貧民窟走出嚟嘅異能球星 (第一季已完結): 第03章

03

———選拔比賽一開始Howard跳贏咗將個波撥俾馬天尼。

———「哥哥加油呀！」艾瑪喺觀眾席大叫。

———馬天尼快速帶波到3秒區進攻，引嚟兩個對手防守，新星Ben從後做切斷。

———但估唔到馬天尼會帶後一步射中距離，食生菜咁易咁入咗兩分。



———艾瑪開心得攬住隔離個女同學。

———新星Ben快速策動反擊，諗住喺三分線做一個Crossover扭過馬天尼殺入3秒區，但轉眼間個波已經俾人偷咗。

———快攻上籃得分嘅馬天尼心諗：喺場邊睇咗你打波成大半年，你有咩手段我一清二楚！

———成場波基本上同開局呢段差唔多，新星Ben俾馬天尼㩒住嚟砌，馬天尼喺新星Ben頭上拎咗20分。

———0得分嘅新星Ben數據都唔弱，有12個失誤，當中俾馬天尼Block shot嘅鏡頭都唔少。



———「停手！停手呀！」突然新星Ben同馬天尼打起上嚟，旁邊嘅人都衝上去阻止。

———「選拔賽你咁認真打有咩居心！死黑人！Fuck you！」新星Ben老羞成怒，俾幾個人拉開都繼續鬧馬天尼。

———「笑話！你輸係因為你實力差！淨係識用埋啲卑鄙手段嘅Bitch！」馬天尼用粗口回應佢。

———事件由鬍鬚教練出面平息，佢先中斷選拔，再與涉事球員面談調查事件始末。

———當晚嘉莉媽媽知道馬天尼喺學校同人打交受傷後非常憤怒，痛斥馬天尼係班細路嘅榜樣，絕對唔能夠用暴力解決問題。



———嘉莉媽媽怕馬天尼上次救艾瑪錯手殺死主謀嘅壯男會積聚戾氣，要馬天尼答應以後唔再同人打鬥先俾佢打校隊。

———「媽，我知道㗎喇，我應承妳！以後唔再同人打交！」馬天尼亦都願意俾出承諾。

———過咗幾日，籃球隊出咗一份入選球員名單，名單上有馬天尼個名，亦都有新星Ben個名。

———放學後馬天尼去到球館，就聽到鬍鬚教練話要搞一個Briefing。

———內容係要新星Ben同一眾前球隊成員要放下同馬天尼之間嘅矛盾，否則踢出名單。

———跟住搞咗個破冰分享會，等球隊成員互相認識吓。。

———經過一輪嘅破冰分享，馬天尼亦講出自己嘅身世，父母意外雙亡，童年唯一收過父母送嘅生日禮物係一個二手籃球，到後來佢由流浪貧民窟意外得到艾瑪一家人收養，有機會學習正規籃球，所以想打好籃球，成名之後報答所有幫助佢嘅人。

———「新星Ben，我真係無意同你對立，我知道你係因為艾瑪所以叫成隊人排擠我，但身為一個男人你應該憑實力去令艾瑪愛上你，唔應該恨我報復我。」馬天尼直接同新星Ben攤開嚟講。



———「Sorry，我誤會咗你，令你上年過得咁痛苦，我知道我唔夠成熟，你講得啱，我知道我做錯咗，兄弟。」新星Ben而家先知自己做咗一件幾咁愚蠢嘅事，個柒頭黑人原來係艾瑪呀哥，而家巴結好佢應該可以同艾瑪更加親近。

———不過新星Ben唔係咩大奸大惡又記仇嘅人，佢同馬天尼嘅和解都算係真心嘅。

———鬍鬚教練都樂於見到球隊氣氛轉好，於是搵咗高三嘅Howard做隊長，大家都無咩意見。

———前觀察員馬天尼融入球隊嘅速度都唔算好快，因為鬍鬚教練改動咗啲操練方針同戰術，無咩根底嘅馬天尼好多野都係一知半解。

———馬天尼暫時仲未喺球隊面前運用過佢嘅3球必入絕技，因為每次佢都要留嚟夜晚喺街場同人賭鬥用。

———當馬天尼過住無比幸福嘅生活，突然愛米彌亞患上咗一種罕見嘅皮肌炎疾病，影響平衡力、手部麻痺、手指關節腫賬及痛楚。

———呢個病令到愛米無辦法再好似以前咁輕鬆彈奏鋼琴，彷彿奪去咗佢第二生命。



———全家都好擔心愛米彌亞，尤其是馬天尼，佢知道第二生命代表緊啲咩，佢每日見到愛米彌亞咁憔悴都非常心痛。

———唯一可以做嘅事就係多啲陪伴愛米，馬天尼甚至無去街場賭鬥，晚晚喺屋企睇實愛米。

———「小馬，點解你最近夜晚唔去打波嘅？」坐喺大廳梳化嘅愛米問。

———「我覺得妳比較緊要，妳有事我當然想陪伴妳啦。」送水送藥嘅馬天尼好自然咁答。

———「你覺得天父係咪對我開咗個好大嘅玩笑？指導我一步步愛上音樂，然後賜我一個怪病，要我遠離音樂。」難得班細路走哂入嘉莉媽媽房聽故事，愛米同比較成熟傾得嚟嘅馬天尼訴苦。

———「或者呢個係天父俾妳嘅磨練，之後妳會搵到更熱枕、更適合妳嘅道路。」馬天尼坐近愛米。

———「曾經我幻想，我可以搵一個同樣鍾意音樂嘅男人，我會喺婚禮為我嘅愛人彈一首我最喜愛嘅古典音樂，李斯特嘅《鐘》，但似乎所有嘢都幻滅咗。」愛米講到眼泛淚光。

———「愛米，搵一個唔識音樂嘅男人，等佢喺婚禮彈一首妳最愛聽嘅《鐘》，咁樣妳先會更加幸福。」馬天尼講完，愛米已經伏喺佢胸襟飲泣。



————「點解要係我... 嗚嗚嗚...」馬天尼默默咁擁抱住脆弱嘅愛米，喊出嚟應該會舒服啲。