從我開車撞死她的那刻開始: 第八章
「哈哈，痴線架咩。耶穌死左都要三日先復活啦。有冇咁快就可以返生呀。」為了不失霸氣，我開了個玩笑揶揄少女。
「你唔信都唔奇，我知成件事本身就好荒謬。我地邊食邊講啦。」
「呃……但係，我有個習慣，就係從黎唔會出街食。你同我素未謀面，冇理由上我屋企架嘛。哈哈。」
「我冇所謂。倒不如話咁樣仲好。」她攤攤手，說。
「唔係掛！孤男寡女喎！」
連我都臉紅起來了，但是Jenny沒有錯開眼神，筆直地注視著我。她態度強硬得讓我無法拒絕，迫於無奈之下，唯有請她上我家坐坐。我家和公司大約只有十分鐘的步程，很快，我們就回到家了。打開門後，客廳就傳來一陣異味，來源，是堆在客廳角落的未洗衣物。
「一個男人住係咁架啦，將就下。」
我把沙發上的雜物挪開，讓她坐下。
「妳係度等下啦。我好快就煮完。」
我已經走進廚房了，但是我一時間不知道應該煮什麼。
「鬼妹鐘意食咩呢。」我自言自語。
考慮到保險、省時間和省錢這幾項因素，我決定做白汁煙肉意大利粉。經過一番調理後，兩人份的意粉終於完成，上碟後，我請她到飯桌就坐。
她吃了一口後，笑了笑：「估唔到你識煮野食喎。」
「我一個人住咁耐，冇理由日日食公仔麵架嘛。唯有頂硬上。」
寒暄一陣子後，我們開始進入正題。
Jenny放下刀叉，說：「其實，頭先你咪問我係人定鬼既。我迴避左你既問題，係因為，我真係唔知點答。」
「咁即係……」
「我諗，我可能比較偏向鬼果面啦。其實，我真正既身份，係一隻吸血鬼。」
我全身僵硬，不由得站直起來。
「唔駛緊張，我都話左我唔會傷害你。坐返低先啦。」
雖然我想坐下，可是我的腳不受控制，她看我像石化了般沒有反應，只是嘆了口氣，然後繼續講解。
「雖然我係吸血鬼，但係我唔吸血都冇乜問題，因為我發現，西瓜汁可以抑制我既吸血衝動，而且西瓜汁仲要好味好多添。所以，只要你買多d西瓜汁，我就唔會害你。」
她又強調：「記住，係紫色西瓜汁呀。」
「啊……啊哈哈。」聽起來很白痴的設定，好不容易，我才能強擠出笑容。
「你可能會好好奇，點解我仲可以生勾勾咁企係度呢？好簡單，因為我地吸血鬼姑且算係不死既種族，只要一死就會重生。」
聽起來極不現實，但是也不到我不信，因為，她的而且確復活了。那就是說，我昨天醉駕沒有害死人吧。
太好了。
我沒有殺人。
吸血鬼萬歲啊。高興得快要掉下淚來。
「擁有不死既生命，真係令人羨慕呀。」我發表了我的感想。
對。沒有人會想死的，我想，我的家人應該也不想死吧。要是，我的家人在意外後的翌日，能夠復活，能夠回到人世……
「真係咁樣咩？對我黎講，復活，只係一種詛咒。」
她冷冷地說，表情看來無比哀傷。
「我想死。」
我知道，那是她最由衷的願望，因為，她的眼神看來杳無生氣，對於自己活著這個事實，沒有半點喜悅。
Jenny深呼吸了一下，臉轉變為當初的平淡：「好啦，大約講左一下我既背景，係時候交待返尋晚既事啦。其實呢，尋晚我會出現係果個地方，唔係偶然。」
「咁又係……橫風橫雨出現係荒山野嶺，我真係以為撞鬼添呀。」
「嗯。我本來係想低調d，唔想驚動其他人。」
接著，她平淡地道出她的意圖。
「尋晚，我上山就係為左自殺。」
「哦……咪住先，妳頭先唔係話過，你死完之後會返生架咩？咁自殺有咩意思？」
「吸血鬼呢，其實係一個受詛咒既種族，我地既人生，同詛咒永遠脫離唔到關係。」她頓了一頓，又說：「你應該知道，六六六，係一個備受詛咒既數字？」
我點頭。
「頭先，我話我不死，其實並唔完全係，因為我既人生都有終結既一刻。不過，我要死六百六十六次，先會真真正正咁死去。」
一個令人毛骨悚然的念頭突然湧現。
「呃……妳話，妳想真正咁死，咁妳今次，應該唔係第一次尋死？」
「嗯。」她直認不諱。「我自殺過好多次，多到連我都就黎唔記得。」
為了終結自己的生命，她不惜走進復活與自殺的無限迴廊，直到六六六。雖然我無法理解，但是，這是她的選擇，我也不方便干涉。
始終，她不是人來的啊。
搞清了真相後，不滿的情緒油然而生。我有點不快地說：「妖，既然係咁，妳想死咪自己跳落山算囉，做咩係都要我撞你呀。」
真的。她要自殺關我屁事呀。害我一整天不得安寧。
給我添麻煩了。
「呢方面，我真係要同你道歉，但係我有苦衷架。其實，要自殺死真係唔難，但係死亡既效果，遠遠比唔上他殺。」
又來了。她又想說什麼啊。
「自殺冇錯係會重生，但係，復活既地點同時間唔可以隨意控制。我之前條命係巴黎凱旋門附近自殺，明明果次既死係2012年既事，但係，要等到尋日朝早我先復活，而復活既地方仲要係香港呢個咁遠既地方添。」
Jenny拿出一包剛才我買的紫色西瓜汁，逕自啜飲。
「只有被他人所殺，我先會係死亡後第二個日出，係原本死亡既地方重生。」
「哦……即係妳為左方便自己，利用左我？」
「冇辦法。係如今和平既社會，想搵個人殺死自己真係好難。事實上，我已經盡可能唔俾麻煩你架啦。你開車撞我果陣，我盡可能就岩角度，所以架車先冇乜損傷……」
接著，少女對我咧嘴而笑，她的表情彷彿在訴說看穿了我的內心。
「再者，你本身唔係對殺人躍躍欲試咩。」
無法反駁。就算那不是由衷的願望，但的確有一剎那，我有過那樣的想法。
她說：「尋晚我挑釁你果陣，我留意到你望我既表情，充滿殺意。」
我說：「痴線。妳咁搞法，我會嬲好正常呀。咁就話我想殺人？」
「你呃唔到我，因為我見過太多想我死既人既表情。你既表情，同果啲人一樣。」
她喝完紫色西瓜汁，也吃了最後一口的意粉。
看著她實在有氣。我做了個送客的手勢，說：「哼。食完既話，唔該你快啲走。」
可是，她卻沒有站起。
「唔好唔記得，我俾新發物流公司請左。即係話就算我依家走，聽日，你都係會見到我。」
對，問題還沒解決。既然她如此大費周章來找我，一定另有所圖。
我跟Jenny的故事還沒完結，倒不如說，只是剛剛開始。