貧民窟走出嚟嘅異能球星 (第一季已完結): 第09章
09
———不過而家講大學獎學金仲係言之尚早，馬天尼喺某啲技術層面仲係好嫩，出現咗唔少無解嘅失誤。
———而家隔幾年就會有高中生直接參加NBA遺拔嘅特例，實力上馬天尼同過往嘅拔尖生仲有一段距離。
———次輪小組首名出線之後，AF高中進入咗州132強淘汰賽，開始要面對真正有實力嘅對手。
———新仔Louis嘅實力逐漸提升，開始成為第三得分主力，比Collins更有侵略性。
———新星斑亦開始佢嘅飈分模式，得分場場過30分，加上馬天尼喺關鍵時間嘅3分雨永無失手，最終AF高中成功打到入8強。
———寂寂無名嘅AF高中打出歷史最佳成續，校內吹起一股籃球熱潮。
———新星斑同馬天尼都得到當地球壇賞識，有啲大型運動牌子搞嘅比賽同訓練營都有向佢地發出邀請。
———係時候見識吓外面精英雲集嘅世界，馬天尼非常期待。
———佢嘅忙碌生活始終擺脫唔到Nana，反而越嚟越沉醉喺Nana嘅懲罰遊戲，不斷激發佢嘅陰暗面同獸性。
———開始掌握到男女之間嘅事，馬天尼唔再剪柒頭，個樣Smart咗好多，把口開治口花花，身邊不時圍住一班發花痴嘅女同學。
———至於艾瑪當然睇到佢嘅轉變，但始終馬天尼太出位，其他人眼中自己只係佢個妹，當然會無視艾瑪嘅存在，馬天尼嘅光茫，自己點都掩蓋唔住。
———不過馬天尼都好識做嘅，佢對艾瑪好到死心塌地，少少嘢都非常上心，唯獨係桃花太旺，唔識收斂。
———加上係人都睇得出佢喺球場上嘅努力，基本上佢都無乜時間心力搞搞震。
———八強第一場比賽，對手又快又準，令球隊一直落後，半場鬍鬚教練叫馬天尼全力開火，因為防守新星斑嘅係一個NBA球星二代。
———新星斑頭兩節俾對手限制住，而且手感唔順，只係得到5分。
———馬天尼望吓個分牌，36:29，都仲有得贏嘅。
———結果馬天尼第3節就不斷出手，射到對手開始慌。
————49:49平手進手第4節，馬天尼用哂3次絕招，只能夠喺第4節賭運氣。
———好在第4節NBA二代換防馬天尼，新星斑終於可以放開嚟打，不過比分一直咬住。
———NBA二代一直對馬天尼Trash talk，但馬天尼睬佢都傻，明知正面突破無著數不如拉開對手留空位俾隊友攻。
———到咗賽事尾段嘅一個攻勢，NBA二代射入反超前嘅中距離，剩返4秒。
———鬍鬚佬叫咗個暫停，佢問馬天尼有無信心再次絕殺，馬天尼答無。
———「吓？」鬍鬚佬當場呆咗。
———「我覺得對手一定估到呢球會交俾我處理，所以NBA二代一定會緊盯我，完全唔會俾機會我起手，而且佢的確有呢個實力。」馬天尼好冷靜咁解釋：「咁不如呢次由Louis出手，反正佢有空位，亦有唔錯嘅命中率。」
———鬍鬚佬雖然覺得冒險，但馬天尼又分析得幾啱，於是搵咗Louis做戰術核心。
———馬天尼做開波果個，佯攻一個Give and go嘅攻勢，由喺內線出嚟扮Pick嘅Louis施展最後一擊。
———「靠你喇兄弟，平常心咁射啦。」馬天尼對Louis減壓。
———「嗯！」Louis努力集中精神，始終壓力一定喺度。
———「記唔記得第一場比賽最尾果球？俾啲信心自己，你得嘅。」馬天尼講完就去埋位開波。
———「聽講你係百發百中嘅Clucth shooter，信唔信一陣我唔會俾機會你起到手。」NBA二代走埋嚟挑釁。
——-「我一陣就會喺你頭上施展絕殺，輸咗唔好喊得咁肉酸。」馬天尼罕有咁回敬返去。
———不過一切都係為咗球隊，吹大兩嘜又有咩所謂。
———比賽繼續，馬天尼傳波俾哥連斯即刻走位，NBA二代果然不顧一切咁緊貼，直到Louis彈出三分線接波出手，對手先知道原來係計中計。
———個波撞框彈高，每個人個心都離一離，咁彈高法個波又似會滴入，又似會唔入。
———最後居然撞板入網，球證判入球有效！
———作客嘅AF高中開心到彈起，球員撲埋去Louis度歡呼慶祝。
———NBA二代嬲到面都紅哂，而且馬天尼眼尾都無睄過佢。
———之後入到4強嘅比拼，AF高中可以話贏得慘烈，候活拗柴全季報銷，新星斑右手手指甩骹，冠軍賽要負傷上陣。
———難得打入決賽，鬍鬚佬焗住用個殘陣同人撼，用馬天尼、哥連斯、老鬼Billy、Louis搭Otis做首發，新星斑右手手指仲痛緊，應該都唔會擺出場。
———呢場決賽可以話係對馬天尼嘅考驗，作為暫代隊長，佢必須企出嚟領導全隊人作戰。
———「加油！」「AF高中必勝！」「Broolyn精英高中必勝！」
———決賽同季軍賽都係喺Brooklyn NBA籃網隊主場球館進行，吸引非常多嘅觀眾入場睇波。
———季軍賽打完就輪到AF高中對決Brooklyn精英高中。
———Brooklyn精英高中正選都係由3、4年級生組成，亦係上年嘅原班人馬補強版，絕對係超班高手雲集。
———睇完有Nana份表演嘅啦啦隊跳舞開場，馬天尼正式踏入球場準備熱身。
———Nana經過馬天尼身邊嘅時候講咗句：「加油呀，我睇中嘅男人。」
———因為艾瑪佢地喺上面觀眾席睇住，馬天尼都只係好禮貌咁答咗句Thank you，無表露出任何表情。
———鬍鬚佬比賽前5分鐘問定馬天尼有無咩感動煩惱，唔好突然間又跳掣。
———「其實都有啲煩嘢嘅，不過放心啦，我有信心自己會處理得好。」馬天尼前半句差啲嚇死鬍鬚佬。
———「今日你係球隊隊長、組織重心、得分主力、關鍵殺手，獨食啲都無問題嘅，我要你今場獨取50分。」鬍鬚佬交出一個不可能任務俾馬天尼。
———「吓？你平時唔係好強調籃球係團隊合作嘅運動咩？」馬天尼一頭霧水，思疑鬍鬚佬食錯藥。
———「屌你啦！果啲都係Bullshits！你今日只需要全力執行我嘅指示！50分！有無問題？」鬍鬚佬相信今仗要贏，一定要倚賴馬天尼嘅爆發。
———「我會盡力！」馬天尼打起精神，鎖定50分呢個目標。
———決賽係最終榮耀之戰，無人天生想拎亞軍，而當球證喺中場拋起個波之後，兩隊球員即刻用盡渾身解數喺Barclays Center進行激鬥。