【全劇終】《我喺街執咗個失憶嘅女仔返屋企》: 被開啟的過往（下）

望吓最後更新，已經係差唔多年半之前。
 
即係話，呢個叫日記嘅file，係阿妹出事嗰排整嘅。
 
我猶疑咗好耐，確定間房冇其他人；而小悠亦都瞓得好冧之後，決定click開嚟睇。
 
阿妹冇set密碼，所以我一撳就開到。
 
望吓總字數，差唔多有一萬字，應該keep住寫咗一排。
 




突然有種心虛感覺，趁未開始睇之前，好唔好都係熄咗佢扮睇唔到算…？
 
不過，當目光觸碰到第一行文字，就好似有不可抗力一樣，令視線不停往下掃…
 
「4月8日 雨
今日係冇返學嘅第八日，因為上網睇到有人話寫日記可以整理心情，所以我想試吓。不過，一旦想要落筆，至發現原來唔知寫咩好。」
 
兩年前嘅4月8號，係嗰件事發生後冇耐。
 
我繼續睇落去。




 
「4月18日 雨
今日係冇返學嘅第十八日，天空連續幾日落住綿雨。早上阿哥帶我去覆診，醫生話如果傷口埋得好，睇埋下次就可以唔需要返去，不過身體上嘅傷口痊癒，唔代表內心都一同復原…」
 
「4月25日 陰
今日係冇返學嘅第二十五日，天空終於冇再落雨。阿哥話學校老師呢幾日不斷打嚟，但係我已經冇勇氣再返去。」
 
「5月4日 陰
今日係冇返學嘅第三十四日，天氣依然非常陰沉。雖然好耐冇出過房門，不過我知道阿哥日日喺屋企陪住我，仲成日隔住道門同我傾計。今日阿哥話嗰班女仔已經停學，我冇特別開心，都冇特別唔開心嘅感覺。」
 




讀到呢度，一種心痛感覺湧上。
 
嗰件事後，阿妹大概有兩個月時間冇返學，我甚至擔心佢從此以後會唔會變成隱青，好彩老豆老母知道之後趕返嚟，嗰班人又退咗學，最後我地花咗唔少心機至令阿妹慢慢喺房行返出嚟。
 
阿妹出事之後，為咗廿四小時喺屋企睇住佢，我都一齊冇返過學，令中三下學期有兩個月都處於缺席狀態。
 
呢份心情唔單止包含身為阿哥嘅責任，更多係出於愧疚同後悔。
 
因為，成件事嘅罪魁禍手係我。
 

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

聽日開始緊接兩個新篇章！