《我的MK妹同桌》第二季: 58

「你啊，唔好玩到咁癲啊。」喺電話嘅最後，呀詩叮嚀我。
 
「你都已經玩到癲曬咁返嚟，先叫人唔好玩咁癲？」我笑住咁反問佢。
 
「係咪唔得啊？提醒下你係咪唔得啊？」呀詩姐係叫我唔好得寸進尺⋯⋯
 
本來呀詩個語氣都好聲好氣，似係幾擔心我，會掛住我嘅tone⋯⋯但頭先一講完，佢就變認真咗。
 
「因為見過Ocamp入面啲人玩得幾癲，以前我可能都會嘅，但依家已經唔啱我，我入u係想離開呢個屋企，想有能力可以自己出嚟，唔想靠任何人。」
 


一路以嚟，我都明呀詩嘅苦況，但無奈自己又做唔到啲咩，佢屋企嘅事亦唔方便插手。
 
「個camp係幾好玩嘅，但有啲位你會知唔應該係咁。」
 
「唉⋯⋯唔同你講住啦，我老豆返嚟啦，未入屋已經嘈生曬。」
 
「嚟啦！！！」呀詩明顯咁拎開咗部電話，匆匆忙忙咁收線，收線前仲離開聽到一啲吵雜聲。
 
我真係聽到都覺得心痛，好想帶佢離開呢個環境！！！
 


我係地鐵站度傾完個電話，Gigi話佢會遲，我就諗咗陣嘢，然後玩陣電話，失驚無神Gigi就出現了。
 
「嗨～～」佢臉上掛住一個尷尬而不失禮貌嘅笑容。
 
而我並唔在意，以前嘅我會對陌生，同埋女仔相處會感到緊張，我諗⋯⋯如果我嗰陣時無同到呀詩一齊，無經歷過咁多嘢，我依家面對Gigi，會緊張、會心跳加速。
 
我諗，我會對佢有好感，然後慢慢鍾意上佢。
 
依家嘅我唔會咁，因為無放係心上，個人輕鬆自在好多，所以唔會覺得有啲咩尷唔尷尬。
 


但我睇得佢有啲尷尬。
 
「嗨～～」我望望佢帶嘅嘢，都幾多嘢下，而且佢嘅打扮包到實一實⋯⋯明明依家係夏天嚟，出面熱到仆街喎，一陣應該仲熱喎。
 
究竟女仔係咩構造？夏天可以唔怕熱，冬天可以唔怕凍？
 
「你帶咁多嘢，難怪會遲啲啦。」我輕鬆咁講啲無乜特別嘅嘢。
 
「Sorry啊⋯⋯我盡力趕過嚟啦。」Gigi認真咁講。
 
我反而俾佢嚇一嚇，咁認真嘅咩？
 
「傻啦，我講下咋，我哋依家係度出發都唔會遲到啦，我等一陣無乜嘢喎。」搞到我都要認真解釋返，仲尷尬⋯⋯
 
我見佢都幾攰下，啱啱出發咋喎，咁快就攰？


 
「你好攰？」我關心下，順便開個話題。
 
「唔係啊，只係我本身個身體就唔係咁好姐⋯⋯」睇得Gigi臉頗兩旁微微透紅，唇色略顯蒼白。
 
「咁你仲著長袖衫？依家好熱喎。」我驚佢未到個營地就收皮先。
 
「我慣咗長期著長袖衫褲㗎啦，我無嘢喎。」見佢都講到咁，我都無咩好講了，只能祈求佢無事啦。