當我以為成件事冇轉彎餘地嘅時候，一下強光喺我眼前閃過，之後馬太同彌賽亞忽然現身。原來彌賽亞同佢班使徒全部識得隱形，怪不得佢哋經常神出鬼沒。
「彼得停手！」彌賽亞突然間發出鏗鏘之聲，逼使彼得中途撤招。「你唔好怪呢位小兄弟，所有野其實都係由撒旦搞出嚟，佢故意挑釁，目的係想離間我哋。我哋一定要守望相助，唔好再中佢計。」彌賽亞用神嘅語氣同彼得講。
「但係約翰依家下落不明，我唔可以見死不救。」
「如果約翰真係死咗嘅話，我哋反而可以透過生物打印網絡重組佢身體，依家佢應該被人囚禁，目的係想引我哋上釣。」
「咪住，如果洛不凡背後真係有撒旦嚮度撐腰，咁點解撒旦唔直接現身？反而我哋要怕咗佢而縮埋嚮度？」為咗曉彤安危，我決定爆響口。
「小兄弟，有啲野唔方便直接同你講明白......」馬太突然開口阻止我問落去。
「馬太，由得佢。佢依家已經係我哋潛伏者其中一員，反正件事遲早都要同佢講，早講總好過遲講。」彌賽亞突然用返人嘅口吻繼續講落去：「其實我依家嘅力量已經步向式微，今時唔同往日。」
「吓，點解會咁......你係神，有好多人崇拜緊你。」
「小兄弟，呢個只係一個品牌效應。你叫我出嚟認做上帝之子，你估世人會信咩？」
「你二千年前已經出現過一次，你可以施行神蹟，證明你真係存在嘛？」
「今時今日，一定會有科學家出嚟求證，唔通你叫我承認潛伏者對地球所做嘅一切？」彌賽亞邊講邊啟動身邊嘅流動生物打印機，再喺我面前將五餅二魚複製咗前後兩套一式一樣嘅食物，最後將個餅遞俾我食。
我咬咗個餅一啖，再望住佢講：「既然係咁，點解你二千年前要出現？」
「當年我嘅出現，只為咗執行一個任務，就係消滅撒旦，結果俾我成功做到，但卻換嚟慘痛嘅代價。」彌賽亞一臉欷歔咁講。
「乜原來撒旦已經被消滅？但據我所知佢個身體仲喺美國，咁係咪話佢偷偷儲存起生物數據同用咗生物打印機複製自己？」夏娃突然問起。
「錯。撒旦嘅肉身的確已經唔存在，依家身處美國嗰個話事人其實係佢替身。事緣當年我同撒旦大戰咗好耐，結果佢個肉身連同所有生物數據都被我徹底消滅，最遺憾俾佢個靈魂走甩。後來，估唔到佢竟然上咗我妻子身，亦即係抹大拉的馬利亞嘅肉體嚟對付我。我當時為咗消滅撒旦，逼不得已向馬利亞出手，目的係為咗驅逐撒旦嘅靈魂，但撒旦嘅魔力竟然一再增強，馬利亞為咗急於救我，佢先消除晒自己嘅生物數據，然後再跳入火山口，寧願自己灰飛煙滅都要同撒旦同歸於盡，可惜事與願違，馬利亞結果白白犧牲，而撒旦嘅靈魂又再一次走甩。」彌賽亞講完自己嘅家事之後，一直低頭祈禱。面對喪偶慘劇，我感覺佢一直都強忍內心嘅痛苦。
「夏娃，妳依家應該明白點解彌賽亞永遠唔提起自己嘅妻子。」馬太喺彌賽亞身邊講。
「我一直都以為馬利亞係病死，點知原來.......」
「撒旦利用馬利亞去打擊彌賽亞，係因為佢對馬利亞背叛自己懷恨在心，佢嘅目的除咗懲罰馬利亞之外，仲利用咗馬利亞嘅犧牲去令彌賽亞產生內疚同仇恨，而內疚同仇恨正正係侵蝕彌賽亞神聖力量嘅一種手段，受到孽障侵蝕，目前彌賽亞嘅力量已經大不如前，相反撒旦已經得到世俗人士同某啲政權嘅支持，要直接反擊佢會好困難，況且我哋唔可以被外界得悉呢個真相，所以只能夠用迂迴嘅方法。」馬太繼續講落去。