不如我們分開一年，好嗎？: 第三十章

我和詠琳一起步向巴士站。

「你學校都幾多靚仔架喎！我頭先喺你門口企咗一陣，都已經見到有好幾個！」

「係咩……？」

「係呀，不過可惜吖，點解你唔係其中一個呢？」

「無計啦，我都唔想……」





「不過你夠細心就得啦！」

「係喎，今晚到底有咩食㗎？」

「梗係唔話俾你聽住，賣個關子先！」

她賣關子就意味著我不斷幻想會有什麼食物……算了吧，我對美食沒有太大追求，反正這餐的意義大於一切。

詠琳說在自己的廚房煮食比較得心應手，因此我們雙雙上了她的家。





「你隨便參觀啦，當自己屋企就得！」詠琳說完這句，就走進自己房間更衣。

情人節那天上來詠琳的家，我緊張得不敢亂動。跟她相處了這麼久，這次我終於能好好的參觀一下。詠琳家的客廳放置了幾張她和家人的合照。不知道我又有沒有機會成為這些合照的一份子呢？

詠琳從房間出來。「我細個係咪好得意呢？」她見我在看她的照片，便這樣問道。

「而家都好得意！」我笑說。

「咁就梗係好得意啦，呢啲嘢就唔使你講嘅！入嚟我間房吖！」





詠琳的房間沒有我想像中的大，但是設計很典雅。書桌對著窗台，衣櫃則放在書桌旁。書桌的另一旁就是她的床，我看著她的melody床單，忍俊不禁。

「笑咩喎？咁我真係好鍾意melody吖嘛！」

「女仔果然係女仔……」

「我唔理你喇，出去煮飯先！」

我坐在詠琳的書桌前，準備做功課。但是詠琳剛脱下來的校服就恰好掛在我旁邊，撲鼻而來的芳香擾亂著我，使我完全無法專心。

「個廚房真係有啲熱，都係呢度涼爽啲！」詠琳又走進來了。

「梗係啦，呢度開咗冷氣。」

「係喎，我套校服會唔會阻住你？使唔使攞開少少？」





「係就最好啦……」

「不如你試下著我套校服，睇吓會點？」詠琳忽然提出這個奇怪的建議。

「唔好喇……點解要咁做？」

「你唔想咩？有得著我啲衫喎！」

「我無咁變態……」我無奈地說。

然後她一躍坐在床上，看著我做功課。

「你咁望住我我點做功課呀……」我說。





「兩樣嘢好似冇抵觸㗎喎！你有你做功課，我有我望住你囉！」

「我會俾你影響到架嘛……」

「乜原來你定力咁差架？」

我無話可說。不過她還真的不走，坐在床上按電話。我很努力地專注在我自己的功課上，但我當然失敗了。

「好啦，我投降，真係做唔到功課。」

「有無聽過呢首歌呀？」詠琳坐近床邊，拿著電話俯身問我，然後播放着一首很奇怪的歌。

「是但求其愛？愛點可以是但求其架？」

「你聽下先啦，呢首歌啲歌詞語帶雙關，寫得好好架！」





「唱果個把聲咁熟口面嘅……？」

「陳奕迅嚟架喎，你唔認得？」詠琳有點驚訝地反問。

我搖搖頭。「我都唔聽歌嘅。」

「好心你有時間就上下網，update下自己啦！」詠琳笑說。「你攞我部電話上youtube睇下我聽過啲咩歌，我去睇火先！」