【全劇終】《我喺街執咗個失憶嘅女仔返屋企》: 故地重遊（下）

行到去雪糕店，先知今日又有買一送一優惠，我同小悠順勢一人一支，然後好自然諗返起上次嚟嘅經歷——
 
嗰次我同小悠以測試閃靈現象為名，各自各喺遊樂場呢度on99玩咗半日，嗰陣嘅雪糕都係買一送一，只不過食唔晒兩支嘅我最後冇買到，結果臨走前小悠拎住兩支雪糕出現…。
 
「有樣嘢我唔係幾明。」食住雪糕嗰陣，我講。
 
「嗯？」
 
「你話閃靈現象係你貪玩老作嘅，但係點解次次注意到之後你已經失驚無神咁彈咗出嚟，就好似真係識憑空出現咁…。」不論係佢跟住我返屋企嗰次，抑或係上次嚟遊樂場嗰次。
 




「哦，因為我一直跟住阿帆囉。」小悠輕描淡寫咁解釋，「上年暑假嗰次我都未食完杯麵你就跑走咗，我咪即刻跟喺你後面，用埋身上唯一嘅錶嚟收賣陳伯，叫佢扮睇我唔到。」
 
「真係俾你玩殘…。」
 
「仲有上次嚟呢度嗰次，我預先匿埋喺附近，等到你出現嗰陣再彈出嚟嚇你！」
 
「唔怪得上次食嗰支雪糕係溶Q晒…，我諗你都企咗幾耐吓…。」
 
「嗯！所以今日我好開心食到冇溶嘅雪糕！」
 




聽佢講完呢句，我停下腳步。
 
小悠冇察覺到我停低，幾步之後至回頭叫道：「帆？」
 
將手上嘅雪糕一口氣盡吞之後，我深呼吸一下：「…我想問你一個問題。」 
 
「嗯？」
 
「今日嚟呢度玩完之後，你有冇…」我喺腦海中組織一次話語，「變得…鍾意自己多一啲？」 哪怕只有少少都好。
 




小悠諗咗一陣，用手指比劃出一個好細嘅範圍：「唔…我諗有咁多？」
 
我模仿佢嘅動作比出拇指同食指，同時一陣失望：「只係得咁少？」
 
小悠突然跑前幾步，然後再度回頭：「不過終有一日，今日嘅咁多會變成好多好多！」同時用手誇張地比劃出大細。 
 
我笑：「咁到時你咪會變成一個超級自戀狂？」
 
佢跟住一齊笑，然後應道：「為咗嗰一日嘅到來，我會努力。」
 
「…咁，我都會…喺相應部分上面努力。」逐漸發燙嘅耳根使我九唔搭七。
 
「…相應部分？」
 
「就係做好學生嘅本分，同埋…」前半句只係煙幕，用嚟分薄跟住落嚟嘅羞恥感，「…為咗令你得到幸福。」




 
我唔敢望小悠嘅表情，只係一直盯住旁邊。
 
兩秒之後，前方傳來小悠嘅聲音：「哦～」
 
我踏前兩步：「我鼓足勇氣講嘅一句嘢，竟然換嚟你求其一句哦…。」
 
只見小悠將餘下半支雪糕光速塞入口，然後用手背求其抹走從嘴角滲出來嘅白色液體（溶化嘅雲呢拿雪糕）：「…#$&@%*#$&@*!」
 
「…你噏乜？」
 
佢花咗啲時間將嘴裏嘅東西吞下：「…我話我好肚餓，要去買多支！」
 
我指一指自己嘅嘴邊，示意佢嘴上仍殘留未抹乾淨嘅雪糕痕跡。
 




佢以手背胡亂地往嘴部狂抹，望住眼前畫面我忽然諗起休比洗面時候嘅樣，同小悠而家有90％相似，令我忍唔住笑起上嚟。
 
「…就咁！拜拜！」留低呢句，小悠又跑返去雪糕店嘅方向。
 
留喺原地嘅我低聲吐槽：「一如以往咁有活力，仲要好識破壞氣氛…。」
 
不過，咁樣都係好事嚟嘅。
 
我伸個懶腰，遠望前方正有不知名雀仔飛過嘅天空。
 
然後，時間流逝——。
 

=====================================================
下集最終回，多謝支持到呢度嘅大家！