哦,原來夏娃今日專登帶我返新工見老細,仲要我老細係耶穌,咁又真係幾架勢喎!但點解佢要同我講咁多神魔鬥爭嘅野?我根本都幫唔到手........
「夏娃已經同我報告咗你同佢喺方舟號上面發生嘅事,對於你勇於犧牲嘅精神,我非常欣賞。至於你以後嘅任務,放心,我哋會量力而為,夏娃會幫你適應新環境同訓練你嘅。」彌先生笑笑口咁講,原來佢份人都幾親切,唔似聖經寫到咁嚴肅。
「彌賽亞,我懷疑日光同月闇已經投靠咗撒旦,理由係當我剛剛由方舟號脫身返地球冇耐,月闇好快已經喺我重生嘅位置再次出現向我偷襲,以佢哋屬於方舟號工作隊伍嘅身份,根本冇可能擁有備份數據同進入潛伏者專用生物打印機網絡嘅權限,唯一合理解釋係佢哋先前同撒旦串通咗。」
「夏娃,我同意妳嘅睇法,所以暫時要將所有地球上嘅生物打印機網絡停用,並且委派機械信差重新檢查每一部機嘅保安系統,確保佢哋無法再次入侵。」彌賽亞講話時處處表現出領袖風範。
「明白。我已經委派咗機械信差檢查喺香港嘅所有生物打印機,因為成個過程必須秘密行事,其他位於世界各地嘅生物打印機需要較多時間去完成檢測,我會留喺度負責聯絡同跟進。」
吓?檢測生物打印機?外星科技文明嘅野我識條鐵咩.........
「阿當請放心,我已經安排咗另外一個機械信差喺我留嚮總部嘅時候專門負責訓練你,佢仲會同你一齊參與任務。」俾夏娃突然咁講,我當堂唔好意思。
培訓?仲要係機械人?唔好啦呱.........我睇見嗰個正太成個細路仔咁款,我仲要跟佢學野,勁瘀皮囉..........
「呢位兄弟,我哋潛伏者喺地球上嘅活動因為唔方便每個場合都親自參與,所以發展咗好多種唔同型號嘅機械信差,去符合每一種實際需要。佢哋其實係我哋嘅助手兼拍檔,你正話經過出面大堂時見到著住白袍嗰啲人全部都係機械信差,佢哋好幫得手,你大可以放心同佢哋合作。」約翰講說話時托咗一下眼鏡。
「你個機械培訓員已經喺出面等緊你,就等我帶你去見佢。」夏娃同彌先生以及三位使徒行咗個禮,然後帶我離開大廳。



我同夏娃沿路落返大堂,再直接走落地牢,嗰度放咗好多唔同款式嘅機械信差,但最攞命係個個樣衰夾核突,半路中途仲有個小丑打扮嘅機械人嚮我身邊經過,佢對住我咧嘴而笑,唔知點解喺嗰刻我個心離一離,求神拜佛咁望夏娃唔會整蠱我。經過一個維修工場之後,我哋兩個終於嚟到一間大房門前,房門寫咗四個大字:危險勿進。夏娃對住大門做咗個簡單手勢,房門就即時打開,入面黑麻麻,有種生人勿近嘅感覺。隨住天花燈亮起,內裡原來有個穿高踭鞋嘅女仔,個女仔童顏巨乳,一把棕色頭髮嚮後面束起馬尾,重點係佢身上竟然連遮醜布都冇塊,就咁著住一件黑色馬甲內衣連吊帶襪褲!
「佢叫蘿莉,係屬於你嘅專用機械信差兼培訓員。」夏娃笑笑口向我介紹對方。
已有 0 人追稿