《我的MK妹同桌》第二季: 51

可能頭先我諗多咗，個文青女孩無乜特別嘅舉動，就算有，都已經好難牽起心中嘅漣漪。
 
一齊耐咗，甚至係慢慢大個，會越嚟越難搵到一個令你心動嘅人，就算當初令你心動嘅人，都可以一樣無咗以前心跳加速嘅感覺。
 
一完咗，我就慣性咁打俾呀詩。
 
「喂？」另一邊廂，我知呀詩聽日就去Ocamp，隱約係電話入面聽到啲吵雜聲。
 
「執緊嘢啊？」我問道。
 


「係啊，執完就一陣出唔出嚟食個糖水？」難得呀詩主動約我，我爽快地應承咗。
 
一邊講，架巴士都慢慢埋站。
 
個文青女孩抬頭望一望，望向駛緊過嚟嘅巴士一眼，同時亦都望到我。
 
佢撥弄一下頭髮，錯愕地望住我，跟住展露出一個有禮嘅笑容。
 
「咁食邊間啊？」喺電話裡頭，呀詩問我。
 


「嗨～咁啱嘅？你都係住港島東？」文青女孩叫Gigi，後來知道佢中文全名叫莫曉嵐，聽落好似幾男仔，女仔又得咁⋯⋯特別得嚟又同佢個style幾夾。
 
電話入面嘅呀詩靜咗落嚟。
 
「係啊。」我都有禮貌地笑住回應。
 
一息間嘅時間，唔會傾到啲咩，各自啪完八達通就上車，佢就往下層嘅位置行去，而我亦唔想引人誤會，就坐咗去上層。
 
電話入面呀詩都無出聲，我心知不妙。
 


仆街啦⋯⋯