［科幻有甜］《一場末日危機，令患上中二病的我變成救世者》18+: 第十九章：大審判日

就喺呢個時候，彌賽亞身邊失驚無神多咗三個身穿奇裝異服嘅人，佢哋喺大廳唔同嘅方位不約而同咁出現，就好似魔術師突然現身咁款，當堂嚇到我個心離一離！
「唔駛驚，佢哋係彌賽亞身邊其中三位使徒，分別係：彼得、約翰同馬太。」夏娃立即開口向我介紹佢哋。
十二使徒？吓，乜唔係死咗嘅咩？點解仲生勾勾企嚮度？
「自從彌賽亞嘅肉身復活之後，我哋十一人都加入咗潛伏者組織成為成員，但由於有大部份使徒喺同魔鬼嘅漫長戰鬥中不幸犧牲，去到最後，亦只剩低我哋三人可以利用生物打印技術一直維持肉身。」身穿裝甲戰衣，身材最高大，體格最強壯嘅彼得首先開口，話時話，原來彼得個樣生得好英偉，就好似美國隊長咁。
十一人？乜唔係一共有十二個咩？
「當日背叛彌賽亞嘅猶大最終歸附咗撒旦，佢加入由撒旦所成立嘅組織，並且一直存活至今。」配戴圓框眼鏡，身穿潮服，一把長髮及肩，長相跟約翰連儂一模一樣嘅約翰補充道。
撒.......撒旦？乜真係有撒旦㗎？佢唔係嚮地獄咩？

「呢位兄弟，其實我同撒旦都係早期嚟到地球嘅潛伏者，因為我哋對於生命嘅睇法唔同，最後撒旦選擇背棄我哋，並且計劃以統治地球為目標。」唔駛我問，彌先生立即開口答，原來佢同一班使徒都一樣知道我心諗緊乜。
成件事到底係點㗎？死啦，我唔熟聖經喎.......


「原本地球將會因為核戰而生靈塗炭，嚮大審判日後，剩餘落嚟嘅物種會喺三年內滅亡，所以我哋先會進行方舟計劃去保存地球物種，但係依家方舟計劃因為撒旦嘅野心而改變咗，核戰暫時唔會發生。」
咪住！撒旦改變咗啲乜野？如果冇咗核戰嘅話，意思即係一天都光晒，從此地球人咪唔駛死囉？
「呢個情況只對於人類以外嘅物種係好消息。其實撒旦一直都想統治人類，但奈何佢又唔敢明目張膽去做，所以佢發明咗一種病毒，一種足以消滅一半地球人口嘅病毒去控制人類，佢利用疫症大流行嘅契機去削弱各國政府嘅統治，目的係完成佢嘅陰謀。」
咩話？病毒？係咪武漢肺炎嗰隻呀？
「冇錯。我哋潛伏者守則係絕對唔允許成員介入其他文明嘅興衰演變，一旦撒旦成功嘅話，人類就會成為佢嘅奴隸，所以撒旦係我哋嘅共同敵人。」最後一個講說話嘅使徒係身穿黑色西裝嘅馬太，睇佢個樣眉宇之間充滿睿智，係表現最為穩重嘅一個。
「小兄弟，我代表潛伏者歡迎你嘅加入。」就嚮呢個時刻，彌先生突然講咗句令我呆咗喺度嘅話。