「做咩咁灰呀?」隔了幾天Elven看見Rachel MSN名字旁邊多了個”灰”字所以問道。
 
Rachel:「同男朋友啲問題, 琴晚真係好好好好唔開心… 不過依家好啲 lu。」
 
Elven: 「咁有無需要搵人傾下?」
 
Rachel:「越黎越覺得近排大家好似見到都無乜野講咁,有時佢一無mood, 對我就會好冷淡…」
 
Elven: 「你地其實一齊咗幾耐? 係咪近排先係咁?」
 


Rachel:「啱啱過咗一年lu, 以前未一齊嗰陣多好多嘢講㗎, 差唔多晚晚我地都會講電話。」
 
Elven: 「咁有無同佢傾過哩個問題?」
 
Rachel:「未呀,驚佢覺得我煩會發脾氣... 」
 
「點會因為咁發你脾氣呀傻瓜, 有問題就要講同解決㗎啦。 兩個人一齊, 如果大家成日收埋收埋乜都唔講, 積下積下有日就會爆, 有時一爆就一發不可收拾, 然後講咗好多傷害大家嘅說話, 到時段關係就會受到傷害未必咁易救得返㗎喇... 
 
我覺得兩個人相處, 坦誠係好重要,唔係大家可能都唔知大家真正嘅諗法然後產生誤會,特別係你地依家生活圈子都唔同咗, 好多野可能互相都會唔理解同改變咗。 佢係你男朋友嚟㗎嘛, 咁錫你點會因為咁嫌你煩發你脾氣呢? 比啲信心佢啦!」Elven忍不住分享了自己的看法去安慰和鼓勵Rachel。
 


Rachel:「知道喇… 我諗我冷靜一兩日會好啲 嘅...  不過你好似好有經驗咁喎!」
 
「哈, 我啲經驗好失敗㗎, 做反面教材就差唔多,所以其實都無咩資格比意見你…」想起Ada Elven就想起自己的失敗。
 
Rachel:「點會無資格呢? 你係我師傅嚟㗎嘛! 不過我都聽Susan講過你之前同一個拍咗好耐拖嘅女朋友散咗,但內情係點我就唔知了... 」
 
「我哩啲不值一提㗎,有機會先講你聽下啦,依家轉話題唔好再講啲唔開心嘅嘢!」Elven始終不太願意提起Ada的事。
 
Rachel:「好啦,後日就第一場比賽了, 好緊張呀我...」
 


Elven: 「係喎, 唔駛驚呀,大家對你都好有信心!」
 
Rachel:「我真係好驚…你明天晏晝得唔得閒呀?」
 
Elven: 「朝早上完堂後應該無野做,係到黃昏先要練波, 做咩?」
 
Rachel:「想約你食lunch呀~」
 
Elven: 「好呀, 等為師同你定下驚啦~」
 
Rachel:「多謝師傅!」
 
 
第二日Rachel和Elven約了在大學附近一間西式餐廳共進午膳。 講完了一堆無聊話題後, Rachel又開始為明天的比賽而擔憂。
 


「其實我真係好驚好緊張呀, 第一次出場就正選, 好驚有失誤...」Rachel帶點擔憂地說道。
 
「唔駛咁驚失誤喎, NBA啲球星都會場場有失誤啦~  你越在意反而就會越多失誤㗎喇...  我以前其實都成日turnover, 之後每次練習我都同自己講, 今日唔可以多過3次turnover。 一開始係會好小心就住就住變得好唔果斷,但慢慢習慣咗就會回復正常, 之後唔駛特別注意都少咗好多失誤喇。」Elven分享自己以前的經驗。
 
「講就易, 希望到時唔會怯場啦...」不過對Rachel作用似乎不大。
 
「我有無同你講過我喺由幾時開始比賽完全唔會緊張同怯場?」Elven又想起另一次經驗。
 
Rachel:「無呀!」
 
「故事要返返去中六果陣校際音樂節笛隊嘅小組比賽, 嗰陣我其實己經有好多比賽經驗, 但有時喺人多嘅地方表演或者比賽, 我都仲係會有少少緊張。 嗰日比賽演奏完一次後,大家覺得表現都還可以, 但就一定唔係最好嘅表現, 未必入到三甲。 點知去到最後隊隊都演奏完後, 評判竟然要求我地要再吹奏多一次。
 
嗰次唔知點解, 大家都無晒壓力, 純粹係享受舞台, 越吹感覺就越好~ 雖然最後都係輸咗比最尾出場嗰隊, 不過帶隊老師就話我地第二次其實比第一次吹得更好, 只係因為裁判要判邊隊第一, 所以第二次嗰陣就好集中咁搵我地錯處, 捉到一個我地就輸了…
 
但好神奇, 自從果次體會過純享受嘅感覺後, 之後我喺人多地方面前比賽又好, present又好, 都唔會再緊張。 不過嗰次其實都係我最後一次喺台上吹笛lu~」Elven分享了他以前的一件往事。


 
Rachel:「好攪笑呀, 好似啲武俠小說經歷過啲奇遇後就學咗一身好武功咁!」
 
Elven: 「你咁講又真係有啲似喎… 事後我都有研究點解第二次心態會咁唔同,諗返其實人緊張主要都係因為兩個原因。 第一個係因為你著重結果有咗得失嘅心所以會驚, 你可以幻想下如果你完全唔著緊個比賽嘅輸贏, 其實比賽嗰陣你係唔會緊張㗎。
 
第二個係因為你自信心不足, 試諗下如果你對自己好有自信, 對自己Present嘅題目完全掌握, 覺得無人會熟得過你唔驚人問問題, 其實你都唔會點緊張,因為你好有信心知道自己唔會唔識答問題。
 
嗰陣第二次上台唔緊張, 應該係因為大家都覺得賺多咗次上台機會, 其實己經係評判對自己的肯定,至少應該係入到三甲佢先會咁要求。 嗰刻真係覺得輸贏都唔重要, 反而想好好享受大家最後一次嘅合奏,所以就變咗完全無壓力 。 」
 
「嗯...」Rachel聽畢還在努力消化Elven的說話。
 
「不過講返轉頭音樂同運動又唔同嘅, 音樂著重意境而唔應該有爭勝之心, 但運動就要對勝利有執著先可以發揮到120%的力量。 如果我唔著重輸贏, Aquatic meet果次我無可能游到最後嘅成績。 所以運動又有啲調返轉, 當你滿腦子都係要贏, 哨子聲一響其實你個心就無位置再去緊張。
 
當然,咁一切都要有你相應嘅實力support啦。 所以返返轉頭, 其實都係嗰句"practice make perfect"。 當你緊張嘅時候, 你就深呼吸一下, 諗返自己有幾辛苦咁練習, 只要你自信比任何人都努力, 又邊有可能會輸? 然後你就唔會再咁緊張㗎喇~ 
 


再講,其實不斷練習某程度上都係訓練緊我地個人喺緊張嘅時候可以有返幾多成正常嘅表現。當你越熟練,就算緊張對你嘅影響都會越細,因為你個身體已經記住個動作有晒意識會自然比反應。哈, 好似好老土, 有講等於無講咁添…」見Rachel似懂非懂咁Elven又再補充。
 
「係好老土, 但唔知點解出自你把口我覺得好有說服力, 哩家好似真係無咁驚了!」望著一臉認真的Elven,Rachel覺得自己都有少少被對方感染到變得有自信起來。
 
「加油啦, 你得㗎!」
 
Elven不自覺把右手放在Rachel的頭上輕輕拍了兩下, 然後說了句 。