我地坐晒喺地下,Miss就企喺前面講:
 
「各位同學,經過兩日嘅頻撲,大家都辛苦喇。而家我會宣佈剛才嘅得分同埋兩日加埋嘅總分,最最最重要嘅係大家最關心嗰樣,下年度嘅體育館究竟係邊間學校搶到呢…」
 
之後冇乜好講,因為大家都搶唔到旗。淨係計名牌分嘅話,阿妹學校以31分對我地學校16分,即使連埋尋日野外定向嘅分數,我地都係輸39:50。
 
即係,下年PE堂冇得踩roller。
 
不過呢啲可能係報應,我地學校上年出cheat先贏到,所以今年就輸返。
 




「學校為大家準備咗一啲小食,大家食完就可以返房執嘢,一個鐘之後我地就喺返呢度集合。」
 
Miss講嘅後半句係呢兩日以嚟我聽過最好嘅消息——
 
我!終於!可以返屋企!
 
宣佈解散之後,其他人陸續離去,小悠更加係第一個彈起身走,我準備追上去嗰陣,背後有把聲叫停我。
 
「高田帆!」
 




我轉身,發現係千惠。
 
「晴晴同我講咗喇,你喺背後做嘅嘢。」
 
「唔使多謝我,我咁做都係因為一啲自私嘅理由。」雖然心底裏我都想千惠會贏。
 
點知佢有啲得戚咁講:「邊個話我要多謝你?就算你唔咁做,我一樣可以打贏羅凱撒,將佢支旗同名牌一次過搶過嚟。」
 
佢咁講,我先醒起頭先佢輕易地將名牌由駱以雪身上撕落嚟,再加上佢嘅動作…
 




「咁口響?學過柔道?定係空手道?」我問。
 
「嘻嘻,」佢踏前兩步講:「我唔話俾你聽。」
 
「…算。」
 
「我仲有一件事想同你講。」
 
「嗯?」我心裏祈求,千祈唔好又係麻煩嘢…
 
「掟石仔嗰個原來唔係羅凱撒,係你地另一個副會長,許正峰。」千惠一臉認真咁講。
 
我腦海閃過尋日野外定向嘅畫面,千惠受傷之後,羅凱撒同另一個男仔就喺附近出現。
 
許正峰——亦即係嗰日喺體育館叫我醒醒定定嗰個人。




 
「竟然係佢?」
 
「嗯,佢頭先已經同Miss認咗。」
 
「點解佢無啦啦自爆?」
 
「尋日有人掟石之後,我就偷偷地留意佢地兩個,結果今朝又發生掟石仔事件。因為我成個上晝都跟蹤緊羅凱撒,所以肯定唔係佢做,至少唔係佢親手做。」
 
「…可能係佢叫許正峰咁做?」我愈講愈細聲,因為我忽然諗起頭先俾羅凱撒救嘅一幕。
 
「咁我就唔知喇,不過我聽Miss講,許正峰應該會俾人踢出學生會。」
 
如果連許正峰都走埋,咁POWER咪得返三條友?學校規定學生會至少要有四個人,即係話嚟緊好快會搞補選。
 




「都唔關我地呢啲凡人事架啦。」
 
「哈,你好似唔記得自己點解會嚟咗?」
 
佢一講我恍然大悟,被推薦嚟宿營嘅人都係所謂學生會明日之星,好大機會會被迫補上空缺…
 
「Touchwood !」隔離咁啱有棵樹,我一鎚則落去。
 
「我咩都冇講呀,你自己估架咋?」講完之後佢跳吓彈吓咁走咗。
 
不過原來由尋日開始,千惠一直追查緊掟石仔嘅真正犯人,呢點我真係冇諗過。望住佢背影,我忽然覺得只要佢正正常常嘅話,應該會係個幾可靠嘅女仔。
 
 
已有 0 人追稿