在科技館地牢內，陳蓮娜出現於氣派十足的會議室之中，與穿起男士西裝的日光透過巨型電腦屏幕舉行視像會議。
「地球人嘅科技比起我哋潛伏者根本就係小巫見大巫，只要生物打印機可以量產嘅話，我哋隨時都可以征服呢度。」螢幕中的日光向陳蓮娜說。
「要令生物打印機量產，仲需要多啲時間，但我目前已經取得進展。」陳蓮娜回答道。
「聽講閣下嘅進展啱啱被彌賽亞破壞咗。」
「雖然位於裡世界嘅數據閘門被彌賽亞搶返，但憑我哋現時嘅技術，要打開臨時嘅閘門都唔係難事。講真，要征服人類其實係唔需要出動潛伏者，只要世界各地嘅政商名人都被惡意靈體侵佔肉身嘅話，我哋就可以喺幕後控制佢哋，到時人類只會成為我哋嘅奴隸。」
「請問點樣令惡意靈體侵佔呢班人？」
「呢支綠色嘅藥水能夠將指定嘅靈體下載到生物載體之中，而我哋已經秘密咁將藥水混咗入去疫苗裡面，一旦被注射嘅目標佢哋嘅意識被侵蝕嘅時候，一般人只會以為係疫苗本身嘅副作用，但惡意靈體會隨住時間逐漸侵佔甚至驅逐目標人物本身嘅意識，將佢哋變成任我哋操縱嘅傀儡。」陳蓮娜將整支綠色的藥水在鏡頭前展示給日光觀看。
「能夠不費一兵一卒就可以奪取地球嘅控制權，果然高明！」
「所以我仲需要疫情蔓延多至少一年。」
「冇問題，呢層包喺我身上。話時話，關於撒旦大人嘅委託唔知妳辦成點？」
「要喺人類之中甄別出一個合適嘅處女成為奉獻俾撒旦大人嘅交合對象，從而誕生出撒旦之子去控制人類，呢個人選我已經搵咗好耐，可惜人間女子多數唔具備我哋潛伏者嘅智商，而且呢個女子仲要識得穿梭陰陽兩界，令撒旦大人可以同佢靈慾合一，雖然我已經派遣靈探去為我搜羅，但我相信仲要花多啲時間。」話畢，陳蓮娜點起香煙並且吸食起來。
「其實有錢就得，人類唔係正正有妓女呢個職業咩？」初到地球的日光對人類這種生物感到非常好奇，於是興致勃勃地問道。
「撒旦大人最憎嘅就係妓女，咁係因為佢哋除咗賤格之外，另一個原因係撒旦大人曾經被妓女背叛過。」