一路上,我都有同Gigi傾下偈,為免個氣氛唔好咁尷尬,我只好扮下輕鬆。
 
問佢其實讀邊間中學,講完先知原來都係喺附近姐,都幾有緣。
 
但閒談間,我都仲係感覺到佢由心散發出嚟嘅憂鬱,但唔知佢憂鬱啲咩。
 
Gigi佢好識「笑」,好識用「笑」嚟掩飾內心嘅悲傷,俾我嘅感覺係咁樣。
 
我哋傾返中學嘅嘢,通常都係邊度食飯啊,買啲咩啊,呢啲都係我哋中學回憶入面嘅共鳴。
 


難得新識嘅朋友會有咁嘅共鳴,我哋之間嘅關係當堂緩和好多,無咁尷尬。
 
我有預感,我同Gigi之後會成日來往⋯⋯
 
「係呢,咁你有無男朋友啊?」傾到有dead air就問下其他嘢,覺得可以問下啲deep少少嘅嘢。
 
「我⋯⋯」好明顯Gigi就一臉害羞。
 
「我無拍過拖啊,上次食飯我有講過啊⋯⋯」經佢提一提,我先醒起,頓覺有點柒。
 


「係啵⋯⋯」
 
「因為屋企管得嚴,唔俾我拍拖㗎。」佢後尾補多呢句,佢特登補返呢句,其實我無再追問,佢唔答都okay,都無乜必要講,但就講咗出嚟,仲要愁容滿面,眉心輕輕鎖緊。
 
「哦~~依家都畢咗業啦,可以試下喎,你都大個啦其實。」我口快快咁衝口而出。
 
「吓?」Gigi抬頭望住我,眼神意亂情迷,深遂嘅眼珠左右快閃咁掃過我臉龐。
 
「我屋企人唔會俾㗎。」佢好堅持。
 


我俾佢個眼神嚇親,好似有啲電到咁⋯⋯
 
我即刻轉移視線,唔敢望太多,我真係猜唔透Gigi諗緊啲咩,於是我抬頭望一望個地鐵站,睇下仲有幾耐到。
 
「都就快到啦喎。」我轉移話題⋯⋯
 
我都叫自己唔好諗太多,同時同Gigi保持一定距離,唔係指身體上,而係指心靈上,因為我清楚知道,Gigi唔會係我鍾意嘅嗰類人。
 
應該咁講,我覺得我唔會再搵到好似呀詩咁好嘅女仔,全世界入面,得佢一個係咁,獨一無二,唔會有第二個,亦唔會有第二個再俾到咁強烈嘅感覺我。
 
因為咁樣嘅諗法,先一路支撐住我,先會分手後仲咁念念不忘,放唔低呀詩。
 
即使依家出現第二個女仔,我都係咁諗。
 
去到營地,組爸組媽好熱情咁歡迎我哋兩個,仲叫我哋拎衫,呢件衫將會成日陪伴我左右,我成日都著住件營T㗎真係⋯⋯


 
——著住嚟瞓教。
 
件衫後面有寫我哋嘅花名,件衫係全黑色,熱辣辣仲要著住件黑色衫,真係熱到仆街。
 
前面寫住我哋嘅組名,後面就寫住花名咁,我就大大隻字「薯頭」咁樣寫係背後,真係柒到飛起,但往往呢啲柒事就最值得回味。
 
後來再諗返起,原來唔單止我個名柒,連個組名都柒過人,叫「二世組」。
 
以前會覺得懶係搞笑,但大個咗就覺得柒到無論⋯⋯