【全劇終】《我喺街執咗個失憶嘅女仔返屋企》: 聯校宿營篇：關鍵之人

為咗儘快離開呢個鬼地方，我連嘢都唔食就返上房執嘢，目標係第一個衝上旅遊巴！
 
終於可以返屋企好好瞓返場覺。
 
定係睇兩集鬼滅好呢…唔好，都係打返一晚Switch先。
 
我一邊計劃今晚做啲咩，一邊推開宿舍房門。
 
小悠居然一早喺度，仲要坐咗喺我張床。
 




「小悠？」
 
佢擰轉面，手上拎住兜士多啤梨食緊。
 
「你咁快返嚟嘅？唔係話有嘢食咩？」明明仲要第一個狗衝。
 
佢略帶失望：「我去到淨係得沙律同生果食，所以咪早啲返嚟囉。」
 
原來所謂嘅小食就係沙律同生果，我直接返嚟果然係正確嘅。
 




但係都唔怪得晒學校，而家六點都未夠，呢段唔嗲唔吊嘅時段又真係幾難諗俾咩我地食，何況我地返到出市區都係七點令，應該好多人會選擇返屋企食晚飯；考慮到我地嘅攝取量，學校淨係俾呢啲我地食都無可厚非嘅…
 
不過，返到去真係要教吓小悠均衡飲食嘅重要性。
 
我由得小悠喺度，開始執拾帶嚟嘅行李。
 
因為我啲嘢唔多（佔最多份量嘅零食已經喺今次旅程中俾小悠KO晒），所以都執得好快，而小悠就喺隔離一邊睇住我執，一邊食士多啤梨食到雪雪聲。
 
執緊嘢嗰陣，我有種對小悠難以啟齒嘅感覺。
 




 
「就算俾你知道又點？」
 
「有時候，知道真相未必係一件好事。」
 
 
羅凱撒講嘅呢兩句，我唔知應唔應該攤出嚟同小悠講。
 
我甚至連小悠知唔知羅凱撒知咁多，都唔係好清楚。
 
「阿帆你食唔食呀？」小悠好似睇穿我喺度煩緊，突然遞咗粒士多啤梨俾我。
 
「…甜唔甜架？」我其實冇咩胃口，不過照問。
 
「嗯嗯！飯堂姨姨話喺山下面每日新鮮摘落嚟架！」




 
我半信半疑，擺咗一粒落口。
 
…又真係幾好食，睇嚟我要對呢度嘅canteen改觀。
 
可能食完之後放鬆咗啲，又或者係見到小悠食士多啤梨食到一面幸福個樣，我忽然有勇氣開口：
 
「小悠，有樣嘢雖然我唔肯定，但都想講咗俾你聽先。」
 
「嗯？」
 
我諗咗好耐應該點表達，最後講：

「羅凱撒佢可能知道關於你失憶之前嘅嘢。」