【全劇終】《我喺街執咗個失憶嘅女仔返屋企》: 學生會補選篇：站於台上的數百秒（上）

我坐喺後台，聽住數步之外嘅杜朋也喺台上講嘢。
 
佢講完之後，就到唐夕嵐準備出去。
 
我猶疑咗一陣，同佢講：「加油，唔好輸俾我。」
 
點知佢聽完：「你份政綱咁騎呢，我好難輸俾你架喎～學長～」仲要對我伸脷。
 
如果唔係因為你…！
 




——雖然好想反駁，但呢個場合費事同佢嘈，所以我收皮。
 
「嘖，而家啲10後…」
 
「你同夕嵐係咪發生咗啲事呀？」唐夕嵐上咗台冇耐，小悠忽然問我。
 
「點解咁講？」
 
「我覺得…你地之間相處嘅氣氛，唔同咗？」
 




我抓頭髮：「算係經歷咗啲嘢，啩？」
 
小悠一笑：「阿帆你嘅努力果然冇白費！」
 
畀佢一講，忽然有啲羞恥：「努力？唔知你講咩…」
 
然後，全場雷動嘅掌聲暫停咗我同小悠嘅對話。
 
睇嚟唐夕嵐已經演講完畢，仲要表現得好好。
 




「到你出去喇。」我提醒小悠。
 
「你每次為咗其他人而努力嘅模樣，我都有好好見到。」臨走前，小悠隱約講咗一句（？）
 
上到台，小悠用佢充滿元氣嘅聲線向學校各位sell佢份炸豬扒政綱，淨係聽聲都feel到佢有幾熱情。
 
不過我偷偷望向觀眾反應，佢地個樣變晒（-_-") ，少部分應該都係炸豬扒丼fans就喺度歡呼。
 
見到呢個畫面，我忍唔住嘆氣。
 
然後開始思考，一陣出到去應該講啲咩。
 
小悠跳返入後台之後，台上嘅羅凱撒叫咗我個名。
 
我隨著魚貫掌聲行出講台，至發覺迎接我嘅唔止有掌聲，仲有…橫額。




 
我認得，係頭先叫我加油嗰班宅男。
 
佢地甚至吹住雞，跟埋beat嗌：「4號！」「4號！」「4號！」（4號係我候選編號…）
 
呢一刻，我忽然覺得自己有啲似賽場上嘅賽馬。
 
我稍微舉手，示意大家先靜落嚟。
 
「咳，試咪。」
 
嗰幾個宅男再度起哄，直到我開口：
 
「其實，我唔係好諗到應該講咩。」