唔得喇...哈哈哈哈哈!」她笑得倒在地上滾來滾去。「咁突然笑咩?」

「你嘅願望達成咗,而你都就醒,係咁先。」「妳咁講係咩意思?就算真係咁,笑咩?妳都係我。」「但係我只係一個隨你而生,隨係而死嘅意識,我只會形式上感受到你感受嘅嘢。苦都係你受。」她撐腹大笑。「妳個賤.....」當你正想衝向她時,身邊的事物正在消失,化為虛無。
已有 0 人追稿