[愛情] 心連心 (粵語): 9. 第十六，十七日
夢裡面，我見到女仔子恩，佢個樣好傷心，好痛。
我喺佢身邊，攬住佢，冇出任何聲。
佢喊住講：「子恩，攬實我。」
我知道，我唔需要講任何嘢，我陪住佢就夠。
佢平靜咗少少：「多謝你，幫我承受咗咁多。」
我摸一摸佢個頭：「冇事，有我喺度，一切我都會承擔。」
跟住，佢摸住我塊面，鍚咗我一啖：「多謝。」
個夢就係咁，我再次醒咗，望一望已經係凌晨三點。
佢哋三個都仲喺度，但係佢哋都攰晒，啫喱同小櫻都喺張櫈度瞓著咗。
小雲佢真係對我好好，佢由以前就一直冇怨言咁幫我，扶我出個深淵。
佢趴低咗喺張床度瞓著咗，我真係欠咗佢好多。
我搵到個手機，我一直諗，我要唔要同子恩講。
其實連我唔係本人都可以激動到崩潰成咁，我都係唔好同佢講。
唔好話，個衝激真係好大。 我算係有子恩嘅記憶都搞成咁。
真係，我唔想俾佢遇到。
我要保護佢，唔想佢再受到任何傷害。
子恩佢以前真係好傻好傻。
同子恩佢換個身體都有兩個禮拜，其實對要換返身體嘅心情越來越淡。
係咪已經開始接咗哩個事實，又或者我寧願繼續努力去做子恩。
我已經知道我係對子恩有咗感覺，仲要係以女性嘅身分。
我唔想再忍住哩種感覺，越來越想對佢講出我嘅心聲。
我再望著手上嘅手機，冇再猶疑：「子恩，我有嘢想返到香港之後同你講，你幾時得間？」
跟住我冇等到佢回覆，就瞓咗覺。
窗外嘅光線射入病房，我慢慢醒咗，一掙開眼，就見到小雲坐咗喺我身邊，托住頭一邊㩒手機。
啫喱同小櫻佢哋唔喺度，佢哋返咗酒店休息？
我慢慢坐起身，唔想嘈醒小雲。
呀，竟然都會整醒佢。
佢見到我坐咗起身：「妳醒啦？妳應該會肚餓㗎喇。」
佢攞出一碗外賣：「哩度有碗粥，妳食少少啦，係啫喱佢哋買返嚟㗎。」
佢企起身：「我叫佢哋放心休息，有我喺度陪住妳。」
我一邊食，小櫻講：「妳唔好再返轉頭，唔好再諗傻事，知嘛？所有嘢已經過咗去㗎喇，唔好再折磨自己啦，知嘛？我見到妳咁我都心痛㗎。」佢講到喊咗出嚟。
我都喊咗，但係唔係因為痛而喊，係為咗小雲。
我放低手上嘅嘢食，捉住佢隻手：「小雲，多謝妳，妳已經幫咗我好多㗎喇，我實在欠咗妳太多。」
佢雙手捉實我：「記得呀，唔好放棄自己，我唔想冇咗妳哩個朋友。」
我攬住佢個頭：「小雲，多謝。」
佢喊住咁笑：「妳太高啦。」
護士之後入咗嚟，知道我冇咩大問題之後，小雲同我做埋出院手續，我出咗院。
小雲拖住我隻手：「行囉，我哋先返妳住嘅酒店，同啫喱佢哋會合。」
我帶住佢，一路我同佢講：「我哋唔好再講咁多傷心事，難得連妳都過埋嚟，今日我哋一齊玩！」
佢笑笑用頭撞一撞我膊頭：「係啦，高妹。」
其實我心情點會咁快返番嚟，我想分散注意力，唔去再回憶，想封印哩啲地獄感覺。
我亦都開始明白點解我會對子恩嘅往事咁大反應，因為我係將佢所有負面回憶一次過load機，仲要係因為佢前度嘅出現將個缺口一次過打開。
即係要你一次過睇晒你唔鍾意睇嘅、令你唔開心嘅嘢，真係攞命。
記得之前同佢傾過，我哋係知道晒對方嘅所有嘢，毫無保留，就算深層嘅一切都係。
佢嗰刻仲笑笑口同我講佢啲黑歷史仲勁過我啦。
我真係唔知佢如果知道我知道咗佢嘅事會唔會有咁大反應，佢會點諗。
我唔想諗，我都唔會講，我唔想佢再痛。
返到酒店，我打開咗門，見到啫喱佢哋兩個都仲瞓緊。
真係吖，佢哋可以唔駛咁㗎，都係我衰，連累佢哋咁辛苦。
我慢慢走到床邊，調整心情，一次過拍晒佢哋兩個屁股。
佢哋一齊彈起身，一見到我，兩個一齊攬住我。
啫喱仲即刻喊出嚟：「擔心死我啦！」
我拍一拍佢：「冇事啦。」
小櫻話：「我俾妳喺醫院嘅反應嚇死，我第一次見妳咁。」
係，我係未試過喺佢哋面前咁樣，係成個人崩潰咗。
我話：「冇事啦，有小雲喺度陪我，冇事啦。」
啫喱話：「真係冇事？」
我點頭：「嗯，你哋放心啦，我真係真係冇晒事啦。」
佢哋望到小雲都喺度。
啫喱問佢：「小雲妳應該冇訂酒店？」
小雲苦笑：「咁到俾妳估到。」
我同小雲講：「反正哩間房係有兩張床，妳都住埋喺度啦。」
小櫻話：「係囉，反正有位。」
啫喱跟住講：「妳都成晚陪住阿恩，都冇好好休息，妳嘅行李呢？妳去沖個涼啦。」
我望一望佢兩手：「小雲，妳唔好同我講⋯」
佢繼續苦笑：「我係直衝過嚟，除咗護照咩都冇帶。」
我衝到佢面前：「傻豬嚟㗎。」
我捉咗佢去沖涼房：「我哋一齊啦，反正住咗一晚醫院，都要沖番個靚涼。」
小雲俾我除佢衫：「夠唔夠衫換㗎？」
我笑：「夠，點都夠，妳著住我嘅先囉。」
佢笑：「妳個女巨人啲衫邊啱㗎？」
我冇理佢，剝光佢之後，我除埋衫褲，拉咗佢入沖涼。
佢望住我嘅身體：「恩，妳又瘦咗喇。」
我拍一拍個肚：「邊有呀，嚟啦我幫妳洗頭。」
小雲喺髮長過肩，平時會載住副圓眼鏡，所以我一直嗌佢小雲唔會冇原因嘅。
仲要佢個名都有個雲字。
佢又望一望我：「妳個胸大咗？」
我望一望自己：「我唔知喎，我邊會留意自己個胸大細㗎。」
佢出手一揸：「妳個身材真係令人妒忌。」
俾佢咁揸，感覺好酥癢：「妳咪咁啦。」
我快手沖埋個涼：「乾淨晒啦。」
我同佢講：「妳都快啲啦。」
我係赤裸咁衝返房：「女巨人嚟啦！」
啫喱俾我嚇親：「Eren！救命呀！」
我撲向啫喱：「嘩，咬死妳，哈哈！」
我有哩班朋友真係好好，我真係好鍾意佢哋。
我竟然又諗唔想變番原本嘅我。
我居然想繼續喺哩個身體生活落去。
究竟，我個心態點解會咁樣變緊嘅呢？
其實我一直有意識我仲係男仔。
但係我唔知點解，做女仔咁舒服？除咗嚟M之外。
定係，哩個身體慢慢咁影響緊我？ 睇嚟要同子恩再傾傾。
我哋四個女仔喺台灣玩多咗一日。
盡興過，燃燒過，將一切嘅唔開心活埋晒佢。