【全劇終】《我喺街執咗個失憶嘅女仔返屋企》: 原定誕生日（上）

小悠要走。
 
上次之後佢同我講，完埋呢個學期就會跟嗰個叫紫悅嘅人一齊出發去外地旅行。
 
我偷偷計過，距離學期完結仲有幾耐，然後mark低咗佢正式要走嘅日子。
 
跟住，一切又好似恢復到平常不過嘅平常。
 
照樣返學、上堂、放學、各自返屋企、食晚飯、玩休比、瞓覺…。
 




甚至連嗰日嘅所有嘢，都好似冇發生過一樣，唔知消失咗去邊，不論係我想要同佢告白一事，抑或係佢同我講佢要去追夢嘅事。
 
又或者其實從頭到尾，我同佢之間嘅氣氛都冇改變過，尤其我應該要一早知道，佢冇可能一直留喺呢度。
 
於是，時間一分一秒漏走，身上嘅厚衣愈換愈薄，日照時間變得愈來愈長，春天追逐住冬天嘅尾巴匆匆而過，最後回到我同佢相遇嘅季節。
 
星期日早上，氣溫係31度。
 
我稍作梳洗，然後入廚房準備好二人份嘅早餐。
 




時間啱啱好，上枱嘅時候小悠亦剛好從房間走出，睡眼惺忪對我講：「早晨呀，阿帆。」
 
「早晨。」我簡單回應。
 
食咗幾啖早餐，小悠忽然四處張望：「阿妹呢？點解唔見佢一齊食早餐嘅？」
 
「佢今日要返學校幫手，好早就出咗門口。」
 
「唔…原來係咁，我一陣都會出街，阿帆你唔使等我食晏喇。」
 




「又約咗芝芝？」
 
「嗯！芝芝知道我就嚟要走，話要好好珍惜同我一齊食甜品嘅機會！」小悠一邊食一邊講。
 
換轉係以前，望住佢食到一嘴都係個樣，我會恥笑佢，再講「喺同芝芝食甜品之前，唔該你抹乾淨個嘴先」之類嘅說話。
 
但知道佢冇幾耐之後就要走嘅呢一刻，我笑唔出。
 
就好似芝芝講嘅一樣，我可以做嘅就只有好好珍惜我地之間相處嘅每一秒。
 
「阿帆？」大概係察覺到我諗緊嘢，小悠問我。
 
我趕緊回神：「嗯，我知道喇。其實我一陣都有個地方要去。」
 
「你要去邊呀？」




 
「問嚟做咩？八掛。」我敲一吓佢額頭。
 
今日係個特別嘅日子。
 
每年嘅呢個時候，我都習慣去某個地方。
 
連同阿爸阿媽嘅嗰一份思念。
 
——思緒忽然被小悠驚訝嘅叫聲打斷。
 
「發生咩事？」我問，只見小悠拎住部電話手都震晒。
 
「…啱啱芝芝同我講，佢今日胃痛，所以同唔到我食甜品。」
 




…說好的要好好珍惜一齊食甜品嘅機會呢？
 
當然我冇講出口。
 
「咁點算呀阿帆？」小悠唔知幾時已經變咗淚目狀態。
 
「冇辦法喇，你今日就自己一個留喺屋企啦。」
 
佢猛力搖頭，表情話俾我知要佢喺美好假期困喺屋企，不如直接殺咗佢。
 
我嘆一口氣：「我要去嘅地方…」
 
講都未講完，佢雙眼出現閃光。
 
「真係唔啱你去架。」




 
咁多年嚟，除咗阿妹去過一次咁多之外，我都冇帶過其他人去嗰個地方。雖然呢件事唔係咩秘密，只係我習慣將一年裏面發生嘅事講出嚟，就當係傾計一樣。呢啲咁羞恥嘅事我梗係唔想俾人見到，所以會儘量自己一個人去。
 
望住小悠變返淚目嘅樣，我又開始心軟。
 
算…最多今年去到唔傾計囉。
 
「帶你去都得。」
 
雙眼發光。
 
「你要應承我，去到唔可以嘈，嗰度係一個需要寧靜嘅地方。」
 
佢有啲疑惑，不過更多嘅係雀躍：「知道！」
 




於是，拎住一束鮮花，相隔一年之後再度踏足嗰個地方。唔同嘅係，今年帶埋小悠。