我同Gigi對望嗰陣都幾尷尬,因為我以為佢會同我笑下啦,咁話曬今日玩game嗰陣大家又熟咗唔少,而且佢又幫過我擋咗一劫。
 
點知佢淨係望咗我一眼,目無表情咁樣係我身邊經過⋯⋯
 
呢吓我唔明,就算唔講嘢,say個hi都好啊?
 
「喂⋯⋯」
「喂!!」
 
「李建強!!!!」呀詩嗌我全朵我先回過神來。


 
「頭先你搞咩嚟啊?做咩無曬反應啊?」之前佢先柔聲細語咗,依家即刻惡返,喺女仔獨有嘅七十二變大法。
 
「哦⋯⋯無,可能收得唔好掛?」我求其亂嗡吓。
 
「係咩?」呀詩帶有疑惑咁問我。
 
「算啦,但我好掛住你啊。」呀詩變到好似個細路女咁,我好清楚,呀詩呢一面只會係我面前先會咁。
 
以佢平時咁烈女嘅性格,唔會出現到喺其他人面前。


 
「我入嚟先一日咋喎,咁快就掛住啦?」聽到呀詩咁樣講,我入面都好甜絲絲,頓時覺得好甜。
 
亦為頭先Gigi咁樣行過而分心感到內疚,呀詩對我嚟講,先係最重要嗰一個。
 
瞬間我就將頭先Gigi嘅舉動拋諸腦後。
 
「一日都掛啦!而且點知你係入面點㗎?可能俾人食咗呢?」佢試探性咁問我。
 
「我驚你俾人食多啲囉!女仔好易蝕底俾人㗎。」我即刻諗起今日玩嘅game。


 
「你去Ocamp嗰陣有無玩啲淫賤game!?」我問佢,空氣因此變得凝重。