我鍾意咗我親生姐姐，但係佢已經有男朋友？！: 小倩

我哋行到一間餐廳入面，是但搵咗個位坐。

「夥記，唔該一個乾炒牛河同一個豉油皇炒麵呀！」

小倩好似等緊我講件事嘅來龍去脈。「所以你做咩喊啊？你好快啲講，從實招來。」佢隻食指指住我，好似名偵探柯南發現犯人咁，嚴肅入面帶點搞笑，果然係「開心果小姐」。

我又唔好意思話我暗戀親生家姐，但因為佢唔理我所以唔開心，更何況我就係因為家姐所以先拒絕小倩，內疚感驅使我唔敢直視佢。「我...近排有啲在意一個女仔，但佢好似唔係太理我...但佢又唔係唔理我，我都唔知佢係咪鍾意我。」我越講越亂，每次一提到家姐嘅事，我就方寸大亂。再者，要同一個曾經鍾意過自己嘅女仔講其他女仔嘅事好似有少少奇怪。

「....大致上明白！即係你鍾意咗一個女仔，但唔知佢點諗，係咪？」



小倩聽我講完之後好快就整理好成件事，果然係成熟嘅城市女孩。

「...」

佢陰陰咀笑，「不過連我哋嘅金毛晞都對佢沉曬船，我估佢應該又靚又大波啦，係咪？」用少少鄙視但又好奇嘅眼神望住我。

「ummm...ok啦！」我腦海入面浮現出家姐個樣，佢微微一笑，我已經好似比愛神邱比特支箭射中。

「WoW! 你塊面宜家紅過馬撚wor, cap低先！」小倩又喺呢啲重要關頭搵我嚟笑，不過佢由以前開始都係咁，所以我先對佢冇曬呼。



我拎起電話，諗住睇下YouTube, Twitter｡

「不過佢就好啦，有個咁痴心嘅男仔鍾意佢，如果我係佢一定好幸福。」唔知有意定無意，雖然小倩細聲咁講，但我都聽到。相比頭先，此刻佢嘅眼神帶點憂傷加少許空洞。或者係諗起以前啲事，平時嘅開朗就好似比污雲覆蓋住，變得寂靜。

對於呢種心情，我完全明白，好似我鍾意家姐咁，小倩亦都好鍾意我，而我連答覆都冇就離開咗，只剩下冷冷嘅空虛，當年嘅小倩就被不明不白判下死刑。

人與人之間嘅關係就好似冰一樣，好易碎裂，就算你好想挽救，但其中一方唔想，你都無能為力。而言語亦都一樣，係一把雙刃劍，稍有不慎，就會對大家造成無可挽救嘅傷害。假如人一疏離，大家都明白今次一別就係永遠，只係唔願意接受而不斷用藉口麻醉自己，令自己好受啲。中學時期嘅我就係咁，連道別都冇，就消失喺小倩嘅世界入面。

我同佢互相望咗一眼，小倩就忽然變返平時充滿活力咁。「其實你都唔使咁sad嘅，我都係女仔，明白女仔諗咩！」佢露出與以往一樣嘅笑顏，不過我知道只係強顏歡笑，唔想我擔心。



我冇答佢，只係靜靜咁聽佢講。

「女仔最想要嘅係主動同被愛。佢哋唔會想一味咁等，佢哋想要嘅係一個確實嘅答覆同承諾。如果你再拖拖拉拉，佢好快就會比人搶走架喇，話雖如此，我都未拍過拖，哈哈。」呢幾句說話深深咁插入我內心深處，好似比人用刀係咁刮係咁刮咁，好痛好痛。

佢講嗰幾句嘢好似就係同緊以前嘅我講一樣，全部都係我冇比佢嘅嘢，連少少都冇辦法比倒佢，但小倩仍然可以咁強作鎮定咁講出嚟。我覺得自己係人渣中嘅人渣。

估唔到感情問題係咁複雜，唔同打機，係更加更加赤裸裸嘅「痛」。而我正正係受到「一波未平，一波又起」嘅攻擊。

「喂，先生！你個牛河同炒麵呀！」

一聲嘅呼叫打破咗死寂嘅沉默，否則我應該會被自己嘅內疚殺死。

「咁時間都差唔多啦！我走先，你加油啦阿晞！得閒就搵下我啦，呢個係我電話！難得我哋住咁近。bye bye」小倩比完建議我之後就離開咗，佢嘅背影雖然好小，但內心嘅強大係我完全無法匹敵。