2050年 香港
 
因為女兒思雅剛結婚搬離了屋企,已經年屆60歲的Rachel正努力執拾家裏的雜物,而當打開其中一個封滿塵的膠箱時,她看見了一本久違了的畫冊。
 
(Elven…)
 
心血來潮,Rachel翻開了這本畫冊一頁一頁地讀著,嘴角不時露出淡淡的笑意,直至看完整本畫冊後卻又露出濃濃的哀傷。
 
(不知不覺你都離開咗已經30年,如果有輪迴,下一世嘅你應該都夠年紀成家立室?)
 


這時兒子天佑剛回到家看見母親正拿著本畫冊愁眉不展的樣子,心底裏明白到底是甚麼一回事。
 
 
30年前,Rachel和Daniel結婚後不久便發現了Daniel疑似有出軌的跡象,正當她糾結要不要和Daniel攤牌的時候,卻發現自己懷孕了,而且還是龍鳳胎。經再三思量後因為希望BB能有個健康的家庭成長,同一時間亦希望BB會令丈夫生性回頭是岸,所以她最後選擇了沉默。
 
初時,她以為自己成功,因為Daniel對她和BB也很好,直至BB 一歲多時,一個女人找上門把一切都催毀了,因為這個女人告訴她自己亦懷孕了,而且她和Daniel原來早在很多年前已經發生了關係,只是Rachel一直不知道罷了。
 
深受打擊的Rachel只能選擇和Daniel離婚並獨力撫養兩個孩子。幸好兩個孩子很乖讀書成績亦很好,而在他們升上中學時Rachel終於把和父親的事告訴了他們,這讓兩個孩子對母親更是疼惜。不久,兩兄妹有一次藉著母親不在的時候在家裏搗亂,把所有雜物散到整屋都是,但那時一本畫冊卻突然吸引了他們的注意,兩兄妹於是停止了搗蛋並一起閱讀著這本畫冊。
 
「原來媽咪讀大學嗰陣有個咁嘅故事? 唔知哩個Elven係乜水,依家去咗邊呢?」看完後朱天佑首先說道。


 
「好浪漫呀… 淨係睇哩本書都知個Elven幾有心思啦! 阿媽嗰陣咁蠢㗎,有個咁好嘅男仔唔要走去揀嗰個衰人老豆!」朱思雅看完後則變成了心心眼,陶醉於美好的幻想世界之中。
 
「朱天佑,朱思雅, 攪乜呀你地兩個! 係咪想死?」 這時Rachel回到家打開門看見兩個孩子的”戰績”,完全壓抑不了自己的怒火咆哮道。
 
知道自己闖下大禍的兩兄妹立刻一左一右走到母親旁撓著她雙手開始使用大絕。
 
「阿媽唔好嬲啦,我地諗住順便執下屋嘛,我同阿哥一陣會執返好晒啲嘢㗎喇~」朱思雅首先撒嬌道。
 
「係呀,我地會執返好㗎,包保之後整齊過之前!」朱天佑再幫手補鑊。


 
兩兄妹說完扶著母親坐到梳化上後便開始執拾,隔了一會見母親火已下後朱思雅終於忍不住問道
 
「媽咪,到底邊個係Elven呀?」
 
聽到Elven這名字,Rachel的身體震了一震,本身想問她們為何知道這個名字,不過想起剛剛散落滿地的雜物便估到原因了。
 
「Elven係媽咪以前一個好好嘅朋友…」
 
「咁佢依家去咗邊?好似唔見你地有聯絡嘅?」朱天佑追問道。
 
「因為佢已經唔喺哩個世界喇…」隔了一會Rachel答道。
 
善解人意的兩兄妹感覺到媽媽的心痛便沒有再問問題,只是走到母親旁邊靜靜抱著她。
 


當然,為了滿足自己的求知慾,他們很快便用撒手鐧從表姨Annie口中知道了整個故事。
 
「原來我個名係媽咪為咗紀念佢而改…」知道了故事後朱天佑對朱思雅說道。
 
「阿哥,我聽完後好唔開心呀… 阿媽咁多年嚟一定好內疚喇,之後仲要知道老豆咁過份…」朱思雅眼濕濕地對天佑說。
 
朱天佑:「我都好唔舒服… 我開始明點解阿媽同阿爸分開後咁多年都無再同第二個一齊喇…」
 
「點解?」朱思雅眼仔碌碌地問。
 
「發生咗咁嘅事,我估佢大概覺得自己唔配再有幸福吧…」朱天佑帶點唏噓說道。
 
朱思雅:「阿媽真係好可憐呀… 阿哥我地有無嘢可以幫到媽咪?」
 
「或者真係有…」朱天佑這時突然想到之前在網上看見過早前科學家在研究平行時空和空間轉移的技術上取得了很大的突破。


 
自此,兩兄妹發奮讀書並很快在科學領域上取得傑出成就加入了國家的秘密研發局。
 
 
回到現在
 
「阿媽,諗起Elven?」朱天佑坐到Rachel身邊問道。
 
「嗯… 咁啱執嘢見到本書咪拎出嚟睇下囉。」Rachel抹一抹臉上的淚痕答道。
 
「如果有一日可以比你時光倒流,你會唔會有唔同選擇?」靜了一回,朱天佑再問。
 
「哩啲問題點知呀… 不過如果真係可以返返過去,至少我肯定會千方百計阻止佢自殺, 為咗我,真係唔值得㗎…」Rachel望了一望兒子沒好氣答道。
 
「阿媽,我未經歷過愛情,體會唔到當日Elven嘅心情,不過我同阿妹都知你哩幾十年嚟其實好唔開心… 我地好希望可以幫你修補你人生嘅遺憾,好希望你可以活得開心啲。」朱天佑感性地說。


 
「傻仔,都咁多年啦,阿媽見到你同思雅咁乖咁生性就已經好安慰,只要你地開心幸福我就開心㗎喇…」感受到兒子的關心,Rachel拍了拍兒子膊頭微笑說道。
 
「我地好幸福呀,因為我地有個咁好嘅阿媽~ 依家到我同阿妹有能力去回饋你喇,今晚同我地去一個地方啦。」朱天佑同樣微笑著說。
 
「咩地方?」Rachel好奇問道。
 
「今晚你咪知囉~」朱天佑賣關子道。
 
 
到了晚上,朱天佑駕駛飛船帶Rachel到了一個處於效外的地方。降落後經過一重又一重的關卡,他們來到了一個像實驗室的大房間,朱思雅早在這裏等著並向他們揮手。
 
 
「你兩個攪咩咁神秘呀?哩度就係你地工作個實驗室?」30年後的科技絕不是現在可比,所以看見很多看似先進的儀器也沒有讓Rachel大吃一驚。
 


「你都可以咁講,哩度係其中一個實驗室。不過嚟緊我地講嘅嘢你要認真聽同埋唔好咁驚訝。」朱天佑答道。
 
Rachel:「咁嚴肅? 咁講啦。」
 
「其實自從知道咗阿媽你啲故仔,我同阿妹就一直諗緊有咩方法可以幫你,而咁啱地球上科技嘅突破比咗條路我地。阿媽,唔好嚇親,前排我地國家終於成功研發咗時光機可以比人返返到過去喇,而同一時間,阿妹嗰team仲成功研發咗另一樣嘢,一種可以幫人將靈魂轉移去另一時空嘅技術。首先你要明白哩個宇宙其實係有好多唔同嘅世界…」天佑和思雅很認真向Rachel講解這技術和要注意的事項。
 
「所以你意思係我可以用時光機返返過去,再用阿妹個技術去另一個世界重新嚟一次?」用了很長時間理解背後理念後,Rachel得出結論。
 
「無錯,當然要點用佢地你可以認真諗下,然後再話比我地聽啦。」朱天佑答道。
 
Rachel聽完陷入了深思,良久,她終於作出了決定。
 
「越諗阿仔阿女你地真係好叻,多謝你地咁孝順為我做嘅嘢,阿媽好以你地為榮! 我決定咗喇… 」然後Rachel便把自己的計劃告訴了他們。
 
「阿媽你肯定? 你唔自己去經歷另一個世界?」朱思雅帶點吃驚問道。
 
「阿媽老喇,而且哩度仲有你地,我邊捨得就咁走咗去呢?  返返去救返Elven,比另一個自己多一次選擇權,然後如果可以知道埋佢地嘅結局咁就最好啦…之後我就返返嚟陪你地,我仲要等住抱孫㗎嘛~」Rachel笑道。
 
「媽…」朱天佑和朱思雅走到Rachel前面緊緊抱著她,因為他們本身也很不捨得Rachel,三人就這樣抱著一團靜靜享受著這溫馨和離別前的時光。
 
「好啦,我出發喇,早去早回!」過了一會Rachel終於收捨心情決定出發。
 
「哩個空間膠囊有3套藥同埋儀器,以備有咩變數和不時之需,你要好好袋住唔好唔見呀~ 前面嗰部就係時光機入口,你入去就得,其他嘢我地會set好㗎喇。」抹掉眼淚思雅把需要的用具交給了Rachel。
 
「媽咪好快返㗎喇,等我呀~」深呼吸了一口,Rachel走進時光機並和兩個仔女揮手作別。
 
「萬事小心呀媽咪!」說完朱天佑便按下了一個紅色的掣,而Rachel亦應聲在時光機內消失了。
 
經過一輸暈眩的閃光後再次打開眼,Rachel 發覺自己回到了30年前的尖沙嘴海傍,而在遠處,她看見了一個熟悉的背影正望著海邊發呆。
 
(Elven,Rachel,我返嚟救你地喇!)
 
 
-外傳. 故事的終結與起點 完-