我鍾意咗我親生姐姐，但係佢已經有男朋友？！: 舊同學！

葉小倩係我中學同學，佢生得細細粒，而且比較瘦，所以啲人叫佢做「小矮人」。但個樣生得幾標青，有三成似朱恩，七成似張曼玉，所以佢亦都有個別名叫「黑暗界合成獸」，只係冇咩人會咁叫佢。佢都幾受歡迎架，係班入面嘅開心果同時係重心人物。冇見幾年，估唔到宜家仲靚咗，連個氣質都成熟埋。

「嘩，冇見幾年，一見到你就喺條街喊。」啱先嘅溫柔一消即逝，「邊個搞到我地嘅金毛晞喊曬口呀。」佢笑到見牙唔見眼。

講開又講，中學時期嘅我的確有個朵叫「金毛晞」，有一排我好鍾意扮陳浩南所以用油粉筆將個頭油上金色，加上我個名有個晞字，順理成章咁，全校嘅同學都叫我做「金毛晞」。

「你咪理，你又會咁啱行過呢度嘅？」我記得葉小倩以前係住美孚嘅，點解會喺呢度出現嘅？

佢思考咗一陣，擺咗個苦瓜樣，「咩你唔知咩？我搬咗屋啊，呢～咪嗰幢囉。」小倩指住無幾遠嘅一座大廈。





「我點解會知？」我即刻反駁佢，都冇聯絡咁耐，佢憑乜嘢覺得我會知佢啲嘢，所以話女人真係難捉摸，好似一頭奔馳中嘅野馬。

「你仲係咁串嘴！」佢笑咗一笑。

「係呢？咁你做咩喊嘅？」今次佢用好認真嘅眼神向我發問，中學時期，佢一露出呢個眼神就代表佢一定會打爛沙盤問到篤，冇人可以逃得出佢五指山。至於點解我會咁了解佢，係因為佢以前同我幾fd, 而且仲曾經鍾意過我。

我知道我唔講今晚就唔使走，「你趕唔趕時間？如果唔趕，就一路行一路講。」

小倩望一望手錶，「...ok呀，反正我都啱啱放工。」