［科幻有甜］《一場末日危機，令患上中二病的我變成救世者》18+: 第十七章：老洞

加入成為潛伏者？到底要做啲乜㗎？有冇危險㗎？關於超能力嘅野我識條毛.......
「就等我帶你去見一個人，到時你自然會明。」夏娃講到呢度，突然有部深綠色Mini Cooper嚮遠處逐漸駛近，然後就喺我哋面前停低。
「係時候上車啦。」
我心諗：算吧啦，上太空又試過，死又死過，我相信依家冇野會嚇倒我。難得夏娃誠意邀請，姑且俾佢再呃多次，最多死完再同佢中出過。
「我哋依家要去邊？」雖然一路都唔駛點講夏娃就估到我心諗乜，但見有司機我決定開口問。
「等陣你就知。正太，開車。」同我一齊坐喺後座嘅夏娃開口叫司機開車，原來司機係個細路！
嘩！你班人有病㗎？俾條毛都未生齊嘅細路開車？
「佢雖然叫正太，但其實係由AI控制嘅全自動機械信差嚟，佢哋同時兼具人類嘅面孔同辦事能力。機械信差嘅任務主要係幫潛伏者協調所有喺地球上日常嘅工作。」夏娃竟然可以一臉淡定咁講。
連複製人都見過嘅我，機械人已經唔算得有咩奇怪。話時話，雖然正太係機械人，但佢手車原來好得，架車話咁快就入咗元朗，去到一處偏僻嘅地點然後停低。



「我哋落車。」
落車？附近山頭野嶺咁款到底去邊樹？
「喺前面有個溶洞，我哋一齊入去。」夏娃講完，隨即帶領我哋三人嚟到一處掘頭路，然後對住前面嘅石坡做咗個手勢，石坡中間忽然多咗道門俾我哋入去。
溶洞？唔通家陣我哋入去打野戰？
「呢度下面有個地下溶洞，我哋叫佢做老洞，係我哋潛伏者喺香港最大嘅地底基地。」夏娃講完之後，就指示正太用手電筒照清前面條路俾我哋行，入面係一條好窄嘅石級路，一路通往下面，天花仲有啲一枝枝向下嘅鐘乳石，側面又有條好急嘅水流，可以話一步一驚心。
點知行咗二十分鐘左右，裡面竟然豁然開朗，而且燈火通明，最離奇嘅係入面居然有建築物！