【全劇終】《我喺街執咗個失憶嘅女仔返屋企》: 尋找希望（十二）

一整夜，我握實高田帆送俾我嗰幅畫入睡。
 
然後，久違地喺閉上雙眼後依然感到安心——嗰種感覺就好似以前希洋仲喺度一樣，就算黑夜籠罩四周，但內心半點懼怕都冇。
 
去到第二日，紫悅話俾我知羅凱撒尋日喊咗一晚，因為佢唔見咗我冇幾耐之前寫俾佢嘅一封信。
 
「咁佢而家點呀？」我問。
 
「仲喊緊，話尋晚拎完出嚟之後，就唔知放咗去邊。」我從紫悅嘴裏聽到。
 




我無奈地笑：「你同佢講唔緊要，我可以隨時再寫俾佢架嘛。」
 
但紫悅搖頭：「我諗冇咩機會喇，因為撒仔都就嚟要走，返去準備開學。」
 
「…咁快，」一諗到唔知幾時先可以再見到佢，我就有啲唔捨得，但我隨即想到：「不過我可以寄信俾佢！」
 
「嗯，撒仔收到一定好開心…」話音剛落，紫悅嘅目光就落喺我手裏面幅畫，「呢幅係…畫？」
 
「嗯！」我微笑答道。
 




「都唔似你畫嘅，邊個送俾你架？」
 
我望住畫裏嘅女孩同休比：「係嗰個叫做高田帆嘅男仔。」 
 
「咁樣講起嚟，我記得撒仔同呢個高田帆…好似住得幾近？」
 
「真係嘅？」我一時喜上眉梢。
 
尋晚高田帆走咗之後，我先發覺原來唔記得問佢我地會唔會再見。而家知道佢同羅凱撒住得好近，話唔定以後羅凱撒再嚟渡假嘅時候，高田帆都會跟埋嚟。
 




而且除咗名之外，我終於知道多一樣關於佢嘅事。
 
紫悅點頭：「嗯，就喺卯月以前住嘅城市裏面。」
 
空餘嘅時候，卯月時常會對我講有關世界各地嘅事，然後不知不覺就會將話題帶到去自己出生同成長嘅地方——對於從未踏離過呢座小島嘅我嚟講，佢嘅一字一句都牽動住我內心。
 
而咁樣嘅地方曾經有卯月之外，原來仲有高田帆。
 
「我想去一次。」
 
「唔？」紫悅好似聽到外星語言一樣，帶點疑惑。
 
「我話…我想去一次，嗰個地方。」
 
紫悅嘅表情一下子嚴肅起來：「唔得。」 




 
「但係…」我還未講完，已經被紫悅嘅聲音嚇倒——
 
「唔好咁任性喇，你知道太太唔會俾你離開呢間屋半步，更何況係去地球嘅另一邊。」
 
我垂頭，腳跟上的鎖鏈映入眼簾：「呢樣我知道。」
 
「所以，你都係諗吓好喇——唔係，應該係話發夢都唔好諗。」然後，紫悅望向窗外，「係時候修剪吓外面嘅花草，你休息多一陣就準備上堂喇。」 
 
一想到接下來又要對住刻板嘅家庭教師，內心鬱悶一湧而上，但我只能對紫悅點頭：「嗯，知道。」
 
紫悅走咗之後，我望住畫裏面嘅休比：「休比，如果有機會嘅話，我真係好想去一次。」
 
好想再見到高田帆。
 




隨著時間流逝，呢種心情變得愈來愈強烈；我每一日都喺度期待高田帆會再到訪呢間屋，但望住窗外一成不變嘅風景，學到嘅道理只係希望愈大失望愈大，高田帆一次都冇再嚟過。有關佢嘅回憶，就好似只係剩低手上嘅畫一樣。
 
然而，咁樣都無阻我成日去諗關於佢嘅事，雖然除咗佢個名，仲有佢住嘅地方、佢鍾意畫畫之外，我對佢一無所知。但我習慣想像有關高田帆嘅一切：自從上次見面之後，佢個樣同把聲有冇改變；除咗畫畫之外佢仲鍾意做啲咩；又或者，畫入面個女仔點解對佢咁重要。