從我開車撞死她的那刻開始: 第五十一章
當我看到阿陽後，一股怒意湧上心頭，還沒待他說話，我便扯住了他的衣領，咬牙切齒：「你到底係度做咩。」
「喂，車仔，大家斯文人，唔好郁手郁腳好喎。」
「點解你要咁對阿晴呀……」
「哎。」他斜眼看了看八婆珍，眉頭一皺。「不如我地行埋一邊傾先。」
「你黎得呢度搵人，都預左我會係度架啦。有咩點解唔可以三口六面講清楚呢。」
「好，咁你放手先。」
我如他所說把手鬆開，阿陽整理衣領，一旁的八婆珍一臉狐疑。
八婆珍問：「到底發生咩事？」
阿陽說：「其實呢，我有啲野想同Jenny講。車仔，可唔可以行開一陣？」
我說：「唔得。頭先我都話左，要講就要三口六面講清楚。」
阿陽聳了聳肩，雖然看上去有點無可奈何，但是他很快就變臉，掛上了追求用的招牌微笑，手上的花束，往八婆珍那處遞去。
「好……咁我就老實講啦。Jenny。我其實好鐘意妳。」
打從心底裡羨慕著阿陽，能作出單刀直入的示愛。我愛著八婆珍，但是，我很清楚自己沒有坦率表露心意的勇氣。如今的我，我抱著怎樣的心情呢。要是八婆珍答應了阿陽，我應該替他們感到高興嗎。
對於突如其來的告白，八婆珍愣了一會，看上去有點迷糊。
「吓？鐘意我？」
「冇錯。我係認真。希望妳可以做我女朋友。」
「你唔係已經有女朋友咩？」
「係呀。不過以經係以前既事。我好清楚自己心底鐘意妳，所以，我同阿晴分手，希望證明到我既誠意。」
阿陽凝視著八婆珍的臉，然後，他作出了如此說辭。
「其實，我對妳一見鐘情。由第一刻見到妳，我就已經好肯定，妳就係我一直以黎所追求既對象，之後既日子，我一直對妳朝思暮想。妳真係，好charming。」
八婆珍嘆了一口氣，雙手，沒有接過花。
「上次生日，其實我就想同妳表明愛意，但係唔成功，今日，我點要了左件心事。希望妳可以接受我。」
「多謝你鐘意我。但係，我唔可以接受呢份心意。」
「點解唔可以？」
「我唔想發展一段新戀情。」她幽幽地說。
為什麼要拒絕？是因為礙於自己的身份？是因為自己快要離去？還是，她心中另有所屬。要是告白的人是我，結果會是一樣嗎。
「我係好有誠意架。為左妳，我可以咩都唔要。我以後只會對妳專一。」
「阿晴比我更加適合妳。」
「佢係我既前度，係我既過去。依家我想要既，得妳一個。」
看到這裡，我禁不住插了話。
「阿陽。我勸你都係搵返阿晴好啲。」
「點解？唔該你唔好加把口，依家係我同佢之間既事，唔好拉埋佢講。」
「阿晴佢岩岩打電話黎搵我。佢話，如果你唔搵返佢，佢就會自殺。」
「吓？」阿陽愕住了，面部也僵硬了起來，然而在下一瞬間，他只是乾笑了幾聲。「唔好意思。我唔會搵佢。我識左佢十幾年，佢連蟲都唔敢踩死一隻，點會有勇氣自殺。」
接著，他的聲線壯大，把他的想法與絕情合理化。
「佢只不過係想用呢種手段威脅我。唔該轉告俾佢聽，叫佢面對現實，我地感情一早淡左好多。我地愛情長跑左咁耐，都係時候完啦。」
他又說：「冇錯……你唔好誤會我見一個愛一個。Jenny既出現令我臉紅心跳，呢種愛既感覺，淨係Jenny先俾到我。我想追求屬於我既愛情，咁樣又有咩錯？」
一段感情，怎麼可以因為他人的外表而變質呢。然而，我卻沒法指責他，因為，他比我有勇氣。
「鐘意人，就要出聲。」他曾經跟我說過這句話。但是，我礙於面子，從來也不會對有好感的人有所表示。
所以，他能得到八婆珍，也是理所當然的吧。
「阿陽。」八婆珍的開腔，馬上吸引了我們的注意。「我想問，你鐘意我啲咩？」
「因為妳好靚，好吸引。」阿陽說。
「如果我同你係埋一齊，過左一段時間，有一個更加靚既人出現係你面前，你會點？」
「冇咁既可能。世上，唔會再有其他比你更令我心動既人啦。」
肉麻的說話加上迷人的笑容，說不定阿陽就是憑著這兩樣武器，在情場上無往而不利吧。可是，八婆珍，看上去不為所動。
阿陽又笑著說：「Jenny，妳依家未必接受到我，但係我相信我既誠意，會打動到妳。」
「咁除左我個樣之外，你仲鐘意我既咩？」八婆珍問。
「呃……上次生日party，車仔上次飲醉左，妳就即刻車佢返去，真係好有責任感……我就知道妳係一個好女仔喇。呀仲有，之前我地咪成班人一齊玩既？妳份人咁樂觀又風趣，同妳相處一定好開心。」
阿陽對自己的答案非常滿意，表情沾沾自喜。
「咁樣……你鐘意既係我塊臉，定係我既靈魂？」少女問。
「兩樣都鐘意……」
「只可以揀一樣。」
阿陽苦笑：「咁緊係妳既內在美。」
八婆珍閉上雙眼，一副漠然的態度。她說：「咁樣，如果我個樣變得唔靚，你會唔會繼續鐘意我？」
「會。」
那絕對是謊言，因為阿陽是外貌協會的人。但是，那又如何？一個人的外貌，總不可能在剎那間變醜，直到年華退去前，也無從驗證這番答覆的真偽。
我是這樣認為的，而作為謊言的主角，想必也抱有相同的想法。
可是，我們錯了。
「咁樣，證明俾我睇啦。」
那是無比冷淡的聲調，她的神情，滲雜了失望與悲痛的情緒。在那個剎那間，我回想起，少女其實被一層陰影所籠罩，一直也沒有擺脫她的過去。
那是崩壞的宣告。
她的動作之快與脫離常規，使我們無從反應過來，就在我們回復反應之後，才意識到少女蒼白與美麗的臉上，佈滿血痕。
少女，拿出了工作用的界刀，在自己的臉上亂劃。
「喂……喂！妳做乜野呀！」我抓住了她的手時，已經為時已晚。傷痕之深，鐵定會留下一道道的疤痕。
八婆珍毀容了，但是，她卻笑得非常燦爛。她的手放鬆了下來，落下的血水，沾染了她的雙唇。
「依家我塊面搞成咁，你仲會唔會鐘意我？」少女說話時，舌頭輕輕舔拭嘴角的血紅。
「呃……呃。」阿陽渾身發抖，剛才求愛的勇氣消失怠盡，連跌在地上花都沒有拾起，頭也不回的落荒而逃。
「哈哈……哈哈哈。」
明明容顏盡毀，可是八婆珍卻在開懷的狂笑。
「又話會繼續鐘意我既？哈哈。但佢又雞咁腳走左去喎。」
凄厲的笑聲不住迴響，直到少女筋疲力竭。
「真心？唔好呃人啦。哈哈。」
她不相信愛情，跟我當初不信任他人，大概是同樣的心情吧。所以，她才說我們是同一類人。
只是，她所受到的創傷，似乎遠比我深。