好快就到台灣,呀詩係未停定嘅時候已經蠢蠢欲動,呢個時期嘅我哋,無時無刻都掛住個笑臉。
 
落機佢就好似個好奇寶寶咁睇個不停,又周圍咁影,但呀詩嘅回眸一笑,會令我一世都難以忘記。
 
因為呢個笑容係失而復得嘅笑容,令我中間斷咗一年半左右嘅時間入面都魂牽夢縈,當我再次見返呢一個笑得咁燦爛嘅呀詩,我成個人雞皮都起曬。
 
呢一年嘅心酸唔知點解,此時此刻湧出嚟,想喊咁款。
 
「喂!!搞咩啊你?」呀詩用佢嘅笑容叫住我。
 




就算係咁,我都呆咗咁望住佢。
 
佢走過嚟拖住我,正想轉身行嘅時候,好似留意到我表情上嘅異常。
 
「做咩啊?唔開心啊?」
 
「唔⋯⋯唔係啊,好似有啲肚痛咋嘛。」我扮個肚痛樣。
 
「你快啲啦!子晴佢哋係出面等緊啦,頭先又唔去喎,依家我去完又話去。」
 




「咪又係因為等你去廁所!先咁耐咋嘛。」
 
我哋笑住咁打情罵俏,嗰種真實感先返返嚟。
 
我哋都係揀台北呢個最大路嘅地點,相信無邊幾個香港人無嚟過。
 
我哋擺低啲行李就即刻出發,除咗以前小學啊,低from仔嗰啲學校旅行,有成班人咁樣出去玩,會亢奮持續兩日之外,已經好耐無試過。
 
基本上由出發前一日開始,已經一路亢奮到依家,好似打咗啲興奮劑咁。
 




去台北101先,我哋落機已經晏就,去完一個地方就已經入夜,夜晚已經諗好要行夜市。
 
第一次可以同自己一路識開嘅朋友仔,仲要同女朋友,經歷咁多嘢嘅人,咁樣一齊去旅行,嗰種開心、興奮嘅心情,仲略略帶住啲幸福感。
 
好幾次我咁樣諗諗下,都毛管棟。
 
每去一個景點,我哋都有笑料,蕃薯仔都玩得好放,而且都好照顧子晴,呢一刻大家唔洗諗前面條路點樣行先好,唔洗面前殘酷嘅現實,好似去咗呢次旅行,就去咗一個夢幻嘅國度咁,終於有一個位可以俾我哋幾個逃避下現實。
 
雖然只係一刻,好短嘅日子,都足夠難忘。
 
甚至乎好想就咁停留係度,唔好返去,之但係,人總係會喺將來嘅時候先發覺,過去就好似一副畫咁,只會停留喺嗰個畫面。
 
「蕃!薯!仔!你幾時影㗎?」子晴呆咗咁望住自己嘅手機,厲聲問道。
 
「咩啊?」佢一臉無辜,佢無辜個樣真係好似一舊蕃薯,即使佢之前暑假高大咗,靚仔咗,但都係無變到。




 
「你睇下啊⋯⋯點解會有你兩個嘅相係我手機度㗎!」
 
「哦,你講緊嗰張啊,哈哈哈哈哈!」其實係我同蕃薯仔玩嘅,嗰陣佢幫緊子晴喺101上面影緊相,我行埋去睇下佢影成點,點知佢轉咗自拍,無影到子晴,睇一睇我同蕃薯仔嘅合照,都幾正啊。
 
「好耐啦喎,你依家先發現啊?」蕃薯仔果然係年少輕狂,唔係幾識死。
 
自從我同呀詩拍拖之後,把口都收斂不少。
 
「下?」
 
下一秒,子晴隻手用迅雷不及掩耳嘅速度嚟到蕃薯仔嘅耳仔隔嚟,一切嚟得太快,已經太遲了。
 
「啊⋯啊⋯啊啊啊啊啊!!痛⋯⋯痛痛痛!」
 




「我部手機係咁俾你污染㗎?」
 
「唔⋯唔係,我del,我del。」蕃薯仔求饒嘅樣,係好多港男嘅寫照。
 
我哋喺河岸旁搵個地方食掃街掃返嚟嘅嘢,我哋依家身處嘅地方係台北饒河街夜市,聽講呢個夜市幾大,我哋plan好最後返嚟嘅時候先再去士林夜市。
 
係,無錯。
 
係返嚟。
 
因為我哋唔諗住淨係留喺台北,諗住去埋墾丁!
 
——台灣最南部。
 
「算啦!」子晴鬆開蕃薯仔隻耳仔,「男仔係咁幼稚㗎啦。」




 
但子晴雙眼無離開過張相,睇得津津有味。
 
「係囉!」呀詩係我隔離講。
 
「我哋係增添樂趣咋!你識咩啊。」
 
饒河街夜市除咗好長之外,去到中間有條路可以行出去,本來我哋諗住搵個位坐低食,但意外嚟到呢個情人橋。
 
情人橋下面係一條長長嘅河流,我哋就咁沿住河岸一邊行,一邊食住頭先一齊買嘅嘢食。
 
個河岸嘅夜景認真靚,唔係講笑,誤打誤撞搵到呢度,呢種旅行嘅驚喜真係令人好陶醉。
 
「你睇下佢哋兩個,平時收收埋埋咁,依家幾鬼痴纏,幾鬼恩愛?」呀詩撓住我隻手,等緊我餵嘢食俾佢,懶到佢。
 




「梗係啦,佢哋依家唔一次過爆曬出嚟咩,可能佢哋今晚忍唔住會⋯⋯」我做出一個雙手合十嘅動作,然後不停地快速拍掌。
 
啪啪啪啪啪啪⋯⋯
 
外加一記壞笑。
 
「你個腦淨係實諗埋呢啲嘢㗎咋!」呀詩講就咁講,但個樣就眉開眼笑。
 
「我哋今晚唔可以輸㗎!!!」我用挑逗嘅眼神望住佢。
 
「屌你啦!邊個同你咩⋯咩啊?」呀詩反擊,但軟弱無力,雙頗稍稍泛紅。
 
「係咩?」我串返佢,然後⋯⋯
 
就打我啦。
 
「喂!你兩個,做咩行咁慢啊?」佢兩個都行到好前,然後喺前面嗌返我哋轉頭。
 
如果呢個時候,有另一個鏡頭影住我哋,我哋可以望返我哋嘅話,我相信見到呢個畫面,會係一個幸福嘅畫面。
 
唔知配咩音樂先最啱feel呢?
 
反到酒店,喺㗎𨋢度,我問道:「咁一陣係去邊個間房?」
 
我以為⋯⋯以為大家咁樣出到嚟玩,會預咗大家聚下,飲下酒吹下水,又或者玩下game。
 
難得我嘅想法都轉變咗,適應咗,但點不知,呀詩用手肘撞一撞我,而且子晴同蕃薯仔都無咩反應。
 
我先明白⋯⋯
 
屌!!仆街,原來大家都明,今晚係屬於另一半嘅夜晚,而我頭先問咗啲唔應該問嘅嘢。
 
唉,喊出嚟,有點柒。
 
「啊~仲有啲餓添,想食啲先。」我兜。
 
「咁食完先囉,哈哈!」子晴笑笑。
 
各自回房休息,今晚睇嚟係一場持久戰。
已有 0 人追稿