［科幻有甜］《一場末日危機，令患上中二病的我變成救世者》18+: 第十八章：上帝之子

喺地下溶洞裡面原來有一座氣勢磅礡嘅巨型白色圓頂建築物，外表非常古怪，教堂唔似教堂，劇院又唔似劇院，總之你會體會到一種神聖不可侵犯嘅莊嚴感覺，即時令我O晒咀。就係咁，我同夏娃、小白以及正太由特別通道繞過周邊嘅保安設施去到一道門，夏娃對住道門做咗個手勢後，大門就開咗，喺小白帶領之下，我哋一齊進入建築物內部，入面光線充足，整個內部結構由螺旋形嘅白色牆身組成，結構牆同時分隔出不同嘅空間，四周圍有好多著住白袍嘅人用緊一啲疑似係VR眼鏡嘅器材做野，牆壁上仲有一啲我睇唔明嘅符號。

我哋沿著一條走廊一直上，穿過唔同嘅區域，然後進入最內部嘅大廳。好奇怪，當我抵達大廳嘅時候，心情立即變得輕鬆舒暢，好似有人呼喚緊你，令你摒棄心中嗰種邪惡嘅雜念，我咁大個仔都未試過心境咁平靜。
「我哋到啦，佢依家企喺你嘅後面。」夏娃叫完我之後，我身後唔知幾時開始突然多咗個人。
我即刻擰轉頭，點知後面真係多咗個人，佢嘅出場簡直好似上帝下凡一樣。
「先生你係？」我鼓起勇氣去問面前呢個神出鬼沒嘅人。
「你可以稱呼我做彌賽亞。」嗰個人好簡單咁講咗一句，但唔知點解我聽落感覺好隆重。

好奇怪，個大廳話大唔大，話細唔細，入面得一張書檯同一張梳化，周圍好空曠，而且我入嚟嗰陣明明乜人都見唔到，但我竟然冇懷疑到佢係鬼。
「彌先生，你個樣好親切，好似喺邊度見過你.........」


「佢就係教堂入面經常出現喺十字架上面嗰位。」夏娃正式向我介紹對方。
「OMG.........你係.........JESUS!」
「你都係叫返我做彌先生啦，自從我死後用生物打印機還原我個身體，之後成二千年都冇人認得我，呢個秘密亦都係只得一直跟隨我嗰幾個使徒知道。」面上留有濃密鬍鬚，金髮藍眼，身穿神父衫嘅彌先生講野嘅同時，頭頂出現咗一個光環，原來擁有超能力嘅上帝之子竟然係潛伏者之一！