你是一名在戰場上的無名士兵: Real - 第二章 - 1
「巴奇副隊長 Comgretualetions。」「抗，抗咩話？」「Comgretualetions係我鄉下嘅獨有詞彙，意思係恭喜。」隊長向你解釋。「原來係咁。等陣先，副隊長？ 」「乜野Comgretualetions ，是咪打勝仗打到痴咗線？而且聽落係第二種語言......」你在心中感到無奈。
「係，我見你咁有頭腦，打交又叻，上到呢個位應該可以做多啲嘢。」「我何德何能？我只係一個連同伴都拯救唔到嘅人。」你不想再記起，但當你提醒自己忘記，景象反而更深刻。「再者，我只係想頂到打完仗就退休，畀呢個位我做只會增加我死嘅機會。」你內心想拒絕，「咁你想多啲戰友死定係趁呢個時候挽回？」
尼克面有難色地看着你，「咁如果因為我嘅錯而累死更多人，又點算？」「嗰陣嘅嘢嗰陣先算。但如果你依家唔做，情況係唔會改變。」「咁如果死嗰個係對我好重要嘅人呢？」你流下眼淚。隊長沉默了一會，「所以你先更加要努力去阻止。」
「如果我努力咗都唔得呢？」「咁佢哋永遠喺你身邊。」聽到他這樣說，你的怒火馬上燃起，「你覺得講呢句嘢可以彌補到任何嘢咩？佢哋唔喺度，我哋就再見唔到佢哋個傻樣、笑容，聽唔到佢哋把聲，理解唔到佢哋嘅諗法。你依家喺度講埋啲廢話？」
「巴奇，夠喇。」尼克拉着你的右手。隊長嘆了一口氣，「後生真係好。副隊長，呢次我就唔同你計較。反正你應該明嘅時候就會明。睇下係邊個點醒你同幾時啫。直到嗰刻，你應該都會好痛恨自己，亦都唔可以喺錯誤入面行返出嚟。當然我唔希望呢啲悲痛嘅事發生，不過人生就係咁，無論發生咩事都要行落去。有好多嘢你唔知。」
「有冇問題？冇問題嘅話你可以出返去先，我有啲嘢要同尼克士兵講。」「就職儀式幾時舉行？」「今晚慶祝嗰陣。」「好，咁我告辭先。」你走出早已換成我方擺設的兵營，然後重踏地面。「喺度講呢樣講嗰樣，以為老就大晒？明明你都知咩事。」你又踩了幾下。
「係喎，雪倫呢？」你回去找隊長詢問。進到兵營，你看見他正在和尼克握手，「副隊長，請問又有咩事呢？」「我想問下，雪倫小姐喺邊？」「哦，我啱啱同佢傾過。因為佢嘅身份比較特殊，所以我安排咗佢去一間空嘅旅館。你知啦，依度仲係交戰區，唔可以咁快放人入嚟。」「好，多謝隊長。」
你走到那間空無一人的旅館，接待處內的雜物全都掉到地上，鑰匙也有些不見，植物和泥土更散發着臭味。「咳咳咳......」你撥開塵埃走到二樓。二樓的狀況更糟，衣服、食物、紙張、布料還有其他亂七八糟的行李佔領了地面。「咁樣點畀人行？」還有些打斜的櫃子橫跨了兩道牆。
「啊...咳咳咳，點解會畀啲咁嘅地方佢？」你不小心吞下浮塵。你走到一道被打掃過的門外，「應該係呢度......」你在雪倫的門外，「但係我應該點開口？」你伸向門把，但害怕接觸。「唔理喇一......」你打開門縫，想看看她在做什麼。「咦！！！？」誰不知她在換衣服，她也察覺到你的視線，藉着光滑的身驅看着你。你不小心推開了門，然後你們赤裸裸地看着對方。「我......我可以解釋......」「死變態佬！我打死你！」
--------------
仍然是在那個黑房子，兩個人仍然在那裏。
「師父，點解.......佢咁........嘅？」她說。「咁係因為......。」他說。「哦~咁不如我哋......啦」她說。你能聽見他們的對話，卻聽不清楚他們在說甚麼。
-------------------------------------------------
你觀看着兩個人，然後一道白光在你的雙目中閃爍。「哇！又做乜野？點解我又見到堆白光嘅？睇嚟我就有戰爭恐懼症。」你走在旅館二樓，被突如其來的光芒弄得看不清路，被一件衣服絆倒，撞在牆上。
「啊！啊......我原本嚟依度要做乜？」你感到疑惑，但當你看見門牌的時候，你就記得了。你敲了雪倫的門三下，「邊個啊？」你聽見雪倫的聲音。
「係咪雪倫？我係巴奇，我有啲嘢想搵你。」你對着門後的聲音說。「好啊，你等我一陣先。我未話得都唔好開門，如果唔係我一定會打死你。」聽見她這樣說，你有一股想打開門的衝動。你流下冷汗把不斷晃動的手伸向門把，「我都覺得......唔係咁好。」你放下手。於是你將耳朵貼近門邊，「聽都唔好。」你決定服從警告耐心等候。「但係佢到底做緊咩？」
不久，雪倫以和早上不同的服裝打開門。「哦~巴奇，入嚟坐啊。」她好像很高興見到你。「好啊。」你進了雪倫的房間。你看見她的房間很整潔，書桌上放了數本書，床上好像掛了一幅畫作。
「你搵我做咩啊？」雪倫關上門後坐在床上。
她換成和平民女子相似的白色裙，雙腳不斷前後擺動。你作為雄性的本能也開始發作，你移不開視......「喂，你望緊邊？」「冇，冇，冇嘢......」你把口水吸回口腔中。「好清純......」你的雙眼又被重力拖往下面....「喂。」「係？」你抬頭，看見她帶着惡意地盯着你。
「哇！」你差點從椅子上摔下來。「你搵我做咩？」「喺講呢樣嘢之前，點解隊長會放妳喺呢間亂成咁嘅旅館？」「呢度外牆完全冇受損，入面只要執返好就可以再用。我啱啱先執完。」你回想起那片地震後的光景，實際不敢認同。「咁唔係你想點？叫我同係班男人瞓埋一齊？」
「我，我唔係咁嘅意思。」你還是不時看着她赤露的雙腳。「係咁嘅，我今日見到兩次白光。」「白光？」雪倫用手指頭頂着下巴。「見到白光之前發生咩事我唔記得，但係跟住我見到好似有兩個人唔知做乜，好似傾緊計，好似行緊埋我度咁。」你嘗試按着最合理的方法解釋。