貧民窟走出嚟嘅異能球星 (第一季已完結): 第02章

02

———因為馬天尼同艾瑪同班，一齊返學放學起初都無乜特別，但自從艾瑪習慣挽住馬天尼隻手行出行入之後，馬天尼變成咗好多男同學嘅共同敵人，因為艾瑪都好索好大波。

———其中一個係隔離班果位籃球隊嘅靚仔白人新星Ben Sina，佢開學無耐鍾意咗艾瑪，點知俾個柒頭黑人媾咗女神(求學時期嘅黑人都係鮑魚刷頭為主，馬天尼都唔例外)。

——-當Howard帶馬天尼去籃球隊跟操報到嘅時候，新星Ben就叫哂啲主力球員撚吓呢件新人。

——馬天尼喺籃球隊跟操都唔知有乜做，開口問亦無人會睬佢，站喺新星Ben一方嘅光頭助教求其同佢做咗個體能測試，之後就叫佢坐埋一邊睇，完全無打算俾佢掂波。



——-馬天尼睇咗一日，初初都唔係幾明啲人做緊乜，但睇睇吓就明明地，明明地又發現幾有趣。

——-結果馬天尼一睇就睇咗大半個月，平時得Howard會同佢傾幾句，其他人都對佢西口西面。

——為咗應付美國高中籃球聯賽，球員都開始努力練習，而馬天尼每日都會準時出席「觀看」球隊練習，從不間斷。

——-馬天尼跟完操會獨自去學校室外球場練一陣波，之後返屋企幫手煮飯做家務，再去街場賭鬥，直至球場熄燈就返去挑燈夜讀，非常刻苦努力。

——-馬天尼對自己學校成績嘅要求都好嚴格，短短5個月佢嘅成績已讀優勝過艾瑪。



——-直至高一生涯完結，球隊聯賽次輪出局，馬天尼都未曾落場同隊員打過波，反而俾球員不斷嘲笑同奚落。佢一度懷疑自己係咪做得唔夠好，或者做錯咗啲咩，結果有一晚喺街場遇到Howard，先知道係新星Ben作怪。

——新星Ben今年喺聯賽打出咗唔錯嘅成績，又入咗YMCA訓練營深造咗一輪，甚有人推薦佢打美州青年錦標賽。

———馬天尼覺得新星Ben只係控球能力同First Step兩方面比較出眾，其他方面都唔算太穩定。

———當高中二年級嘅學年開始咗，馬天尼就走去參加籃球隊正式選拔，因為原教練退休，學校聘用一個鬍鬚佬做教練，令馬天尼覺得自己終於等到機會。

———先一輪體能同技術測試以新星Ben同馬天尼表現最突出，就開始咗5vs5比賽評核。



———「兄弟，今年呢度應該就係你表演嘅舞台。」咁啱編到同馬天尼一隊嘅Howard拍拍馬天尼。

———「等陣睇我點樣打爆新星Ben呢條Bitch。」等咗一年，馬天尼終於第一次喺學校籃球場打籃球。

———坐鬍鬚教練側邊嘅光頭助教一邊吹到新星Ben有幾掂幾屈機，但鬍鬚教練只係講咗句：「你收聲啦，我自己會睇。」

———今日艾瑪有嚟球館睇選拔，當支持吓馬天尼，雖然佢乜都唔識。

———新星Ben果邊同3個原正選球員加1個後備射手一隊；馬天尼呢邊同原正選中鋒Howard加3條臭新仔一隊。

———啲臭新仔無人打控球後衛呢個位，兼且個個怕咗同樣係控後衛嘅新星Ben，於是原本喺街場做開射手嘅馬天尼改打控衛。

———Howard問：「你咁高大控波掂唔掂㗎？」

———已經長高到1米85嘅馬天尼拍拍心口答：「打咩位置都可以吖，正好可以同新星Ben對位。」