不如我們分開一年，好嗎？: 第十一章

本來我以為暑假迪士尼必定人頭湧湧，可是我錯了。今天看來不算太多人，我們很快就買到門票……是詠琳很快就買到門票。

「我爸爸俾咗錢我，你唔使出錢買飛喇。」詠琳說。

「吓？咁點得㗎？」

「唔緊要啦，冇理由叫你陪我但係又要你自己出錢吖嘛！」

「係啫，我過意唔去……」



「咁啦，你陣間請我食飯當無數？」

我在她半推半就之下，終於答應了。

「去玩小小世界！」詠琳甫進場便一支箭跑走，我只好急忙地跟着。

走進小小世界的世界，傳入耳中當然是那熟悉的歌聲。

「世界真細小小小 小得真奇妙妙妙



實在真係細世界 嬌小而妙俏」

詠琳一直跟著音樂和唱，像極一個小學生。

「好啦好啦，我地第一個會去嘅地方係邊度呢？就係……美州喇！」她沿途一直當嚮導。其實這個遊戲真的好無聊，不過既然她喜歡，那就算吧。

「去搭船！」

我又跟著她走去搭船。



「你估我地會遇上啲咩呢？」詠琳問我。

「你未玩過架咩？」聽說女孩子每年也要去三四次迪士尼……？

「玩過呀！不過投入啲好玩啲呀嘛！」

然後她投入得被那下爆炸聲嚇到，我忍不住笑了出來。

「笑咩喎？！」

之後我們就去了玩巴斯光年。

「你陣間唔好同我同一架車呀，如果唔係我會俾你轉走晒所有得分位！」

最終她不又是輸掉了……



「Space mountain！」

這個飛越太空山對於我來說當然是輕而易舉，猜不到詠琳也完全不覺刺激。「冇料到嘅？」

「畀小朋友玩係咁架啦。」

「我地去睇巡遊囉！」

其實我覺得巡遊還是晚間看比較精彩，烈日當空，什麼燈飾也失色了。既然巡遊不太好看，我決定看詠琳。

「唉呀唔記得影相添，望鏡頭！」

「今次係咪又唔可以post架？」



她顯然沒料到我這樣問，猶豫了一會。

「呃……最好唔好啦，不過其實都可以嘅。」

到底有什麼原因令她這麼顧忌？

我就一直煩惱著這個問題，接下來我們好像玩了很多東西，但是我全部都忘記了。總之我們在天已經全黑的時候才離開。

「喂，好似有啲唔開心咁嘅？」搭地鐵的時候詠琳問我。

「唔係呀。」

「擺到明係啦，話俾我聽咩事？」

「玩到有啲攰啫。」



「你唔講就算啦……返到樓下食個飯先散好冇？」

「好呀。」

「攞你部電話嚟吖！」

「做咩？」

「攞嚟先啦！」

我還是給了她，然後她按了幾按就交給我了。我沒有理會她做了什麼，便直接把電話放進口袋中。

晚飯也是匆匆吃過，然後我便回家了。



「你真係唔知我頭先拎你部電話做乜？」離別前詠琳問我，我搖搖頭。

「係咁你返到屋企要睇下電話喇！」

我回到家中，發現我那十年也不用一次的facebook帳戶彈出了通知。詠琳把我們的合照上載了，然後我的帳戶給了個心心，再留言了「#firstlike」。

你說，我怎麼可能生她的氣？