【全劇終】《我喺街執咗個失憶嘅女仔返屋企》: 繁星祭篇：夜間探險（上）

繁星祭嘅準備工作，終於邁向尾聲階段。
 
喺班主任建議下，我地喺鬼屋以外加入咗密室逃脫因素，令成件事變得更刺激。而5E班各人由一開始不情不願，然後半自願，直到而家睇得出大家都係真心投入到件事裏面。
 
冇嘢比咁樣更值得令人開心，相信呢一個都係小悠想見到嘅畫面。
 
時近六點，偌大嘅禮堂只係剩返我同小悠，仲有其餘幾個人喺度作最後嘅關卡佈置。我地用隔板將禮堂整成迷宮一樣，每個區域都要解謎後至可以通往下一關卡，然後好似之前提過嘅咁——我同小悠會喺舞台上扮演鬼中之鬼迎接闖關者。
 
「搞掂，你嗰邊點呀？」我將通關提示置於通道旁；小悠就喺我旁邊整理緊相關道具。
 




「仲爭少少，不過都差唔多。」
 
呢個時候，禮堂嘅另一方傳嚟其他人嘅叫喊聲：「阿飯！我地呢邊搞掂喇，你地嗰邊呢？」
 
我將手弄成擴音器：「我地呢邊仲差少少！」
 
對面好快傳來回應：「咁我地走先喇！」
 
今次換小悠講：「嗯！辛苦晒大家。」
 




一輪講byebye聲過後，四周明顯變得寂靜，剩返小悠整理道具嘅聲音。
 
冇幾耐，佢終於完成手上嘅工作。透過禮堂側邊嘅玻璃窗，可以得知外面天色已經稍暗，我加快收拾書包嘅動作：「搞掂就快啲行啦，學校就快鎖門。」
 
點知小悠搖搖頭：「我仲有啲嘢要做。」
 
「仲有咩要做？」我望向周圍，整個禮堂已經佈置完畢。
 
小悠喺書包拎咗一疊米色信封出嚟。
 




「呢啲係？」
 
「送俾大家嘅禮物。我會偷偷擺喺佢地locker，等聽日繁星祭完咗之後，佢地就會見到。」
 
嗯，聽日就係繁星祭，即係小悠起程嘅日子。
 
我故作輕鬆：「咁我有冇份架？」
 
「阿帆你嗰份，唔喺呢啲裏面。」
 
「咁…」正想追問下去，禮堂大門傳來呼喊聲，「喂！仲有冇人喺裏面？」應該係校工趕人。
 
準備回答嘅時候，小悠突然捉住我衫袖，示意我唔好出聲。
 
「？」我用表情詢問。




 
佢搖頭，將食指放喺嘴前。
 
過咗幾秒之後，外面傳來燈掣開關嘅聲音，禮堂頓時陷入一片黑暗之中。
 
我焦急起來，壓低聲線問：「你個蠢才，想喺學校過夜呀？」
 
小悠冇回答，只係聽到佢細細聲偷笑。
 
校工似乎認為禮堂呢度已經冇人，所以熄燈之後，再從外面鎖上大門。
 
「喂，唔好呀…！」我將手伸向大門，但已經冇用。
 
小悠將耳仔貼到門上，大概係確認緊校工係咪已經遠去。
 




「我地而家點算…？道門要出面先開到架…」
 
「阿帆你諗吓，成間學校冇晒人，我地鍾意做咩就做咩，呢件事一定好好玩…！」小悠打開咗手機嘅電筒。
 
「好玩？我先至唔想喺度過夜…都係打電話叫人嚟開門…」講都未講完，小悠撳住咗我隻手。
 
「我地可以喺側門走，側門可以由裏面開。」
 
我鬆一口氣：「咁都好啲…不過，你個樣話俾我知你唔會咁易離開呢間學校…。」
 
「我一直好想試吓喺夜晚嘅學校探險，你知唔知呀？聽講每間學校都有七大不思議事件架。」
 
「…唔好喇啩？不如你快啲派完禮物快啲走啦。」我背脊開始發涼。
 
「禮物我當然會派，但機會難逢，我想喺走之前留多一個回憶。」




 
聽到佢咁講，我內心開始動搖。
 
「阿帆，你可唔可以陪我？」小悠嘅聲音聽起嚟讓人毫無抵抗力。
 
經過一番掙扎，最後我答應咗小悠嘅請求。
 
 
 ＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

新年快樂～！下次更文會喺出年。