[愛情] 心連心 (粵語): 8. 第十五日
仲未夠盡興，我哋走咗去KTV，由凌晨一點唱到五點。
仲要喺KTV飲咗唔少，我哋三個醉到喺街度狂嘔。
嘔完仲傻笑，笑到啫喱話：「我嘔到好肚餓呀。」
我哋繼續走去食早餐，食到天光，我哋三個玩到好開心。
好耐，好耐都冇咁開心過。
已經天都光咗，佢哋話攰，話想返去直接撻落床瞓喎。
但係我想一個人行一行，同佢哋講我自己會返去。
我一路見到好多人，開早市，食早餐，生活嘅感覺令人感到溫馨。
我一直行，完全冇理度方向同路線，行到入一個住宅區。
喺不知不覺之中，我見到一個男性，佢著住T-shirt短蛼，攞住一袋水果。
當佢擰轉頭望到我，佢係呆咗喺度，而我仲未有反應嘅同時，佢一直冇將現線離開過我，當我正想轉身走嗰吓，佢嗌出我個名：「子恩？」
我聽到哩把聲嘅同時，我亦都清楚佢係邊個。
同時，我腦海響起咗一首歌：
［想不起，怎麼會病到不分好歹，連受苦到甜美］
跟住千萬個回憶同感覺湧入腦海，我即時崩潰咗
［我每日捱著不睬不理，但卻捱不死，又去癡纏你］
回憶片段：
我：「點解你要咁抛低我呀？我已經冇再同佢哋一齊啦，我為咗你，介咗毒，落埋仔⋯」
你：「唔好理我啦，我已經做咗對唔住你嘅事。」
我：「冇所謂㗎，我知道你仲鍾意我架，係咪？」
你：（冇出聲，背對住我）
［難道終些一生都要這麼，不可爭一口氣］
我：「你就對我講，你仲鍾意我吖？」
你：「唔好咁傻啦，好冇。」
［很謙卑，只不過是我太過愛你，連自尊都忘記］
我：「唔好走，我真係好需要你，我真係好愛你。」
你：「我個心已經放唔到喺妳度啦，因為我真係做得好錯。」
我：「我冇問題㗎，我可以接受㗎。」
你：（又沉默咗）
［跌到極麻木，只好相信，又再爬得起，就會有轉機］
你推開咗我，我個心雖然痛，但係我知道，只要我唔放棄，我知你有一日會返嚟我身邊。
［若我不懂憎你，如何離別你，亦怕不會飛］
你由嗰日開始消失咗，我聯絡唔到你。
我一直冇放棄過去搵你，我每一日跑到我哋曾經到過嘅地方。
去搵番我哋嘅回憶，我哋嘅溫暖。
我真係唔會去放棄，我都唔會去討厭你，唔會去諗過我哋會分手，一定唔會，唔會。
［由這一分鐘開始計起春風秋雨間，恨我對你以半年時間慢慢的心淡］
時間一日一日咁過，我一直冇放棄過你，去搵你。
一星期、兩星期、三十日，六十日，我開始對自己習慣咗種衝勁，開始放慢。
［付清賬單，平靜的對你熱度退減］
九十日，我開始收拾心情，再重溫我哋過去，分析所有你做過嘅事。
一百二十日，我竟然開始冇失眠，可以開始瞓得著。
一百八十日，我將你俾我嘅信，放入雜物箱裡面。
［一天一點傷心過這一百數十晚，大慨也夠我送我來回地獄又折返人間］
哩半年內，我由一開始嘅絕食、割脉、入院、出院。
失眠咗四個月，體重暴減，瘦到不似人形。
厭食症、憂鬱症，就連醫生都已經放棄咗我。
唔係小雲嘅出現，一心開導我，我相信自己已經離開咗哩個世界。
［春天分手秋天會習慣，苦沖開了便淡］
原來一切係可以捱過去，心，係會可以放低嘅。
［（說甚麼再平反）只怕被迫一起更礙眼］
［（往後這半年間）只愛自己雖說不太習慣］
［畢竟有限，就當過關］
我以為過咗嗰半年，怎至已然六年，應該冇晒事㗎喇，冇晒問題嘅，係咪？點解？點解呀？我仲會遇到你呀？
我唔想再回憶番嗰半年發生過嘅嘢呀！
［由這一分鐘開始計起春風秋雨間，恨我對你以半年時間慢慢的心淡］
我跪咗喺度，眼淚停唔到咁一直喊。
［付清賬單，平靜的對你熱度退減］
我以為半年嘅眼淚夠晒㗎喇。
我以為我痛夠咗喇。
唔係已經夠晒喇咩？
點解我仲會見到你，所有感覺又返番嚟。
［一天一點傷心過這一百數十晚，大慨也夠我送我來回地獄又折返人間］
我完全控制唔到情緒，我怎至唔知自己做咗啲咩。
［春天分手秋天會習慣，苦沖開了便淡］
你一直嗌我：「子恩！子恩！」
我最後暈咗喺街度。
當我再次有意識嘅時候，我係喺醫院。
啫喱同小櫻見到我醒咗，佢哋都喊咗出嚟：「恩，妳冇嘢吖嘛，我哋超擔心妳呀！」
我同佢哋講：「唔好意思呀，過嚟玩仲要搞到咁，要妳哋擔心。」
啫喱喊住講：「傻㗎咩，妳都冇做錯嘢。」
小櫻：「咪係囉。」
佢哋兩個人四隻手捉住我隻手，我知道我好攰，個心都好攰。
突然有把聲傳出嚟：「妳唞吓先啦，冇事㗎喇。」
係小雲，佢都過咗嚟台灣。
應該係啫喱叫佢過嚟嘅。
佢為咗我，應該係諗到冇諗就過嚟。
佢行到我身邊：「發生咩事都好，我都會係度陪妳㗎。」
我啲眼淚又停唔到：「小雲⋯」
佢攬住我：「冇所謂，妳喊啦。」
我心情仲未平伏到：「係佢。」
小雲話：「傻女，其實已經過咗去喇，唔好再返番入哩個深淵。」
我再次崩潰：「我係見到佢呀，點解我會見到佢㗎？我唔係已經放低咗嘅咩？我個心點解可以再痛㗎？六年啦已經，唔係已經消聲匿跡啦咩？」
我一直喊，喊到攰又瞓著咗。