「咁聽落都幾好呀, 點解你頭先好似有啲難言之隱咁?」聽完Rachel的自白,阿婆問道。
 
「因為喺結婚前一日,我突然收到一個匿名SMS,內容係講Daniel係一個衰人,話我同佢結婚將來一定會後悔。
 
我睇完後問佢係邊個但就完全無回應,當時哩個message令我有啲不安,但細想諗返自己同Daniel認識咗咁耐,我自問好了解佢係一個咩人,亦覺得大家都決定結婚就應該要相信佢,所以就只係當哩個係惡作劇或者惡意攻擊嘅message,第二天照同Daniel開開心心咁結咗婚。
 
不過喺同Daniel渡蜜月期間,有日我無意間發覺咗同一個電話號碼send咗句”BB 我好掛住你” 比Daniel…」
 
「你有無搵佢對質?」阿婆聽到這裏不知為甚麼感覺有點憤怒,還不自覺捉實了自己的拳頭。
 


「無,我唔敢... 當時淨係覺得好亂,然後努力扮無事… 而諷刺嘅係我之所以記得嗰個電話號碼同之前收到message嗰個係一樣,係因為電話號碼最後四個字咁啱係Elven生日日期,然後返到嚟無耐就突然聽到Elven嘅死訊…」說到這裏Rachel又開始流起眼淚來。
 
「唉…或者冥冥中真係有天意喺入面啦,個後生仔連我只係聽佢講咗一陣我都聽得出佢有幾咁愛你…」阿婆帶點唏噓說道。
 
「我知道, 睇埋佢衣哩本畫冊我就更加清楚…  咁多年嚟,佢對我真係從未試過有半分差過, 永遠都好溫柔,可惜我真係回應唔到佢對我嘅感情…」Rachel陷入了回憶說道。
 
「就算你發現老公原來真係一直有第二個都係咁諗?」阿婆問。
 
「我無諗過… 而且Elven都已經…」Rachel聽到後呆了一呆。
 


「咁如果Elven未死呢? 比你重新揀一次,你會揀一個你愛嘅人,定係愛你嘅人?」
 
「我愛嘅人定係愛我嘅人? 我唔知呀…不過點都唔重要啦,或者等下一世有機會我再話你聽…」Rachel想了一想後苦笑道。
 
「如果我話有辦法比你再見Elven呢? 你仲想唔想見佢?」見Rachel動搖阿婆再追問。
 
「我唔明你咩意思…」Rachel突然抬頭愕然望向阿婆。
 
「想嘅就跟我嚟啦…」說完阿婆突然從衣袋裏拿出了一個球狀物體放在地上,再拿出了一個疑似遙控器的物體按了一個掣,一扇門突然從球體伸展出來,然後阿婆就施施然走了進去。
 


Rachel看見後嚇得目定口呆,感覺像是看見電影裏數十年後的科技情節呈現眼前,但再三猶豫後她還是敵不過好奇心跟阿婆進了入門內。
 
阿婆看見Rachel進來後再按了一個掣,接著出面海邊突然閃了一閃,門便消失不見了,一切回復如常。原來自從Rachel見到阿婆一刻起,兩個人身邊便像圍上了一層隱形薄紗,其他人都看不見他們,直至她們進了門內消失後一切才回復原狀。
 
Rachel進入門後跟阿婆走進了一條通道,然後很快便到了一間像高端實驗室的房間。正當Rachel想問阿婆這裏是甚麼地方時,前面一個影像吸引了她的注意。他看見Elven 正躺在一個玻璃容器入面,像沉睡了的樣子。
 
「Elven!」失而復得的感覺讓Rachel立即衝了過去想近距離看看Elven。
 
「你點叫佢佢都唔會醒㗎喇,因為佢嘅靈魂已經唔係哩個時空入面。」阿婆平靜地說道。
 
「點解會咁? 你對佢做過啲咩嚟?」Rachel激動地問。
 
「你應該感受到我係無惡意嘅,如果我真係要傷害你地嘅就唔會花咁多時間聽你地講故仔啦。幾個星期前我喺頭先嗰度見到佢萬念俱灰,好似一心想尋死咁嘅樣,我只係提供咗一個方法比佢去修補遺憾啫。」阿婆開始解釋。
 
Rachel:「咩方法?」


 
阿婆:「哩個世界係好複雜,唔係單單好似你地所認知咁,喺同一時間,其實係有好多個唔同嘅時空同時演繹緊因為喺唔同嘅時間同埋唔同嘅決定而所造成嘅唔同世界,而我有方法將我地嘅靈魂轉移去另一個時空。」
 
Rachel:「你意思係Elven個靈魂依家係另一個時空?」
 
阿婆:「聰明。」
 
「咁佢仲有無機會會返嚟?」Rachel心急地問。
 
阿婆:「如果佢返去嘅目的或者疑惑得到解決,記憶嘅封印就會短暫解開,然後佢可以選擇返唔返嚟哩個時空。」
 
Rachel:「咁佢的目的係咩?」
 
「你知道嘅。」阿婆望著Rachel說。
 


Rachel:「…我?」
 
「係,所以無你嘅參與,佢其實係唔會返嚟,因為就算佢係另一世界真係可以同你一齊,返到嚟都會失去返一切, 除非佢係同依家嘅你一齊返嚟啦...」
 
Rachel陷入了沉默。
 
「其實依家全世界都已經接受佢死咗,雖然唔知佢喺果邊係點,但至少可以重新過新生活都未必係一件壞事呀,除非你都有其他目的或者疑惑想解決,唔係你無必要冒險為佢咁做。」見Rachel很久也沒有出聲,阿婆又再說道。
 
「到底個系統運行法質係點? Elven點決定佢係去咗邊一個時空?」Rachel再思考了一會後問。
 
「要攪清楚哩個技術唔係返返過去改變未來,而係去咗另一個唔同嘅時空,而哩個時空嘅前設或背景同今生哩個世界可能會唔同。當你諗住想改變的嘅事物,系統自然會將你個靈魂送去最接近你所想嘅嗰個時空。
 
不過因為保護時空法側,靈魂過到去大部份嘅記憶都會被封印,可能只係剩低一啲最深入嘅感覺和本能去左右自己嘅決定同行為,因為若果不斷帶著現世記憶穿梳喺唔同嘅時空係一件好危險嘅事,有啲帶有不良動機嘅人好可能會利用哩種技術去做啲傷害別人或者世界嘅行為,所以穿越後你唔會記得自己係穿越者,只係重新喺嗰個時空生活。
 
當然因為前設不同,封印嘅記憶亦可能會影響你做出一啲唔同嘅決定因而引申出唔同嘅結果。而就算最後條件滿足你選擇返返嚟哩個世界,你都只會當發咗場夢咁,唔會記得穿越哩個事實。」阿婆一口氣再解釋。


 
「明白... 我可唔可以問Elven去咗一個咩嘅時空?」Rachel再問。
 
「佢有講過自己有兩個最大嘅遺憾,一個係錯誤表白令到你地最後連朋友都做唔成,一個係點解佢唔可以早啲喺你有男朋友前認識你。佢好有信心咁話如果可以早啲認識你,佢一定可以早一步搶贏你老公喎。」
 
「哈,咁有自信? 睇下點...」聽到這裏Rachel不期然露出了點點笑容。
 
「咦,笑得出即係你心入面應該有決定喇喎...」阿婆看見後亦微笑道。
 
「嗯,發生咗咁多事,如果可以從新洗牌,我都好想知道結局會唔會改變... 以前其實我都唔係無諗過如果有下一世,我會希望可以有機會回應Elven報答佢,而當聽到Elven嘅死訊後哩種感覺就更加強烈… 依家知佢原來未死又真係有哩個機會,我說服唔到自己唔去嘗試…
 
 同埋關於Daniel,有啲嘢我都想去find out答案...」再思考了一段時間,Rachel終於作出了決定。
 
(又或者其實我只係想逃避,唔想再面對依家嘅Daniel…)
 


「既然你決定咗,咁就諗住你想要嘅目的,然後食左哩粒藥佢,至於哩度啲手尾阿婆會幫你善後㗎喇。」阿婆邊說邊把一粒疑似藥丸的物題交給Rachel。
 
「多謝你…可唔可以問下你點解你要幫我地? 」Rachel拿了藥丸後問。
 
「嗯…」阿婆彷彿亦進入了自己的回憶,「因為阿婆好想每個人都可以有多次機會,亦都好想知道個答案… 」
 
「咁希望有一日我可以返到嚟講你聽個答案啦。」Rachel笑道。
 
「哈哈,可惜你唔會有咁嘅機會,正如頭先所講,你返到嚟後只會當自己發咗場夢,而我喺你心目中亦只會變返做一個普通嘅阿婆,所以你唔會講到咩比我聽㗎。」阿婆糾正Rachel的觀念。
 
「噢,咁太可惜了...」Rachel聽到後有點失望和不好意思。
 
「傻女,其實如果見到你地可以一齊返嚟,咁唔係就已經係答案喇咩?」
 
Rachel聽後想了想,然後對阿婆笑了一笑,再說了句多謝後便把藥丸吞下了,很快暈倒在地上。
 
阿婆把Rachel放進了第二個玻璃容器並接上Elven的容器後,望著Rachel和Elven望了很久,然後右手突然往臉上一撕露出了另一個面容。
 
若果Elven和Rachel看見一定會大吃一驚,因為這時阿婆的臉容,竟然和Rachel有超過八成相似, 只是臉上佈滿了歲月的痕跡...
 
「希望你地唔會白廢我專登返嚟嘅心意啦...」說完後阿婆便依依不捨離開了房間。
 
只是阿婆沒想過回到外面世界不久,竟又遇見了另一個人,讓她陷入了兩難的境地…
 
 
 
- 第二部 完-