《我的MK妹同桌》第二季: 72

之後啲房game就係啲真心話大冒險嘅朋友。
 
印象中無乜特別嘢發生，只係有人飲到醉醉地，咁啱抽中大冒險，俾人指名道姓要同鍾意嘅女仔表白。
 
佢又真係有喎⋯⋯
 
拎起電話就撥咗個輪過去，我哋就食花生食得好爽。
 
我哋就食花生，人哋就食檸檬⋯⋯
 


仲有咩問隔離組女仔拎胸圍，好鬼多痴線兼弱智嘅嘢。
 
完咗成晚嘅活動，我哋一組男仔好自然瞓同一間房，同組爸一齊瞓，我趁佢哋去沖涼嗰陣時嘅空檔，打電話俾呀詩。
 
「點啊？玩得開唔開心啊？」呀詩劈頭第一句就彈咁嘅嘢過嚟。
 
「還好啦，兩日一夜比較趕。」我抬頭望見一鈎殘月，今日個月亮有啲殺意。
 
「係咩？你好似玩得好開心啵，成日一個msg都無。」陰風陣陣，叢林唦唦聲作響。
 


「我一得閒就打電話俾你啦！」我解釋道。
 
「方唔知玩到忘曬形咩，難為我之前去Ocamp都成日抽時間覆你whatsapp！」呀詩用委屈嘅腔調同我講。
 
「我聽日覆返啦，我不嬲都知我女朋友好嘅。」我哋你一句，我一句咁傾。
 
本來我係捱係欄杆前，個視線係望住外面嘅營地，望得攰，轉個身嘅時候⋯⋯
 
就見到Gigi拎住換洗衣物，頭髮濕濕地咁擺係後面，啱啱沖完涼出嚟嘅佢比白天更加誘人，著住鬆身嘅長袖衫，短短嘅睡褲，就算係夜晚都藏唔住佢雪白無暇嘅肌膚。
 


視線對望到⋯⋯
 
對望到⋯⋯
 
又不自然諗起頭先嗰一幕，頂你個肺，我同緊呀詩傾緊電話啊！！！
 
「你依家先知我好咩？？」電話裡頭傳出好虛弱嘅聲音。