【全劇終】《我喺街執咗個失憶嘅女仔返屋企》: 繁星祭篇：夜間探險（下）

小悠話，聽講呢間學校嘅七大不思議事件分別係（長效消音）。
 
於是，將預備送俾5E班嘅禮物放好喺佢地嘅locker之後，小悠就興高采烈咁拉住我向學校唔同地方進發。
 
七樓廁所、bio lab、美術室（冇錯，係我平時喺裏面畫畫嗰個美術室……）、籃球場隔離嘅花圃…差唔多走勻成間學校，慶幸嘅係冇遇到啲咩怪異事件。
 
但小悠睇起嚟就好開心。
 
「滿意啦？我地走得未？」連續奔波於整個校園，我開始有啲索氣。
 




「唔…陪我去多一個地方。」佢講完又再拉起我隻手。
 
「喂喂…！」
 
佢拉住我由地下一直跑往上層，喺斷氣之前我地終於到咗。
 
佢雙手一推，推開咗天台嘅大門。
 
「點解你會有天台鎖匙？」我抖順條氣之後問。
 




「我問夕嵐借架。」
 
…差啲唔記得學生會有齊呢間學校嘅全部鎖匙。
 
「上嚟呢度做咩？」
 
「上嚟呢度睇風景…！」
 
我忍唔住笑：「你幾時產生咗呢個城市係有風景睇嘅錯覺？」
 




冇佢咁好氣，我求其搵咗個位就瞓低休息，享受初夏帶來嘅晚風；小悠貌似走到一旁，欣賞外邊嘅風景。
 
唔知過咗幾耐，佢走到我隔離一個身位之外躺下，我稍微睜開眼睛，隨即再度合上：「記得嗰次我地都係咁樣瞓喺體育館嘅儲物室。」
 
就喺運動會前冇幾耐，陪佢練習跳高嘅某日。
 
「嗯。」
 
只不過，嗰陣我對佢嘅感覺仲未改變。
 
意識到呢一點嘅我，身體反射性地坐返起身。
 
明明每一晚都同佢喺同一個空間入面瞓覺，我到底突然緊張啲咩…。
 
亂諗嘢嘅同時，小悠嘅聲音將我拉回現實：




 
「好靚。」
 
我回頭：「嗯？」
 
「呢個城市嘅夜空。」佢維持躺下姿勢，眼睛望住上方嘅一片天空。
 
「係咩？我一直都唔覺得靚喎…」我跟住抬頭，眼前只有寥寥可數嘅星星分佈喺天空嘅不同角落。
 
即使係咁，喺呢個地方活咗十幾年，都未試過喺咁清晰嘅距離，冇其他建築物阻擋下睇星星。
 
「…繁星祭，呢個名真係好貼切。」比起同我講，小悠更加似自言自語。
 
「第一次認真去留意天上嘅星星，原來望落去都幾靚。」我讚嘆。
 




「…嗯。」
 
或者其實比起外國，甚至比起小悠即將要去嘅嗰個地方，呢個數量嘅星星根本不值一提，但眼前嘅夜空就只係存在於呢一刻，過後唔會再有，所以我會盡最大努力將今晚嘅景象烙印於心中，我知道小悠都同我做緊同一樣嘢，望住佢嘅表情我就知道。
 
我地就咁樣各自享受住眼前嘅風景，直到唔知幾時小悠叫咗我個名。
 
「嗯？」
 
「其實不思議事件唔只七件，仲有第八件。」
 
對於佢突然帶起嘅話題，我感到迷惘：「第八件？」
 
「嗯，而且阿帆應該會好想知道。」
 
諗起頭先喺樓下探險嘅氣氛，背脊依然殘留一絲涼意：「你唔會話俾我聽係我地班房啩？」




 
佢搖頭笑：「唔係我地班房。」
 
「咁關於啲咩？」
 
「關於閃靈現象，你聽唔聽？」望住眼前嘅呢雙瞳孔，我分唔清佢嘅笑容究竟係真實抑或虛假。