【全劇終】《我喺街執咗個失憶嘅女仔返屋企》: 繁星祭篇：離別之日（三）

慶幸嘅係，駱以雪好快被夕嵐制止兼帶離現場，我得以避過命喪禮堂嘅命運。
 
同一時間，小悠都返咗嚟：「結果都係俾朋也走甩咗…」
 
「仲好講！頭先唔係因為你嘅話——」望到小悠因為幫我追肥仔搞到喘晒氣，我忽然講唔落去。
 
「算啦。」取而代之，我喺舞台後方拎咗兩支水，向佢拋出一支。
 
我坐咗喺舞台上面，除低面具，補充全日落嚟嘅水分。
 




小悠就坐喺我隔離，與我作出相同嘅舉動。
 
確認而家嘅時間後，我鬆一口氣：「就嚟散場，我諗冇人會睇完學生會頭先個直播之後，真係走嚟架可？」
 
繁星祭喺今日六點正結束，所以五點幾嘅呢一刻開始陸續聽到校方嘅廣播，提醒我地要準備收拾物資。
 
而計劃好嘅意外驚喜（製造停電假象，再成班人彈出嚟嚇小悠一跳），亦都邁向準備階段——我同張廷宇夾好，到咁上下時候佢就會熄禮堂嘅燈掣。
 
我嘅任務，就係拖延小悠唔好俾佢離開舞台範圍。
 




「呼…」小悠將飲完嘅空樽放喺旁邊，「今日真係好攰。」
 
「你講得啱。」講完之後，由繁星祭嘅準備工作開始所累積落嚟嘅疲累感好似一下子爆發出嚟。
 
「不過我好開心。」
 
「開心就好。」
 
禮堂一啲聲都冇，我諗嚟玩嘅人應該走晒。
 




「我真係好鍾意呢個地方。」過咗幾秒，小悠講。
 
我唔知佢指嘅呢個地方，係禮堂、學校，抑或係其他意思，不過喺問之前，佢已經俾咗答案我。
 
「雖然呢度嘅空氣真係好差，物價又高得離譜，政治更加係腐敗到令人絕望。」
 
「喂喂，你使唔使講到咁盡…」
 
「不過正因為喺呢個地方，我至會同大家相遇。」
 
我笑：「你所講嘅大家，應該要包括埋繽紛樂。」
 
「嗯，你講得啱。」小悠回我一個微笑。
 
我雙手向後撐喺地上：「唔知你要去嗰個地方有冇得賣繽紛樂？」




 
「就算有冇都好，我會買好多好多帶過去…！」
 
「咁你啲行李一定超重喇。」我笑。
 
「你知唔知呀？尋日我開始執行李先發現，原來自己根本冇嘢可以帶走，除咗休比之外。」
 
「點會呢？屋企啲零食夠你塞爆幾個喼。」
 
「嗰啲我唔要喇，留俾你同阿妹。」
 
「仲有，其他人送俾你嘅嘢，你唔係諗住唔帶走吓嘛…」我搲吓塊臉講。
 
然而，小悠明顯唔理解我意思：「其他人送嘅嘢？不過我好似好少同芝芝互相送禮物…。」
 




「我唔係講緊芝芝…。」
 
我指嘅係上年學生會補選前後，我開始畫返畫之後送俾佢嘅禮物——雖然佢八成已經唔記得咗件事…。
 
「都係冇嘢…」講到一半，我被小悠充滿氣勢嘅聲線嚇窒：

「我記得喇！你講緊選完學生會之後，你送俾我嗰幅畫？」
 
我再次搲吓塊臉：「…嗯嗯。」
 
「哦…擺咗喺邊呢？應該唔會唔見咗？」佢自言自語起嚟。
 
「咩話？！唔見咗？！」
 
「哈哈，你太大反應喇。」居然俾佢輕鬆帶過，搞到頭先反應過度嘅我成個傻仔一樣…




 
不過又係嘅，一張畫啫，又唔係啲乜嘢寶物…。
 
「咳咳、冇事。唔見咗咪唔見咗囉，反正嗰陣我都係求其畫。」為咗掩飾發熱嘅雙頰，我重新蓋上面具。
 
面具被戴上嘅一刻，附近傳嚟「喀嚓」幾聲，禮堂頓時陷入一片黑暗。
 
「…咩事呀？停電？」小悠有啲嚇一跳。
 
「睇怕係嘞。」
 
「咁我地快啲睇吓出面點啦…！」小悠正想起身走嘅時候，我拉住咗佢：
 
「應該係小問題，好快會著返燈，不如我地坐喺度等陣先。」
 




佢冇講啲咩，冇幾耐就坐返低。
 
一切暫時按計劃進行，淨低嘅只有等同班嘅人聚集到禮堂。

================================================

溫馨提示：如果唔記得阿帆送過啲咩畫俾小悠，可以參見《學生會補選篇：禮物》