只想和你愛一次: 13. 不想再輸

Ada走後，經過短暫的失落，大家又很快回復正常的生活。這天，Elven突然收到Daniel的message。
 
「Elven，記唔記得上次話下次練波叫埋你呀? 今個星期日崇拜後晏晝我地有波踢你join 唔join?」
 
(踢波? 都好喎，近排都有啲腳痕，順便幫Rachel測試下你啲運動基因如何先~)
 
「好呀，今個星期日我ok呀。」想了想Elven便回覆道。
 
 
當日教會




 
「Elven，一陣踢波前一唔一齊lunch?」Daniel在崇拜開始前看見Elven便問。
 
「好呀，反正球場喺附近都走唔遠~」
 
「Elven你今日都去踢波?」因Daniel早上有告訴Rachel自己教會後要去踢波不能跟她一起回家所以Rachel問道。
 
Elven:「係呀，都有段時間無踢有啲腳痕~」
 
然後Elven又走到Rachel旁細細聲對她說:「順便幫你測試下佢啲運動基因如何~」




 
「痴線㗎你!」Rachel立刻面紅耳赤逃走了。
 
聽不到後一句的Daniel則只能一臉疑惑望著Rachel的背影和正在傻笑的Elven。
 
 
 
「Susan你一陣有無嘢做?」崇拜開始後Rachel細細聲問旁邊的Susan。
 
「要返屋企做功課呀，明天有份assignment要交…」Susan一臉無奈。




 
「有無得遲啲先返去做? Elven今日會同教會一齊踢波喎~ 你唔想睇下咩?」Rachel不動聲色慫恿著Susan。
 
「想就梗係想，但做咩你咁興奮呀?」Susan很快察覺到Rachel的意圖笑笑口問道。
 
「邊有呀，知你想睇先話你知咋…」Rachel扮作無辜。
 
「真係? 定係想搵我陪你咋?」Susan奸笑著。
 
「咁我都有啲想睇下嘅…」Rachel終於坦白承認。
 
「你老實話我聽係想睇Daniel定係Elven我再考慮下啦~」Susan繼續追擊。
 
「…兩個都想…」Rachel繼續坦白。
 




「不過Daniel對Elven哩個戲碼都唔錯，好啦，我就陪你睇一陣啦~」
 
 
球場上，各人做好熱身後練習便正式開始。
 
領隊加隊長阿志: 「今日Elven都join左我地一齊踢，我地就輕鬆啲猜隊鬥下波啦~」
 
一開始Elven和Daniel猜到同一隊，兩個中場配合一攻一守可以說是超晒班不斷虐殺另一隊。
 
而就在Rachel和Susan姍姍來遲後不久，阿志終於忍不住說:
 
「哩個組合都差唔多喇我地再猜過啦，同埋今次猜到Elven同Daniel唔同隊為止...」
 
結果經過幾輪後兩人終於被編到不同隊，比賽立即變得勢均力敵，精彩萬分。
 




 
(唔知點解對住你，我就係唔想輸，我唔想再輸比你…)不過當Elven有一次被Daniel扭過後，一個不想輸的念頭突然在他腦海生成，然後很快Daniel便發現了Elven的不對勁。
 
感受到對方突然變得十分認真甚至帶有點殺氣的攔截，Daniel亦不敢怠慢越來越認真。由於兩人都是中場，所以不乏雙方較技的場面，起初Elven也有兩次再被Daniel扭過，但當Elven偶然發現原來Rachel和Susan正坐在觀眾席上觀看，他的鬥心不自覺地再被燃燒提升多一個層次，自此Daniel再沒試過憑過人能力突破Elven的防守，只能靠傳波制造攻勢。當然本身不擅盤扭的Elven亦只能靠和隊友配合進攻，不過對於第一次和隊友踢的Elven在默契上自然較Daniel那邊輸蝕。
 
「你覺唔覺得Elven對Daniel好似特別有火?」觀眾席上的Susan問Rachel。
 
「我都覺…Daniel踢踢下都比佢攪到越嚟越有火，唔通哩啲就叫棋逢敵手?」Rachel邊點頭邊說。
 
「睇怕唔只咁簡單… 你唔覺佢地踢到好似爭女咁咩?」Susan望了一望Rachel，突然若有所感。
 
「唔覺囉…咪白痴啦!」似乎所有事情在Susan口中都總可以變成和那一方面有關的事，Rachel對些很是無奈。
 
「咁你覺得邊個踢得charm 啲呀?」隔了一會Susan又問。
 




「唔… 各有優勢喎…」Rachel想了一會後都沒有答案。
 
「揀男仔唔可以咁㗎喎~」Susan笑著打量Rachel。
 
Rachel:「你又講去邊呀， 依家講緊踢波呀…」
 
「我知我知， 所以我係講揀男仔唔可以咁囉! 咁即係點啫~」Susan仍不放過Rachel。
 
「有咩可以點? 我同Elven係無可能㗎，至於Daniel，我都唔知， 順其自然啦…」Rachel無奈應道。
 
Susan:「咁算唔算係幸福的煩惱?」
 
「其實選擇權從來都唔係我手…唔好再講我喇，不如講下你啦，嗰三個幸運兒點呀? 有結果未?」Rachel嘗試轉移話題。
 
「未呀，其實三個都幾好，但一見完Elven，又覺得三個都唔好…」Susan同樣陷入了苦惱。




 
「… 咁一係以後唔好見佢?」Rachel笑著提議。
 
「梗係唔得!」Susan立即抗議。
 
就在兩人打打鬧鬧期間，球場的賽事亦已完結，最後一邊憑著Daniel妙傳一邊憑著Elven的頭搥入波雙方1:1握手言和。
 
「好波喎Daniel!」完場後Elven變回正常，搭著Daniel膊頭說道。
 
「你都好好波呀…不過頭先我以為自己唔知做咗啲咩感覺好似變咗你殺父仇人咁…」Daniel有點發牢騷的語氣。
 
「係?可能一時遇到好對手太認真… 你唔好介意呀，好彩你無受傷…」其實Elven亦不知到底自己是怎樣一回事，剛剛純粹只有一個念頭就是不想輸給Daniel。
 
「Elven好波呀，以後多啲同我地踢幫我地踢埋教會盃啦!有你同Daniel，升班一定唔係問題~」這時阿志走到二人身後搭著兩人膊頭說道。
 
「夾到時間我盡量參與啦~」Elven望了一望Rachel的方向然後答道。