雖然五年前Elven和Rachel在攤牌後便沒有再怎樣聯絡,但或許雙方都不希望這段關係以破裂為終結,所以他們並沒有在facebook unfriend 或者block掉對方。
 
不過由於Rachel在facebook本身也是做CD-ROM多,最多只會偶爾post一些食物相,所以Elven從facebook那裏基本上也不會得到她的甚麼近況資訊。而這個五年來第一次的like,讓Elven不期然想︰
 
這是不是代表Rachel已經原諒了自己?
 
 
這個問題一直困擾了Elven數天,而在數天後,Elven最終還是敵不過自己心入面的渴望send了一個message給Rachel,這時他才發現原來他們對上一個message已經是三年前他send給Rachel的Happy Birthday。
 
 


Elven:「Hi,how are you?」
 
縱使10分鐘後他便收到Rachel的回覆,但這十分鐘對Elven 來說卻緊張得像經過了10個鐘,每隔數秒便忍不住望一望自己的電話,生怕miss了對方的reply。
 
Rachel:「Ok la, u?」
 
Elven:「無穿無爛咁啦,不過聽落你好似唔太好咁喎…」
 
Rachel:「Why?」
 


Elven:「因為你句ok la嘅語氣好似灰灰地咁…」
 
Rachel:「haha 咁都睇到語氣?  Not not good la, just nothing special」
 
Elven:「Btw, 我前排跑步都經過你屋企附近。」
 
Rachel:「Really? 其實我琴晚都夢見自己返大學見到你。」
 
「竟然? 唔係夢見我打波掛~」 這刻Elven有點開心和意外,原來Rachel還會夢見自己。
 


Rachel:「哈,我都唔記得你做緊咩喇。」
 
「咁多年無見你應該直程唔記得我咩樣添啦…」Elven帶點心酸答道。
 
Rachel:「係呀,唔記得喇。」
 
Elven:「我其實前幾日都夢見你。」
 
Rachel:「夢見我咩?」
 
「夢見同你做返好朋友,好似返返以前咁多嘢講。」Elven鼓氣勇氣如實答道。
 
Rachel:「都真係好耐之前喇… 係喎,聽聞你拍緊拖?」
 
「聽聞你就結婚喎。」Elven潛意式不想向Rachel承認自己拍拖,所以就把目標轉回向Rachel。


 
Rachel:「聽邊個講? 流料喎...  Susan?」
 
「唔係佢仲有邊個? 傳聞你地係教會下一對熱門人選~」事實上這確實是Elven為了逃避Rachel的問題而作出來的,順便試探一下Rachel和男朋友的關係以及進展。
 
「邊有啲咁嘅事,喂,你逃避我問題喎。」不過Rachel並沒有讓Elven得逞。
 
「哈哈 係呀。」沒法逃避Elven只好承認然後再以哈哈遮醜,不過Rachel沒承認自己和男朋友好事近亦確實讓Elven的心情多了點歡喜。
 
Rachel:「咩女仔嚟㗎?同學?」
 
Elven:「唔係啦,朋友嘅朋友嚟。」
 
Rachel:「icic! Does she know me?」
 


Rachel的問題讓Elven感到愕然,因為這問題無疑代表Rachel是知道她在自己心目中有特殊地位,不然她怎會覺得Elven有機會跟女朋友談起她? 至於這問題的出發點是純粹好奇還是一種試探,Elven這刻便不得而知了。
 
「Yes ar, she knows I like a girl very much long time ago…」Elven沒有說謊,因為在認識初期他便向對方透露過自己的過去,或者是想給對方一個心理準備對方永遠不會是自己心裏的no. 1。
 
Rachel:「Actually I want to say, I have changed a lot la, not the girl you know anymore,not as good as you imagine…」
 
Elven:「其實我都知我實係美化咗你… 不過差別我相信又唔會太大嘅~」
 
Rachel:「一定好大!  同埋我真係變咗好多喇…」
 
Elven:「咁我又真係無從得知, 咁耐無溝通,比較唔到喎...」
 
Rachel:「咁都好,唔好破壞我喺你心目中嘅印象~」
 
Elven:「放心,唔會,你喺我心目中永遠都係女神級嚟㗎喎~」


 
Rachel:「呀... 咁反而應該要破壞下… 唉,你美化得真係太誇張喇…」
 
Elven:「做咩變到咁無自信呀…咁你同男朋友點呀?」
 
Rachel:「幾好呀,不過中間都有嘈過交分過下手咁,但只係好短暫。」
 
(原來真係散過… 如果當日無離開,我係咪就有機會呢?) 聽到這消息Elven不期然又想。
 
「竟然? 其實之前有時我都會諗如果我早啲識你,或者真係一直等等到你地有日散,自己會唔會有機會呢?」Elven提出自己心中一直的疑問。
 
Rachel:「唔會! 我地真係唔match㗎…」
 
「唔駛咁快答得咁決絕掛,好hurt㗎嘛~」Rachel的答案就像一記重拳打在Elven心口,但Elven只能裝作沒事和不在乎。
 


Rachel:「最主要係我犯賤,對我太好我唔鍾意的。」
 
Elven:「不過我都覺得你係一鍾意一個人就會比佢食住…」
 
Rachel:「you know me so well! 不過我都好肯定如果同你一齊我實會恰死你…」
 
Elven:「哈,你恰極都唔會太離譜啦。」
 
Rachel:「我真係無你諗到咁好㗎!」
 
Elven:「知喇知喇,不過我估哩段時間都有大把男仔approach你啦~ 」
 
Rachel:「no wor… I think you are the last one interested in me…」
 
「!!!點會呀?」Elven不相信。
 
Rachel:「真係無喎… 我個圈子都多數係girls only,而且多得你,我都唔敢再同男仔咁熟啦... 無乜新朋友,同事都係唔係女仔就uncle…」
 
Elven:「咁你男朋友真係要多謝我喎…」
 
Rachel:「haha 但我唔會多謝你囉… 不過諗返之前,其實都覺得自己對你好衰…」
 
「咁客觀啲講,你嗰陣都無其他辦法嘅,我冷靜過後諗返,知道你對我絕情其實係想我好啫…」這幾年Elven確實一直是這樣認為。
 
Rachel:「你又美化我… 有啲位我其實真係唔應該同你咁熟…」
 
「咁有啲野係整定嘅… 或者嗰陣我地係互相需要大家,所以好自然會靠近對方,到需要完咪分開囉…」Elven又想起落花流水這首歌。
 
「點都好,希望你同你女朋友開開心心,幸福快樂啦~」這時Rachel亦決定不再糾纏在這問題上。
 
Elven:「多謝,不過點都好,你都一定會係我一生其中一個遺憾㗎喇…」
 
Rachel:「所以唔好諗咁多,我唔想再一次令你失望呀,ok? 希望你以後都唔會再有新遺憾啦!」
 
Elven:「知道喇!」
 
 
就這樣,Elven和Rachel又開始重新有了聯絡,雖然只是很間中的閒談,但這結果卻是Elven事前從沒預想到的。