【全劇終】《我喺街執咗個失憶嘅女仔返屋企》: 繁星祭篇：離別之日（二）

大概係被密室解謎＋鬼屋呢樣嘢吸引到，禮堂嘅人流比起以往淨係整幾塊board嗰陣明顯來得多。我同小悠就留喺主舞台以恐嚇來訪者為樂。
 
或者被四周圍嘅氣氛感染，我暫時忘記咗今朝嘅心情，全心投入到當前角色裏面，就係咁一個上午過去。
 
到咗下午嘅時候，有個不速之客突然造訪——
 
「救命啊！救命啊！」
 
隔住面具望過去，發現係肥仔杜朋也，佢慌慌張張跑緊過嚟。
 




緊隨喺後面嘅係舉住部電話嘅夕嵐同埋來勢洶洶嘅駱以雪。
 
「各位，我地學生會為你直播如何快速通過5E班喺禮堂整嘅密室解謎…只係過咗5分鐘，我地就由入口一口氣嚟到最後一關…」夕嵐對住部電話自言自語。
 
呢個舉動省卻咗我開口問嘅工夫，都知道佢地係嚟視（踩）察（場），仲要開埋直播。
 
眼見面前有三個期待已久嘅獵物，我精神馬上為之一振，先匿埋喺舞台死角，再趁佢地唔為意嘅時候彈出嚟。
 
我同旁邊嘅小悠打眼色，夾定出場時機。
 




然後，抓緊肥仔喺面前經過嘅一瞬間，向佢發動喪屍式咆哮——。
 
「救命啊媽咪啊——」呢招對肥仔似乎非常有效，成功嚇到佢嗌媽咪之餘，雙手奮力一扯…
 
將我扯咗去緊隨嘅駱以雪度。
 
或者我應該要覺得幸運，因為唔係有個人做緩衝嘅話，我恐怕會成個人撼埋牆。但我相信更多嘅係不幸，因為嗰個幫我做緩衝嘅人係駱以雪。
 
睇佢嬲到青筋暴現嘅樣，我開始後悔比起同佢產生身體接觸，我應該直接撞埋牆算。
 




「對…」正想將對唔住講出口，突然諗起我係戴住面具，冇人睇到我個樣。換句話講，而家出聲絕對係自掘墳墓。
 
「1號！！你點呀？？」來自小悠嘅慰問。對於佢喺呢個關鍵時刻冇選擇用真名叫我，我表示相當感謝。
 
「你 個 杜 朋 也！！！」駱以雪fing開我之後，厲眼轉向肥仔，然後係一吓無情嘅右勾拳。
 
「對唔住啊副會長！」肥仔發出淒厲慘叫，彈飛開去。
 
「就喺頭先我地嘅其中一個成員受到攻擊，彈飛十呎！」夕嵐一邊舉住部機，一邊追隨肥仔嘅移動軌跡。
 
「呢啲唔使喺直播度講…」聽駱以雪把聲，頭先嗰拳應該未洩到佢心頭之恨。
 
「一 日 都 係 你！！！」肥仔好快爬返起身，助跑幾步之後，朝住我所在嘅方向跳起——
 
右腳俾佢一腳踩中，發出至今為止程度最為強烈嘅痛楚。




 
「…你個死肥仔。」慘叫聲過後，我感覺眼角流咗兩滴淚。
 
「呢把聲…」駱以雪雙眼閃過一道冷光。
 
呢個時候，小悠趕到我身前：「你聽錯喇！」
 
突然有種不祥預感，點知下一秒即刻化為現實——
 
「佢唔係阿帆嚟架！！！」響徹成個禮堂，來自豬隊友嘅神助攻。
 
小悠嗌完之後，周遭嘅空氣凝結咗兩秒。
 
打破沉默嘅係肥仔：「係咁先喇！」然後一支箭往出口狂奔。
 




「…唔會俾你走！」我拖住半廢嘅右腳試圖追上，可惜領口被駱以雪一手抆起。
 
「等我幫你追！」小悠如夢初醒一樣，好快跟住肥仔冇咗影。
 
現場得返表情有啲不知所措嘅夕嵐、處於憤怒臨界點嘅駱以雪，同埋被佢捉住衫領嘅我。
 
「原來頭先撞落我度嗰個係你…」
 
「頭先…係意外…」我用盡最後一口氣為自己辯護。
 
「唔好意思呀咁多位，俾大家睇咗一場鬧劇添，今次嘅直播就到此為止，有興趣嘅話記得嚟體驗吓由5E班主理嘅鬼屋喇——」伴隨夕嵐尾音嘅係直播完畢嘅提示聲。
 
「啱喇，跟住落嚟嘅畫面唔適合直播俾全校睇…」一下一下嘅啪啪聲喺駱以雪指間漏出。
 
「喂喂，冷靜啲…」我一路後退，直到掂到牆壁。




 
「…師父！！！」之後我嘅遭遇大概唔需要再描述，從夕嵐嘅呢個反應已經略知一二。