貧民窟走出嚟嘅異能球星 (第一季已完結): 第10章
10
———馬天尼喺開打後33秒射入第1個3分球，54秒唔要命咁剷籃得手。
———開局初段嘅AF高中不失霸氣咁向對手射箭，以5:0領先。
———對手憑住高大嘅身材輾壓籃底嘅Otis，搶到2分，馬上就俾馬天尼用3分射穿佢地嘅籃框。
———對手有出色嘅射手，中距離得手又扳回2分，結果返防嘅時候俾馬天尼扭過2個防守球員快攻上籃。
———比數10:4，因為白色衫嘅27號仔唔夠2分鐘就獨取10分，所以黑衫軍團嗌咗個暫停。
———調節咗一輪，對手依然用內線手段得分，再搵兩個防守出色嘅球員緊盯白衫27號，不過，馬天尼喺超遠距離用咗第一次絕招，狠狠咁打咗黑衫軍教練一巴。
———場館嘅尖叫聲大到你唔信，1打5嘅勝仗無幾可有得睇。
———鬍鬚佬都唔敢相信個柒頭真係咁撚癲，不過佢雙手插袋擺咗個「預撚咗嗌」嘅淡定企姿，令人睇佢唔透。
———軍心動搖嘅B精高中連續失誤咗兩球，一球俾馬天尼偷咗打快攻，一球傳出界，令到個球權俾咗AF高中。
———黑衫軍教練再次嗌暫停，喺場邊怒插班球員。相反AF高中呢邊鬍鬚佬開始關心馬天尼個狀態，馬天尼叫啲隊友放心，接住落嚟就係4打2嘅好局勢，叫隊友要好好準備圍毆。
———重新開始讀錶，AF高中進攻，結果馬天尼俾3個黑衫球員圍住，完全拎唔到波，反觀Billy見哥連斯有空位，直接傳俾佢射3分。
———4打2都好難守得住，但有時就係要賭對面手感差，不過老鬼哥連斯基本上可以用穩定嚟形容，3分破網。
———第1節完場，AF高中領先16分。
———第2節一開始，黑衫軍得返兩個人Mark住馬天尼，馬天尼都會搵吓機會突破，但對手一早埋伏咗陷阱，不過馬天尼場上視野極好，每次都搵到隊友交到助攻。
———去到第2節中段，黑衫軍守波果時惡意犯規，一肘批落馬天尼額側，馬天尼當場暈咗。
———兩隊球員之間即刻發生衝突，不過NBA場館嘅保安都唔係流嘅，好快就拉開咗兩班人。
———等到暈咗嘅馬天尼醒返，球賽已經打到去第4節中段，落場嘅白衫球員除咗Billy個個都係大後備新人，俾黑衫軍全場緊逼，不斷咁搶攻。
———「大佬你終於醒喇！快啲出場啦！得返5分鐘咋，對面領先緊12分喇！」侯活好焦急咁大嗌。
———「點解會咁嘅？」馬天尼咩都未搞清楚。
———「暫停！」鬍鬚佬大喝，之後撲埋去馬天尼身邊講：「仲落唔落到場？啱啱你俾人打暈咗，Louis同Collins因為郁手打人俾球證趕咗出場，Otis啱啱打到抽筋換咗出嚟，對面而家㩒住我地砌呀。」
———「換我出去！」馬天尼彈起身，內心極度憤怒。
———當馬天尼再次落場，場館響起爆炸性嘅掌聲同叫喊聲。
———異能絕招，我需要你！
———頭先係因為對手攔截犯規先暫停，所以由馬天尼一出場就可以發起進攻。
———以一個箭步衝前，再後撤3分投籃，馬天尼轟入一球3分波。
———俾人入完2分？第二個攻勢，馬天尼又用一球3分波回應。
———搶到防守籃板？第三個攻勢，馬天尼依然係用一球3分波搞掂你。
———分差縮細到4分。
———黑衫軍入咗球籃底2分，再派出三個人緊盯，馬天尼喺後半場超遠距離推射3分，一樣入俾你睇。
———馬天尼好似變咗無敵戰神一樣，將比分拉近到3分，黑衫軍點阻都阻唔住個分差收窄。
———馬天尼用野獸嘅目光鎖定對面嘅控球後衛，出埋口術：「喂！只要你帶波過到我，我今場唔會再射3分，有無膽挑戰我？」
———「哼！怕你呀？」個控衛又真係諗住過佢，插花Crossover，再一個後轉身衝入三秒區，不過手上個波就俾馬天尼篤咗去中場。
———1打0快攻，不過射3分。
———呢一球3分波引爆全場哄動！
———「MVP... MVP... MVP...」所有人起身拍手讚揚馬天尼嘅奇跡表現。
———時間剩低27秒，球權在手嘅黑衫軍教練叫咗個暫停，第4節俾怪物馬天尼連續拎咗13分，將比分追平，佢必須要諗辦法拎到分之餘再瓦解反撲嘅3分球。
———而馬天尼因為透支咗太多異能，感覺好攰好暈，佢連行步路都要死頂住。
———球證示意繼續比賽，馬天尼慢慢行出去，感覺行步路都好辛苦，黑衫開波，拖延咗18秒先開始發動戰術，然後製造防守漏洞剷籃得分。
———之後四個黑衫軍圍住馬天尼，但個波好快開咗出底線，完全無打算俾馬天尼參與，最後由一個啱啱換落場嘅白衫球員喺3分線外跳投。
———射波嘅係邊個？有啲面善喎，靚靚仔仔咁...
———「新星Ben！」唔知邊個喺場邊大嗌。
———新星斑雖然右手手指甩骹，但喺無人防守下射球3分波應該無問題嘅。
———頭先黑衫嗌暫停果陣，AF高中個個都見到馬天尼個病樣，呢個樣佢地見得多囉，於是新星斑自薦落場打最後一擊，反正呢個時候，都無人會記得佢，對手都只會將焦點擺喺馬天尼身上。
———「馬天尼！我嘅好兄弟！每次關鍵時刻我都匿喺你背後，今次輪到細佬我為你完成最後嘅任務！」新星斑心入面吶喊。
———3分球穿針破網，AF高中再度上演絕殺神話！
———馬天尼見到呢一幕，好開心咁笑，望向觀眾席Tinsley一家五口，指指波衫背後嘅姓氏，然後就暈低咗。
———「MVP... MVP... MVP... MVP...」全場觀眾照為暈低咗嘅Martini Tinsley喝采。Kelly、Amelia、Emma佢地三個比較眼淺，為著馬天尼嘅驕人成就喊到停唔到。。
———幾個急救員即刻上前，Tinsley一家都衝咗落嚟睇吓佢有無事，不過急救員檢查過表示馬天尼只係疲勞過度暈咗，無咩大礙，所有人先鬆一口氣。
———喺呢個充滿榮耀感嘅現場底下，馬天尼錯過咗的確好可惜。
———馬天尼最後都係入咗醫院觀察，都已經昏迷咗一日。
———「啊姨妳好，請問妳係咪馬天尼媽咪吖？」第二日探病時間，四眼妹Nana現身於醫院馬天尼嘅病床前。
———當時艾瑪、愛榮彌亞都在場，暴風雨嚟喇！
———「請問妳係？」Kelly媽媽好客氣咁問。
———「我叫Nana，係馬天尼嘅女朋友。」相信馬天尼如果呢個時候醒返都會即時再暈低。