【全劇終】《我喺街執咗個失憶嘅女仔返屋企》: 權力頂峰

學生會會長——見到呢五個字都知道呢條友無論係成績、外貌定係才能都係企喺頂峰嘅人。
 
其他學校我唔知，不過我地學校一定係咁。
 
雖然我對佢真人冇咩印象，不過聽聞佢考試入面未試過低過滿分。
 
再加上我地學校賦予俾學生會嘅權力係正常人想像唔到咁高，舉個例如果犯校規嘅話，學生會可以剝奪違規者某啲權利或者對佢施行處罰，例如冇得用操場、朝早要返嚟打掃等，而行使對象可以係個人，都可以係班別。
 
簡單嚟講，如果我犯校規，學生會可以禁止我或者我嗰班踏入學校某啲地方，但罰個人定係全班就視乎事件嘅嚴重程度，正確嚟講應該係視乎學生會會長當日嘅心情。
 




所以，稱佢為擁有至高無上權力嘅學生都不為過。
 
「我唔知啦，不過Hana今日冇返學，應該都係因為個post。」
 
「珀奈今日冇返學咩？」
 
「你睇吓你，仲話鍾意人，連人地有冇返學都唔知…」張廷宇一臉鄙視咁講。
 
雖然珀奈同我唔同班，但今朝早會嗰陣我應該就要發現佢唔喺隊入面，所以張廷宇鬧得我啱。
 




「如果係真嘅話…咁係幾時嘅事？」我半自言自語咁講，明明前兩天仲咁開心去野餐，唔通張相係星期日俾人影到嘅？
 
等等，嗰晚我like嗰堆相，全部都係男友視角影嘅，莫非幫佢影相嗰個就係學生會會長…？
 
一諗起相入面珀奈嘅笑容，同頭先secret個post入面表情徬徨嘅佢，我就愈諗愈嬲。
 
呢個時候，廣播系統對全校宣佈：「5E班高田帆同學，麻煩於第二節小息到七樓搵學生會會長；重覆一次，5E班高田帆同學，麻煩於第二節小息到七樓搵學生會會長。」
 
「阿帆，有人搵你呀。」小悠講。
 




「我知。」
 
「你估條契弟搵你做乜吖嗱？」
 
「我唔知，不過去會一會佢都好。」等我乘機過去睇吓呢個學生會會長係咩來頭，順便去找吓悔氣。
 
「喂，頭先我講吓咋！你唔好真係搵佢隻揪呀…你唔夠佢玩架…」
 
「邊個話我搵佢隻揪啫？」而家咁睇怕陣間個小息都帶唔到小悠參觀學校，於是我同佢講：「小悠，陣間個小息你乖乖地留喺課室，我晏啲再帶你行學校。」
 
「知道！」佢乖巧地回應。
 
張廷宇偷偷地笑：「佢幾多歲人？你當佢白痴定弱智？」 
 
「你都唔知今朝幾隻厹圍住佢，我費事佢俾人帶壞。」




 
「笑咗…我信佢唔係你條女喇，你似佢老豆多啲。」
 
小悠喺隔離聽到都忍唔住笑。
 
「笑咩呀笑？」我細細力拍佢頭頂，然後同張廷宇講，「你！陣間小息同我睇住小悠。」
 
「係嘅，知道。」
 
之後我地喺小食部買嘢食，然後急急腳趕返課室。