不如我們分開一年，好嗎？: 第十二章

迪士尼的那一次，也是我在暑假最後一次見詠琳了。剩下來的時間，我都是在家看書。

「聽日開學喇 :(我好想繼續放假」今天是最後一天，詠琳這樣跟我說。

老實說，我對開學與否沒有太大感覺，反正開了學也是沒娛樂，放假也是沒事做，沒有太大分別而已。

我:「我有啲期待返學」

詠琳:「其實我都有啲期待，不過係唔想起身啫」



我:「都啱」

詠琳:「係喎你平時要幾點出門口架？」

我:「6:45左右，通常6:50會有班車」

詠琳:「好早……我通常7:15先出門口」

我:「要搭巴士無辦法啦」



詠琳:「係咁早啲瞓啦，聽日見！」

我:「早抖」

慢著……為什麼明天會見？？

可能她打錯了吧，沒關係，還是養精蓄銳，迎接新學期的來臨。

＊＊＊



新學年開始，我依舊等巴士返回學校。

「早晨！」

我回頭一看……

「唔係你爸爸車你咩？」怎麼詠琳會出現的？？

「想見你囉！」她笑說。

「認真啦。」

「我講真㗎！我同咗老豆講話以後唔使車我㗎喇，所以你每朝都要見到我同陪我傾計！」

她在新學年給了我一個超級美好的開始。



從沙田到港島的車程很長，不過今天我覺得車程太短了。

「聽日見啦，拜拜！」終於要下車了，詠琳跟我道別。

「拜拜！」

回到學校，文謙上下打量了我三秒，然後問:「你今日有啲唔同。」

「有咩唔同？」

「如沐春風咁喎！有進展？」

我把詠琳刻意等我一起搭巴士的事告訴了他。



「你係咪鍾意人㗎？」

「係呀。」

「人地都做到咁你仲唔去馬？」

「都唔知佢點諗……」

「一個女仔肯同你去書展，又叫你陪佢去迪士尼，而家仲特登同你一齊返學，你話佢唔鍾意你我都唔信……咁當然我唔排除佢收緊兵。」

「咁我唔知佢係咪真係收緊兵……」

「有好多特徵嘅，譬如話如果佢真係收緊兵，佢唔會想畀人知你地兩個自己去玩。」

「佢有叫過我唔好post我地兩個嘅合照……」



這就是我一直也掙扎的原因。

「但係佢唔係最尾都post咗出嚟咩？」

「所以我真係唔明佢諗緊乜。」

「唔……我覺得佢係對你有感覺，不過可能屋企人唔俾佢拍拖……？」

「我見過佢老豆，好nice，完全唔似思想好古板嘅人。」

「你見埋家長添呀？？係咁佢九成九係鍾意你喇！」

「我哋去迪士尼，咁啱佢順路車我地啫。」



「信我啦，你放膽少少追佢就得架喇……佢無男朋友架可？」

「唔知喎。」

「有無搞錯……」

「係咁我試下問下佢啦。」

「我唔覺得你夠膽問囉。」

又給他說中了。

愛情，也許就是一場不合邏輯的偵探遊戲。