你是一名在戰場上的無名士兵: 第13章 - 4

到了夜晚，雪倫和海迪路絲才冒頭出現。

「巴奇，我可唔可以入嚟？」海迪路絲的聲音從門外傳來，「可以啊。」

她們也許是現在唯二可以讓你心情好轉一點的人，「唔好意思，我依家頭都擰唔到，淨係望到個天花板。」你無奈地說。

海迪路絲的臉出現在你視線左方，雪倫有樣學樣地出現在右方。「我哋會就你㗎喇，呢啲係我哋應該做嘅！」雪倫微笑。

「係喇，國王陛下因咩事叫妳地？」





「國王陛下問咗我哋啲關於你嘅嘢。」雪倫說。

「妳哋有冇幫我講好說話？」

「呢層就......」「我哋有啊！」海迪路絲搶答，「喂！」雪倫嘗試叫停她，「我哋同國王陛下講你有幾咁英勇作戰，唔理長官命令 - 唔唔唔......」

雪倫見海迪路絲沒有收口，走到床另一邊掩著她的嘴巴：「巴奇，我哋有講，但係......」

「但係？」





「國王陛下本身就好嬲你擅自行動，但又唔可以當睇唔到你立咗嘅功勞，話你死唔去又全身癱瘓就係你嘅懲罰。」

「唔唔唔！」海迪路絲拉開雪倫的手：「雪倫妳可唔可以唔好咁粗魯？」

「我邊有粗魯啫？我係驚妳整喊巴奇先㩒住妳個嘴！」

「妳咁講佢咪仲想喊！」

你苦笑，兩人疑惑看着你，「唔使嘈喇，有妳哋喺度我已經好開心。」





「巴奇，我有啲嘢 -」「我都有嘢想講！」雪倫和海迪路絲又在爭奪發言權。

「一個一個嚟，雪倫先啦。」

「嗯。伊莎小姐叫我照顧你日常起居生活，啫係餵你食嘢之類。」

海迪路絲用妒忌的眼神看着雪倫，但雪倫沒有察覺。

「雪倫餵我食嘢......諗起都興奮。」你衝口而出。

「我唔會用興奮去形容呢件事，因為你都變成咁......」雪倫不敢與你一起苦中作樂。

「唔變都變咗，起碼未死 -」

「啋過你啦！唔可以講啲咁嘅嘢！唔好再講啊！」她靠到你面前，憤怒的心情全都畫在臉上。





「知喇知喇。」

聽見你敷衍後，她才讓海迪路絲說話，退到海迪路絲後方。

「巴奇......我可能唔可以日日嚟見你......」海迪路絲在你視線內露出悲傷神情。

「點解？」

「國王陛下叫我去幫手開發新兵器，國王陛下好欣賞我嘅才能，覺得我可以幫帝國快啲打贏仗......」

「咁妳本身想點？」

「我？」





「妳想留喺我身邊，定係盡情發揮妳嘅才能？」

「我又想留喺巴奇身邊，又想發揮才能......」

「咁妳去幫國王陛下手啦。」

「吓？」她不明白你的建議。

「我變成咁都係為咗場仗可以快啲打完，妳去幫國王陛下啫係幫埋我，我會好開心。」

海迪路絲很害羞，一時說不出話來。