【全劇終】《我喺街執咗個失憶嘅女仔返屋企》: 聯校宿營篇：二人晚餐（上）

等最後一組到埋終點之後，老師開始宣佈排名同得分。
 
第一名係我同千惠，所以我地每人有6分；
 
第二名係羅凱撒嗰組；第三名就係駱以雪嗰組。
 
而小悠同阿妹……居然係尾二。
 
睇嚟有阿妹呢個模範生喺度都只係令小悠不至於變成包尾…
 




總之，全部人嘅分加埋之後，我地學校以23：19領先緊阿妹學校。
 
「哈！唔知邊個頭先一支箭衝出去，結果竟然包尾冇得食自助餐添。」呢個時候，我梗係要恥笑吓小悠。
 
「咁我點知佢地會唔派地圖，搞到我同阿妹頭先係咁盪失路。」雖然佢咁講，但佢會扁晒嘴應該只係為咗自助餐。
 
「仲好講，係咁盪失路嗰個明明係你，淨係搵你都唔知用咗幾多時間。」阿妹少有地抱怨。
 
「哈，俾我估中。你明我平時同佢出街嘅感受啦…」
 




「邊有你講得咁誇張呀？」
 
我同小悠鬥緊嘴嗰陣，阿妹又一副心不在焉嘅樣。
 
「阿妹？」我同小悠幾乎同步講。
 
「…吓？做咩呀？」
 
阿妹一定有啲嘢。
 




 
之後就係晚餐時間。
 
老師帶咗我去一個成間高級餐廳咁嘅地方，我先知原來荒山野嶺都有自助餐食。
 
而千惠早就坐咗喺入面。
 
「你隻眼仲痛唔痛呀？」雖然係皮外傷，但佢隻眼貼咗紗布。
 
佢笑住對我擰吓頭。
 
「…笑咩？」
 
佢又搖頭：「冇，我地快啲食嘢吖。」
 




本來對呢餐所謂嘅自助餐冇咩期望，但食咗一啖之後發現仲好食過出面啲餐廳，睇嚟陣間可以同小悠曬吓命，睇佢激到跳跳紮個樣。
 
我忍唔住笑出嚟，對面嘅千惠居然跟住一齊笑。
 
「…你到底笑咩？」
 
「冇嘢喎。」
 
「冇嘢你又笑？」
 
「冇嘢唔笑得嘅咩？乜你咁八掛架？」
 
明明就係望住我呢邊笑…唔通笑我食嘢食得衰？
 
「咳，excuse me. 」我轉咗個優雅啲嘅動作去据眼前嘅牛扒。




 
靜咗一陣忽然有啲尷尬，咁大個場得兩條友面對面食自助餐，我已經分唔清呢個究竟係獎勵定係懲罰…
 
我唯有求其講啲嘢：「雖然我地頭先拎第一，但計埋總分之後…」
 
「我知呀，你地學校領先緊吖嘛，頭先晴晴有message我。」
 
「…仲以為你會好大反應添。」
 
「你唔記得仲有聽日咩？反正到最後贏嘅會係我地呢邊。」
 
「邊邊贏都唔關我事。」我郁吓膊頭講，反正我的目的只係防止小悠嘅閃靈現象，而今日之後多咗一個，就係睇住羅凱撒唔好俾佢亂嚟。
 
「點解你好似咩都唔在乎？你對咩係有興趣架？」千惠食咗一啖沙律問我。
 




「只要係唔麻煩嘅嘢…」
 
「我諗到嘞，你頭先係咪叫我講吓我學校？」佢講緊野外定向嗰陣我求其拋嗰個話題，仲以為佢聽唔到。
 
「嗯，講吓囉。」橫掂都開咗話題，兩條友靜晒仲尷尬…
 
「好呀，我生日係4月20號，白羊座A型血，5C班26號，感情狀態係A1…」佢講到一半，我示意佢停：「等等等等！你確定呢啲係你學校嘅嘢？」
 
「咁我係嗰度嘅學生，我嘅嘢咪即係學校嘅嘢？」
 
到底佢係強詞奪理定係純粹鳩噏，我放棄去分辨。
 
「…先唔理你頭先句嘢嘅邏輯，但你唔覺得喺呢個環境之下咁樣介紹自己法…有啲似…人地speed dating? 」
 
佢笑咗幾聲，我發現佢笑點應該幾低：「你點知？你成日去架？」




 
「喂，呢啲邊使試過先知呀？睇電視都成日有啦…」
 
「好，我講完嘞，到你。」
 
睇佢個樣真係以為我會同佢癲埋一份…「不如我地都係轉話題吧啦。」
 
「你唔想講我幫你講埋？高田帆，5E班15號，生日8月18號…」
 
「喂喂喂喂！」我第二次stop佢：「你點知我生日架？」
 
「我頭先問晴晴嘅，唔止生日，仲有身高體重啦著幾多號鞋啦…同埋最緊要我知你係A0。」
 
「你知我同晴晴…？」
 
「係佢自己講嘅，原來你地係兩兄妹。」
 
我有啲驚訝，阿妹居然同人講我地嘅關係…自從嗰件事以嚟應該係第一次。
 
「咁咩原因你要起我底？仲有我係A0呀，咁又點呀？」阿妹又係嘅，連我A0都要同人講…
 
佢食完碟上嘅沙律抹咗吓嘴，然後對我笑一笑咁講：「因為我鍾意你囉。」