110k釋出。

S:「YY!Erica!」
Y:「姐姐!好耐無見!」
E:「嘩!真係大個女咗好多。」
S:「係咪等咗好耐喇妳哋?」
E:「咪又係當年班七早就飛,等咗兩個鐘囉。」
Y:「嘻嘻,有乜所謂,姐姐你哋飛過嚟咁遠。」
三個女人見返面就即刻抱埋變咗個墟,剩返我哋幾個面面相覷有啲尷尬…
「Hello,你就係Issac呀…如果無記錯好多年前入村搵Erica嗰陣見過你…」




呢個四眼阿Sir就真係同以前無乜點變,正正經經怕怕醜醜咁,希望佢唔會俾學生恰。
「哈哈,我係大快活店長呀…認得我啦,之前發覺無見你一排問返我老婆先知你去咗美國讀書,估唔到咁快結埋婚有小朋友添。」
「而家啲年青人真係早熟呀下,眨下眼Erica佢就俾佢啲學生爬晒頭,睇嚟我都要加把勁先得。」
我:「哈…呢個係我老婆琋玟,女女叫靜璇,璇璇嗌Uncle啦。」
本身我都係諗住貪過癮問大家有無興趣,點知原來真係會成事,但過到嚟先發覺有種唔知點嘅感覺,不過都係嚟玩啫,無事掛…
我:「喂,咁多位…我哋重差一個人,佢㗎機就到喇,不如我哋過去國內線嗰邊食住少少嘢等吖。」
於是乎我哋一行九個人就去咗國內線航廈個food court食嘢,而最唔使諗嘅嘢就又係博多拉麪喇;提返大家呢度係福岡機場,我同Stella,琋玟加兩位細路由紐約飛關島hea咗兩日再飛過嚟;YYM同Erica兩pair就一早約好喺香港飛嚟;而Cindy呢?佢今朝重喺公司返緊工,然之後仆去東京搭國內線過嚟,點解佢會喺東京?因為俾間iBank調咗過嚟囉,已經嚟咗三個月未知幾時走得,結果我間屋又變咗吉屋,不過無嘢嘅…
我:「啱啱landing喇…我過去閘口接Cindy過嚟。」
四個女人隻眼互相望咗一兩下,轉咗幾轉,一句聲都無出過,但就好似交換咗無數訊息,不安嘅情緒喺我心頭油然而生。
C:「Issac!」




我:「Cindy…」
我同佢揮揮手,點知說時遲那時快佢就已經撲埋嚟攬住咗我,重嘴埋上嚟,一時之間始料不及咁啜到我窒息咁滯;Cindy…重係好靚女,keep得好好,與其話佢同Stella,YYM係同學,佢而家更加似琋玟嘅同學;一件oversize嘅白色印花T,透出若隱若現嘅粉紅色Bra,條熱褲差唔多俾件衫cover晒搞到佢好似無著褲咁嘅錯覺,呢種配搭完全突顯出佢嗰對又白又滑嘅長腿,加埋對清爽嘅麻色綁帶涼鞋,有邊個估到佢今朝重喺iBank入面返緊工?
我:「喂…做乜咁熱情…俾人睇到點算…」
C:「哈?乜你都會驚㗎咩?我諗俾Stella同琋玟睇到受罰嗰個都係你,佢兩個唔會怪我嘅。」
我:「咪就係囉!Cindy…妳真係無變過…」
C:「係呀,我最鍾意偷食同玩仔㗎喇。」
我:「幾時修心養性呀?」
C:「乜呀!我無做呢樣嘢好耐㗎喇,而家係得返你呢個target。」
我:「唔好當我玩具啦…」
C:「喂!我哋幾耐無見過呀?」




我:「前幾日咪同妳video chat完嚟囉。」
C:「我係講面對面呀!」
我:「呢個…已經三年…」
C:「估唔到上一次分別係喺東京,三年後見返會喺福岡。」
Cindy,從來都係令人估唔到嘅,每一刻嘅心情同表情都可以隨時改變,明明上一分鐘喺度惡攪緊我,呢一刻就雙眼水汪汪情深似海咁望住我,一時之間我都唔知可以講乜…明明我同佢周不時都會chat下,但面對面見面係真係有種講唔出嘅感覺。
千言萬語,講之不盡,倒不如用靜默帶過。
C:「你囉!三年都唔返香港,我就嚟想揼晒你啲嘢喇,都發晒霉…」
我:「咁…都可以揼嘅,咁我老竇老母又唔喺香港,我返都返九州先啦。」
C:「你呀…重以為你部電腦有幾勁,捱到上年咪又係壞咗,好彩有呀威幫我整個部新。」
我:「吓,呀威?」
C:「你唔係唔記得你老死呀?咁我同Amy都有啲交情,咪叫佢老公幫下手囉,當佢知道我住咗你間屋佢呆咗,係咁問我點解,我死都唔答佢,好好玩。」
無錯,當我過咗美國無耐之後佢兩個就畢業,唔知發生咗啲乜陰差陽錯一畢業佢哋就結咗婚,當時佢有同我講都嚇咗一跳,而我喺美國陪緊Stella就生當然唔會返嚟同佢飲,咪好好咁祝福佢哋囉,唔知…關唔關我叫Amy接受佢嘅事呢…後來對歡喜冤家真係走咗去做夫妻檔KOL講打機,電競硬件,砌機等等,不過我喺美國都忙到一頭煙就無乜理喇。
我:「妳夠話過嚟玩BB啦,而家啲BB都唔BB喇。」
C:「咁嚟美國搞Visa麻煩吖嘛…公司又一直唔派我去…唔好講喇!佢哋係咪等咗好耐,快啲去搵佢哋先啦!」
係…再謦落去我真係驚Stella同琋問罪。




C:「哇!Erica!Stella!YYM!惜返啖先!重有…琋玟妳都有!」
女人,係一種好恐怖嘅生物,high起上嚟就算係身為老公都無辦法插手…而除咗Miss,同學,只係短短相處過幾日見過幾次嘅琋玟佢都無大細超。
C:「Hi!大快活店長!」
Cindy嘅熱情舉動當然引嚟男士們嘅目光…除咗我…佢烏低身逐個逐個女仔惜,我真係唔知佢哋點諗,雖然我哋以前…
「Cindy,我啱啱先知妳過咗嚟日本做嘢咋!咁耐無見妳嚟我重以為我間鋪啲嘢食水皮咗。」
C:「無呀,乜快餐店都重有得水皮嘅咩?」
Y:「作死你呀!喺我面前撩女仔!」
「點…點會喎…我之前重以為佢係Iss…」
嘩,我三年幾無同Cindy去食過嘢喇喎…
Y:「咪咁多廢話呀!Cindy妳就犀利啦,佢哋美國過嚟,我哋香港過嚟,妳東京過嚟竟然係最慢!」
好彩YYM封咗佢把死人口。
E:「人哋而家iBanker嚟,秒秒鐘幾十萬上落㗎。」
C:「好好好,小妹向大家賠個不是,係嘅,最遲嗰個係應該要罰嘅,小學生旅行都知…咁…我又無車牌,要麻煩各位大佬家姐,所以今次旅行嘅租車費油費路費就我包晒啦!」
E:「Yeah!咁就差唔多。」
其實我同佢一早已經夾好,呢少少錢對我哋幾個嚟講當然無問題,Erica早幾年都正式升咗GM教席,佢男朋友又多佢幾個points所以都唔會係乜負擔,但YYM同佢老公真係搵得唔多,之後又要使好多錢,我又唔好意思開口話sponsor佢,所以就…小小心意啦。




之後我哋就去咗機場toyota租車,呢個重任就交畀Erica同埋佢男朋友,我哋就係停車場等。
璇:「YY姨姨,妳肚仔做乜咁大嘅?」
女女佢一路問一路用手仔摸YYM個肚。
琋:「璇璇!妳點可以咁無禮貌…唔好意思呀。」
Y:「唔緊要…不過,我唔係YY姨姨,係YY姐姐。」
璇:「係…姐姐?」
我:「唔好死撐啦…妳重大過佢媽咪幾年。」
Y:「璇璇,唔好理佢哋,我係姐姐,個肚咁大係因為入面有個BB。」
璇:「嘩!係BB!」
承:「BB!」
璇:「你都係BB!」
承:「係BB!」
兩個細路雙眼好似發晒光咁,係嘅,小朋友真係好鍾意同其他BB玩,不過而家未有住。
今次我哋租咗兩架車,一架七人車,一架saloon,八個大人兩個細路用都算幾鬆動。
「Erica呀,點解我哋要分開喎…」




E:「咪嘈呀,我要同啲學生聚舊呀!要黐纏留返去到酒店先啦。」
「Stella,Cindy…我老婆就拜託妳哋喇…」
S:「放心啦,佢六個幾月啫,好安全。」
琋:「靜璇,天承,過嚟呢邊,我哋坐大車車,唔好同佢哋迫。」
「你兩個肯唔肯同叔叔玩呀,我諗我要開始學下點湊BB…」
璇:「呀…我唔係BB!」
承:「係BB!」
就係咁,我哋分開咗兩㗎車,五個大人迫埋同一架saloon car,重現返八年前嘅組合…
而我當然就坐喺司機位隔籬…由於我哋全世界都去過福岡,所以第一站就直接去遠啲嘅菊池溫泉區,不過去邊其實一啲都唔重要…
E:「頂你吖,死仔包!Stella我唔講,點解你而家有車牌重要我揸車?」
我:「一日為師,終生為母,照顧我哋係妳嘅責任。」
E:「算,揸車都好閒,你係咪斗膽咗啲呀?今時今日再搞多次咁嘅旅行…」
我:「無啲咁嘅事,明明我哋係第一次嚟…」
Y:「係囉係囉…」
我:「都係因為Stella同琋玟兩個畢業,又順便嚟多次Grad trip,咁啱Cindy又喺日本,佢又話不如搵埋YYM…結果,我自掘墳墓囉!」




E:「你知就好!你同佢哋講琋玟係你老婆,我哋都唔知點介紹Stella…」
S:「無所謂啦,話我係舊同學就得,我老公唔得閒陪我嚟,咁樣囉。」
E:「Stella,真係難為妳,咁都忍到。」
Y:「係囉!你有無搞錯,點可以咁對姐姐,計先後定計大細都好,都係姐姐做大啦!點解琋玟係你老婆而Stella係你同學,佢有乜咁好,離晒譜!」
S:「唔好咁講啦,我係同學會出現好正常,但如果琋玟唔係老婆佢又有乜理由喺度?」
C:「定係妳想同妳老公講其實兩個都係Issac嘅老婆?」
Y:「咁又係…」
E:「係囉!都唔知點瞞,天承重要嗌靜璇做家姐,聽到都覺得怪啦。」
我:「咁…小朋友,一齊玩,大啲嗰個就做家姐㗎啦,唔好太深究啦。」
E:「你真係同佢哋兩個結咗婚㗎?」
S:「結條毛咩!而家都無一個先進國家接受一夫多妻制,佢又唔敢得失是但一個,佢呢世都唔使結婚㗎喇。」
Y:「你好過份囉!為咗個西宮咁樣對姐姐!」
S:「YYM…唔准咁樣講琋玟,佢係好好嘅女仔嚟。」
C:「係囉,唔好咁激動啦,佢哋嘅關係千絲萬縷,我哋都係唔好理咁多為妙。」
E:「唔理你個死仔包…Stella,咁妳同埋琋玟屋企人都OK㗎嗱?」
S:「琋玟佢未生嗰陣父母就已經知道佢做咗單親媽媽,佢哋反晒面琋玟又乜都唔講,可能驚佢阿爸阿媽會發Issac悔氣,不過佢讀書叻,自把自為就一個人抱埋個女嚟MIT,佢屋企人都吹佢唔脹,不過我諗佢哋都放開咗,琋玟都有帶靜璇返去畀佢哋玩下孫…至於我,咪同屋企人講繼續專心讀書,同男朋友同居,佢哋睇到天承對住佢哋笑都無講啲乜嚕,最緊要我撈得掂啫。」
E:「原來係咁,妳哋開心嘅…咪得囉,真係估唔到我喺度教書都識到咁多神人,一個MIT PhD,一個MIT學位,一個iBanker,咁你又點呀Issac?」
我:「算係讀完個MSc…好好彩MIT請咗我做lab assistant…」
E:「啊,咁都唔錯吖,幾時又讀埋PhD?」
S:「佢?慢慢等啦!自己外快就做Programming,Gaming,喺學校就做Physics同engine,街外又要睇住個礦場,平時成日睇埋啲地質學同礦物學,咁唔專心搵邊個收?家下連琋玟都爬埋佢頭收到PhD offer喇。」
我:「而家咪under consideration囉,係等啲professor扤頭啫!」
S:「你呀,咁多嘢鍾意讀又唔讀下我啲科,如果唔係我請你做我assistant起碼可以同啲教授溝通下吖。」
我:「我先唔制呀,屋企又要對住妳,返工重要做我老細?我重有得抖嘅?」
S:「算吧啦你,不如留喺屋企湊細路好過。」
C:「喂喂喂…唔得閒聽你兩個學霸夫妻喺度耍花槍,Issac你分好咗啲房未㗎?係咪幫我訂咗單人房?」
我:「單人房…唔係幾好嘅…」
C:「又唔係話真係單人房,你咪照訂大房畀我一個人瞓囉。」
我:「一個人瞓…有啲寂寞嘅…」
其實係Stella同琋玟意思,佢兩個唔想要Cindy自己一個孤零零。
C:「玩咩…妳要我喺度做雙重電燈膽?」
S:「唔緊要啦Cindy,我哋唔好理佢,妳當係嚟陪我囉,而且妳又唔係唔識琋玟嘅。」
C:「雖然係咁講啫…」
Y:「嗱,總之Issac你唔好掂我呀下,拜託你哋唔好講錯嘢,我同我老公好幸福,唔想有啲乜嘢意外,我今次嚟當係順便同佢補度蜜月㗎咋!」
C:「係呢,做乜之前無聽過妳話結婚嘅?」
Y:「係咁嘅…我同佢唔小心搞大咗,而我M期又唔係太準,到發現嗰陣已經三個月,咪即刻同佢註冊囉,但我哋計過如果要book酒樓擺酒派帖起碼要搞三個月,到時我個肚都好大…所以咪索性唔搞囉,兩家人食咗餐飯就算。」
C:「咁幾好呀,無所謂啦,又唔使應酬,又可以慳返啲錢,呢個意外very good。」
S:「Erica,幾時輪到妳發生意外呀?」
E:「通常,做老師呢一行處事都會好小心。」
C:「乜嘢話!我無聽錯呀?Erica妳呢個Miss好小心,我真係會忍唔住笑…」
E:「哼,我係好認真㗎囉。」
C:「咁認真小心嫁唔出呀!」
E:「咁妳又點呀?Issac佢無晒quota喇,妳擔心妳自己先好過啦。」
C:「唓,我又唔恨嫁嘅,反正我而家都有兩個男人喺手俾我慢慢玩,有乜所謂。」
E:「Cindy…妳…重係淫蕩不能移呀下…」
Y:「Miss妳唔好笑人啦,不如呢個trip就好好同男朋友努力下發生意外咪幾好。」
S:「都係呀…如果唔係再過兩三年妳就變高齡產婦喇。」
E:「係咪黐線㗎…我係嚟旅行!點解要我俾自己啲學生催結婚生仔!」
我:「Erica,我對於妳嘅遭遇感同身受,深表同情,放心,我唔會加多一腳。」
E,S,C,Y:「收嗲啦,仆街仔!幾時輪到你出聲呀!」女人,真係好恐怖嘅生物。