「食你屋企附近嗰間?」我知大鑊了,所以好溫柔咁問。
 
「⋯⋯」一陣沉默。
 
「唉⋯⋯」我嘆一口氣,同時其實又有啲開心,覺得呀詩會咁樣呻醋都係因為在乎我。
 
「唔好嬲啦,嗰個女仔係頭先食飯識嘅,咁啱大家都係搭同一架車,未同你傾電話前都無講啲咩,而且你聽唔出有啲尷尬嘅咩?」我解釋道,儘可能透過詳細嘅解釋,俾多啲安全感佢。
 
「哦!係咩?」呀詩嘅語氣好鬼調皮,隔住個電話都feel到佢係度扭計。
 


「啱啱新識嘅女仔都好呻醋啊?」我問佢,一副無咁好氣,哭笑不得嘅表情。
 
「唔得啊?」呀詩反問。
 
「得得得,你話點就點啦。」我已經忍唔住笑出嚟。
 
「你聽日去Ocamp啊,我仲有排呻醋添啊!」
 
中學嗰陣擔心我哋兩個將來點呢,會唔會行到最後,最大嘅敵人係誘惑,我驚呀詩多過我自己。
 


我呢啲毒撚邊有人鍾意啊?反而呀詩越嚟越靚,越嚟越脫走陣MK味,越嚟越成熟,個個見到個毒撚係佢男朋友,一定覺得自己有機會,嗚嗚嗚⋯⋯
 
有時候會覺得,我哋好可能就咁收皮,始終唔係有心就解決到嘅問題。
 
但依家慢慢覺得,或者我哋其實無想像中咁脆弱。
 
呀詩其實好緊著我,呢種在意唔係扮,我知出面個世界好多都係呃呃氹氹,拍個拖係考驗自己嘅演技同埋偵採技巧。
 
所以一定程度上,佢俾咗好多安全感我,亦因為咁,我願意傾盡自己所有。
 


我哋上車就傾住電話,落車我哋都仲係傾住電話,落到下一層,仲見到個文青女孩Gigi仲係下層,佢無係度玩手機,而係眼神帶點憂鬱地望向窗外,空洞地唔知係度望緊啲咩,諗緊啲咩。
 
「喂?」
 
「你落車啦?」
 
屌⋯⋯個巴士佬香港腳發作?無啦啦咁樣急停,chock到我差啲跌咗部電話。
 
「落啦落啦,你出定門口差唔多啦。」
 
係窗外,不其然咁望一望Gigi,佢同我對到眼,哇⋯⋯又尷尬又怕醜。
 
我同佢揮揮手,笑一笑。
 
佢無咩反應,依舊憂鬱眼神,亦唔知佢有無見到我。


 
搞到我有啲柒⋯⋯