今日,我響老洞地牢同蘿莉一齊練習人體射擊,嗰度係一個室內野戰房間,有齊晒一切訓練設備,入面個佈置仲設計到成個實戰場景咁。正當我哋全神貫注嘅時候,彼得突然衝入嚟,面上擺出一副十足尋仇咁嘅樣。
「咦,彼得兄咩事咁㷫?」
「哼!你個叛徒,到底捉咗約翰去邊?」
「咩叫捉咗約翰去邊?我都唔知你講乜......」
當我上前欲查詢究竟嗰陣,佢粒聲唔出忽然用絕技「太古之魂」對準我心口出招,好在我閃得快,拳頭一野打咗落去大門並即時「膨」一聲穿咗個大窿。就喺我成功避過佢凌厲嘅攻擊之後,緊接落嚟佢馬上打出第二下攻擊,嚮呢個時間,反應快嘅蘿莉立即衝過嚟接佢第二招,結果即時成個人被彈飛埋牆角,衝力之大令到佢趴喺地下再企唔返身!

「叛徒,快講,你係咪唔信我會殺你?」彼得怒氣沖沖咁講。
「彼得,到底發生咩事?」夏娃突然喺門後出現,並且檢查蘿莉傷勢。
「約翰入咗去科技館之後就失咗蹤,佢腦海最後嘅一段留言訊息係撒旦。」
「撒旦?冇理由,撒旦同佢哋班同黨依家應該仲喺美國,況且我相信阿當,佢係唔會出賣我哋嘅。」夏娃先扶起蘿莉,然後一邊講,一邊分開我同彼得。


「我查過呢個人,佢尋日打過電話去姓洛嘅屋企,係佢通風報信。」
「你咪屈我,我打俾我妹話俾佢知姓洛嘅唔係好人,叫佢快啲執野走咋!」
「你講我就要信?」
「彼得,如果真係科技館嘅人捉走咗約翰,我哋大不了一齊攻入去!」

彼得冇理到夏娃,隨即衝前想向我出手,雖然夏娃一手擋開彼得,可惜佢唔夠力抵抗彼得嘅力量,仲成個人反彈埋我身,我唔想佢受傷,唯有攬實佢!就喺呢個時候,佢好冧咁望咗我一眼,原來佢為咗救我可以去到咁盡。
已有 0 人追稿